روکپتی بلوچستان: چار کس پاھو دیگ بیتگ اَنت

روکپتی بلوچستان ءَ ایرانی آمیدگس ءِ پرمان ءَ چار کس پاھو دیگ بیتگ اَنت –

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ یک کسے ءُ اوگان سیمسراں ھواریں دمگ زابل ءَ سَے مردم ایرانی آمیدگس ءِ پرمان ءَ پاھو دیگ بیتگ اَنت-

گیشیں ھالانی رد ءَ روکپتی بلوچستان ءِ بنجاھی شھر زاھدان ءَ شوکت شاہ بکش ء عبدالحکیم گلچاہ زاھدان پاھو دیگ بیتگ –

ھالانی تہ ءَ گوشگ بیتگ کہ شوکت شاہ بکش ایرانی آمیدگس ءَ ایرانی سال نود ءُ پنچ ءَ دزگیر کتگ ءُ برتگ ءُ اے سالاں بندیگ بیگ ءَ پد مروچی آ پاھو دیگ بیتگ ءُ آئی ءِ لاش کھول ءِ ھوالگ ءَ کنگ بیتگ-

ایرانی آمیدگس ءَ نشہ باپار ءَ شوکت شاہ بخش گپتگ بیتگ ءُ چریشی ءَ پد آئی ءِ گپ آمیدگساں سر بیتگ ءُ اود ءَ آئی ءِ سر ءَ پاھو اتکگ –

ھمے وڑ اوگان سیمسراں ھواریں دمگ زابل ءَ ھم سَے کس پاھو دیگ بیتگ اَنت-

زابل ءَ پاھو دیگ بیتگیں مردمانی پجار فرھاد کوھکم ء شیرجان، حمید جھانگیر، داوود امیرزادہ ءِ ناماں زانگ بیتگ اَنت ھر سئیں ایرانی آمیدگس ءَ نشہ ءِ باپاری ءَ پاھو داتگ اَنت-

روکپتی بلوچستان ءَ بازین کچے ءَ مردمانی پاھو دیگ ءِ درچ یکشل ءَ برجاہ اَنت ءُ انسانی ھکانی ادارہ یکشل ءَ اے وڑیں وئیلاں ایر جنگ ءُ گوشگ ءَ اَنت کہ ایرانی آمیدگس مردماں وتی سپائی کنگ ءِ موکل ءَ نہ دنت ابید چریشی ءَ آیاں پاھو دیگ اِنت-