بلوچستان ءِ سرکار ءَ کرنل لئیق ءِ مرگ ءِ ھال راست کتگ

سرکاری تکاں اے گپ بیگ ءَ اِنت کہ گوستگیں روچاں زیارت ءَ آوار جنگ بیتگیں پاکستانی پوج کرنل لئیق کُشگ بیتگ – بیرانی ءِ ھال سروزیر بلوچستان، مشیر برائے داکلہ ءُ دگہ سرکاری تکاں بیگ ءَ اِنت – ھالانی تہ ءَ گوشگ بیگ ءَ اِنت بلوچستان ءِ دمگ زیارت ءَ آوار جنگ بیتگیں آرمی ءِ آفیسر کرنل لئیق ءِ جون مانگی ڈیم ءِ نزیک ءَ دزکپتگ-

زانگ بہ بیت کرنل لئیق گوں وتی ھمراہ ءَ گوستگیں روچاں زیارت ءِ دمگ ورچوم ءَ آوار جنگ بیتگ اَت ءُ آئی ءِ ھمراہ انگت ءَ بیگواہ اِنت-

کرنل ءِ آوار جنگ ءِ زمہ واری بلوچ لبریشن آرمی ءَ منّ اتگ اَت – گل ءِ نیمگ ءَ رسانکدراں کسانیں دیم داتگیں کسانیں درشانے ءِ تہ ءَ بی ایل اے ءِ جارکش جیئند بلوچ ءَ گشتگ اَت کہ پاکستانی پوج ءِ کرنل لئیق بیگ مرزا بی ایل اے ءِ گور ءَ اِنت – جیئند بلوچ ءِ رد ءَ کرنل لئیق بی ایل اے اسپیشل فورس ٹیکٹیکل آپریشنز اسکواڈ ءَ یک چیریں ھالے ءِ رد ءَ دوازدہ جولائی ءَ دزگیر کتگ –

بلے تنی وھدی مرگ ءِ ھال راست یا رد بی ایل اے ءَ نہ کتگ اَت-

اے فوجی آفیسر ڈی ایچ اے شال ءَ بندوک بیتگ ءُ کرنل لئیق بیگ مرزا ءُ آئی ءِ ھمراہ سَے شمبے ءِ بیگاہ ءَ زیارت ءَ بیست کلومیٹر دور ورچوم ءَ ناشناسیں مردماں ھما وھد ءَ دزگیر کتگ اَت وتی کھول ءِ دگہ مردمانی ھمراھی ءَ شال ءَ سواد جاہ زیارت ءَ روگ ءَ بیتگ-

آوار جنگ ءَ پد بازیں کچے ءَ پوجی لشکر کشی بندات کنگ بیتگ اَنت چریشی ءَ پوج ءِ کوئک رسپانس فورس گچینی بھر زورگ ءَ اِنت-

دمگی مردمانی رد ءَ آوار جنوک ھرنائی ءِ دمگ شاھرگ ءِ نیمگ ءَ روگ ءَ بیتگ اَنت بلے پوج ءَ سرجمیں دمگ انگیر کتگ اَنت شپ ءَ کوھی دمگاں پوج ءِ گون ءَ تیرگواری ءِ درچ ھم برجاہ بیتگ اَنت ءُ لیفٹینٹ کرنل لئیق ءِ لاش ھیلی کاپٹر ءِ سر ءَ شال ءَ سر کنگ بیتگ-