پاکستان دنیا ءَ بلیک میل ءُ کنگ ءُ وتی زوراکی برجاہ داشتگ انت – ماما قدیر بلوچ

شال پریس کلب ءِ دیما بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ مروچی چار ھزار ءُ ھپسد روچ سرجم بوتگ انت – مروچی چہ مچ بولان ءَ سیاسی ءُ چاگردی باسک دین محمد بلوچ ، جاوید بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ وی بی ایم پی ءِ رھشون ماما قدیر بلوچ ءَ اتکگیں مردمانی دیم ءَ تران کنان ءَ گوشتگ کہ ائید ءِ روچ ءَ مھکمیں وڑی ءَ پُرایمنیں زھرشانی کتگ ءُ زورانسری آوارجنیانی روچ داشتگ، زورانسری آوار جنی سنگینیں جُرمے ءُ میاں استمان ءِ چارٹر ءُ انسانی ھکانی بگیری دارگے، دومی نیمگ ءَ پاکستان میاں استمان ءَ بلیک میل کنگ ءَ انت ءُ وتی زوراکیاں گوں بلوچ ءِ چکچینی ءَ کنگ ءَ انت –

آئی ءَ گوشتگ پاکستان ءِ چیریں ادارہ ھمک روچ زورانسری آوار جنگ بوتگیں مردماں وتی زندانانی تہ ءَ سک باز لٹ ءُ کُٹ کنگ ءَ انت آھاں شھید کنگ ءَ انت ءُ پدا آھانی زانگولیں جوناں ویرانگاں چگل دیگ انت – سال دوھزار یک ءَ بگر تاں روچ مروچی ھزارانی کچ ءَ بلوچ پرزند چیریں ادارہ، سی ٹی ڈی ءُ ایف سی ءَ سر بازار ، گاڑیانی تہ ءَ زانشجاھانی تہ ءَ آوار جتگ ءُ بیگواہ کتگ انت ءُ اے درچ ھمک روچ برجاہ انت کہ اشانی تہ ءَ کماش ءُ زالبولانی ھم مزنیں کچے ھوار انت – سال دوھزار یک ءَ بگر تاں روچ مروچی بیست ھزار ءَ گیش بندیگانی زانگولیں جون دست کپتگ انت ءُ ایمنسٹء انٹرنیشنل اقوام ءَ ھم اے من اِتگ انت –

ماما قدیر بلوچ ءَ گوشتگ کہ پاکستان ءِ واکدار چیریں ادارھانی کتکاریانی چیر دیگے ھاتر ءَ میاں استمان چماں ھاک مان کنگے جھد انت – اے جاورھالاں اقوام متحدہ کمیشن پاکستان ءِ بگیری ءَ بیدے دلپدردی درشاناں دگہ ھچ وڈیں گامگیج زورگ نہ انت – زورانسری آوار جنگ بوتگیں مردمانی کھولانی چاردہ سالی زھرشانی بنجل ءَ مان نیارگ وت میاں استمان ءِ چارٹرے بگیری یے –