بلوچستان ءِ دمگ ھُزدار ءَ ناشناسیں مردماں پاکستانی بیرک بھاکنوکیں اسٹال یے سر ءَ بمب اُرشے کتگ-
سربوتگیں ھالانی رِد ءَ ھُزدار ءِ بُنجاھی آزادی چوک ءِ سرءَ دستی بمب اُرش ءَ یک مردمے بیران وھدے کہ پنچ مردم ٹپی بوتگ اَنت- پولیس ءِ رِد ءَتراک پاکستانی بیرک بھاکنوکیں اسٹالءِ سر ءَ کنگ بوتگ-
نادُراھجاہ ءِ رِد ءَ تنی وھدے پنچ مردم گوں ٹپی ئیں جاوراں آرگ بوتگ اَنت کہ آیانی تہ ءَ دو مردم جاور نگیگ بوتگ اَنت ءُ چریشاں یکے بیرانبوتگ-
وئیل ءَ پد اُرشکار تچگ ءَ سوبمند بوتگ اَنت وھدے کہ پوج ءَ دمگ انگیر ءَ کتگ ءُ اُرشکارانی پٹ ءُ پول بندات کتگ-
گوستگیں شپ ءَ نوشکی ءِ شھر ءَ یک تراکے ءِ آسر ءَ ھم سے مردم ٹپی بوتگ اَنت کہ آیانی جاور نگیگی ءَ چہ ڈن بوتگ اَنت-
زانگ بہ بیت اشی ءَ ساری بیرک بھاکنوکانی سر ءَ بوتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ اَنت بلے اےدوئیں اُرشانی زمہ واری انگت ھچ گل ءَ نہ زرتگ اَنت-