منی سر ءَ بوتگیں اُرش ءَ ریاستی ادارھانی دست مان انت – زھرہ رضا

گوستگیں ماہ ءَ شال ءَ تیرگواری ءَ زدگ بوتگیں بی ایس او آزاد ءِ گوستگیں رھشون نمیرانیں رضا جھانگیر ءِ لوگبانک ءَ شال پریس کلب ءَ اھوالکاراں گوں تران کنان ءَ گوشتگ کہ آئی ءِ سر ءَ بوتگیں اُرش ءَ ریاستی ادارھانی دست مان انت –

شال پریس کلب ءَ اھوالکاراں گوں تران کنان ءَ رضا جھانگیر ءِ لوگبانک ءَ گوشتگ کہ من آواران ءِ دمگ تیرتیج ءِ نندوک آں چیزے روچ سال بلوچستان شھدربرجاہ ءِ دیم ءَ منی سر ءَ تیرگواری کنگ بوتگ وش بھتی ءَ من رکّ اِت گاں –

زھرہ بلوچ ءَ گوشتگ کہ مئے گوں کسے ءِ گوں دژمنی نیست انت ھمے واست ءَ منی کوش ءِ سر ءَ انت پرچاکہ منی لوگواجہ شھید رضا جھانگیر نودربر گل ءِ رھشون بوتگ کہ آ نُھ سال ساری کیچ ءِ دمگ آپسر ءَ شھید کنگ بوتگ ءُ پدا آ وئیل ءَ پد زگرانہ ءَ منی ناکو بختار بلوچ ءُ ھمراہ ءِ دگہ شش مردماں تیرباران کنگ ءُ شھید کنگ بوتگ انت – زھرہ ءَ گوشتگ کہ اے درسانی کوش اناگتی وئیل نہ بوتگ انت بلکنہ اے درسانی کوش ءَ ریاستی ادارہ ءَ آئی داشتگیں کُشندہ ٹولی ھوار انت –

شال پریس کلب ءَ اھوالکاراں گوں تران کناں زھرہ بلوچ ءِ گوشگ ات کہ بلوچستان ءَ سیادی داروکیں من اولی زالبول نھاں کہ مناں نشانگ کنگ بوتگ بلکنہ مناں پیش بازیں بلوچ زالبولے نشانگ کنگ بوتگ انت نوں چدوگیشتر بلوچ زالبول نشانگ کنگ بوگ ءَ انت – ھمک روچ بلوچ زالبولانی کوش ءُ آھانی زورانسری آوار جنی بوگ ءَ انت اگاں اے وڈیں وئیلانی گر ءُ دار کنگ نہ بوت گڈا چدوگیشتر زالبول یکجاھی سزایے نشانگ کنگ بنت – من وتی بنکی ھنکین یل داتگ ءُ شال ءَ اتکگاں تانکہ وتی زھگاں بہ رکّیناں ءُ شریں ماھول ءِ تہ ءَ وتی زھگاں بہ وانیناں بلے ادا ھم مارا نندگ ءَ نیل انت کہ چریشی ءَ مناں وتی زند ءِ درگت ءَ بازیں ترس ھست انت پرچا کہ اے پدا منی سر ءَ اُرش کُت کن انت –

آئی ءَ گوشتگ کہ مناں دو زھگ ھست اِنت کہ آھانی تہ ءَ یکے ھپتمی تبک ءَ وانگ ایں ءُ دومی سیمی تبک ءَ وانگ ایں آھانی وانینگے زمہ واری منی سر ءَ انت – لوگواجہ ءِ شھیدی ءَ پد آھانی وانینگ ءُ رودینگے زمہ واری منی سر ءَ کئیت اگاں مناں چیزے بہ بیت گڈا آئی زمہ دار کئے بیت؟ اگاں آ مرچی منی سر ءَ اُرش کُت کن انت گڈا باندا منی زھگانی سر ءَ ھم اُرش کُت کناں –

زھرہ بلوچ ءَ گوشتگ کہ من درسیں انسانی ھکانی ادارھاں گوشگ لوٹ آں کہ مئے کسے ءِ گون ءَ دژمنی نیست اِنت منی لوگواجہ، منی ناکو ءُ منی سر ءَ اُرش کنوک ریاستی ادارہ ءُ آھانی داشتگیں کُشندہ ٹولی انت – مناں اگاں منی چکاں چیزے بہ بیت گڈا اشی ءِ زمہ دار ریاستی ادارہ انت –

آئی ءَ دیمتر ءَ گوشتگ کہ منی ءُ منء زھگانی زند ءَ ھترہ انت من اھوالکار ءُ انسانی ھکانی ادارھاں دزبندی کناں کہ منی توار ءَ برزری تبک ءَ ننوکیں ھاکماں سرکنگے ھاتر ءَ منی کمک ءَ بہ کن انت تانکہ مئے گوم ءَ بوتگیں ناانساپی ءِ ازالہ کنگ بہ بیت –