مالک ترین ءَ وائس چانسلر کنگ ءِ سوب ءَ پنجگور شھدربرجاہ بند

مکران شھدربرجاہ ءِ وائس چانسلر جیڑہ گیش ءُ گیوار نہ بوتگ، نودربرانی زھرشانی برجاہ –

مکران شھدربرجاہ پنجگور ءِ نوکیں وائس چانسلر ءِ جیڑہ ءِ سر ءَ نودربرانی زھرشانی برجاہ انت – زھرشانی کنوکاں شھدربرجاہ کُبل کُتگ ءُ بنجاھی گیٹ ءِ دیم ءَ بنجل جتگ ءُ زھرشانی ءَ انت – نودربرانی گوشگ انت کہ مکران شھدربر جاہ ءَ نوکیں وائس چانسلر مالک ترین ءَ ھچ وڑ ءَ نہ منّ ایں کہ آ وی سی بہ بیت –

زھرشانی کنوکانی گوشگ انت کہ آمدگس وی سی اسٹے آرڈر ءِ سر ءَ چمشانک ءِ بہ دنت – عبدالمالک ترین پہ وی سی ءِ ھاتر ءَ مارا ھچ وڑ ءَ کبول نہ اِنت – ما وتی زانشجاہ ءَ ھچبر چشیں مردمے ءِ دست ءَ نہ دے ایں کہ آ ناگیگ ءُ پولینگی بہ بیت-

نودربراں گوشتگ کہ اے وائس چانسلر ءِ لورلائی شھدربرجاہ ءَ جوانین کردے نہ بوتگ کہ گوستگیں سال ءَ شش اکتوبر دوھزار ءُ بیست ءُ یک ءَ شھدربرجاہ ءِ پرو وائس چانسلر اگدہ ءَ ماٹو کنگ بوتگ ھمے ھاتر ءَ کہ اشی ءِ کرد جوان نبوتگ اے آئی ءِ کتگین کارانی گواہ انت اے وڑیں ناسرپدیں مردمے ءَ پنجگور ءِ نودربرانی سر ءَ مُشت نہ کنیں –

زھرشانی کنوکاں گوشتگ کہ اے وائس چانسلر پہ مکران شھدربرجاہ ءَ ھچ وڑ ءَ منگ نہ بیت پرچاکہ اے زانشجاہ ءِ ھاتر ءَ ادے مھلوک، نودربر، زانتکار ءُ راج ءِ نمائندگان دیمھونی داتگ ھمے ھاتر ءَ ما اے ادارہ ءِ تہ ءَ ھچ چُشیں مردم نیل ایں کہ آئی کردار پیش ءَ چہ ھراب بہ بنت کہ اشی ءَ پیش ءَ ھم بازیں نودربرے ترسینتگ –

آھاں گوشتگ کہ پہ مئے ھاتر ءَ مئے شرتریں چیز وانگ انت بلے مارا لاچار کنگ بوگ ءَ انت کہ دگانی سر ءَ بیا ایں ءُ زھرشانی بہ کنیں –