سروزیر ءِ بنکی ھنکین ءَ مھلوک ءِ زھرشانی

مروچی یکشمبے ءِ روچ ءَ بلوچستان ءِ سروزیر قدوس بزنجو ءِ بنکی ھنکین جاؤ ءَ مھلوک پہ زھرشانی ءَ دراتکگ انت –

مھلوک ءَ ھمے زوتاں ھئور ھاراں برتگیں مردمانی ھاتر ءَ کمکی کارانی تہ ءَ نزوری ءُ وتی من پسند ءِ مردمانی کمک کنگے بگیری ءَ زھرشانی کُتگ –

دی بلوچستان پتر ءَ سربوتگیں ھالانی رِد ءَ زھرشانی ءَ ھواریں زھگ ءُ زالبولاں کراچی تاں آواران ءِ شھدگ بند کُرتگ ءُ چریشی ءَ روگ ءُ آھگے در بند بوتگ انت –

درنگاز کنوکاں دمگی کارگس جاؤ وتی انگیرءَ کُتگ ءُ ھمے لوٹ کتگ کہ سر وزیر وتی دمگ ءِ ترءُ تاب ءَ بہ کنت ءُ مھلوک ءَ کمک بہ کنت –

آھانی گوشگ ات کہ سروزیر ءِ بنکی ھنکین ءِ دگ، کشار، مال ءُ دلوت ءُ گس ھاراں برتگ انت –

گوستگیں شش ھپتگ بیت انت کہ آواران مھلوک بازیں اڈوجنجالانی دیمپان انت بلے بلوچستان ءِ سر وزیر ھنگت آواران ءَ سر نہ بوتگ –

درنگاز کنوکانی گوشگ ات کہ آ بہ ایت وتی مردمانی درد ءُ رنجاں گوش بہ داریت ءُ آھانی کمک ءَ بہ کنت –

آھانی گوشگ ات کہ لھتے وتی من پسندیں مردماں کمک دیگ ناانساپی یے – ادا دھکانکارانی کشار تباہ بوتگ انت درسیں تاوانانی شریں وڈی ءَ پٹ پول کنگ بہ بیت ءُ مردم کمک کنگ بہ بنت –