حق دو تحریک ءِ سروک مولانا ھدایت الرحمن ءَ ٹاہ داتگ کہ گوادر ءِ جھمنندیں بیگواھیں جنید اللہ بخش پاکستانی لشکریاں بندیگ جاھانی تہءَ کُشتگ ءُ آئی لاش ھم کھول ءِ دست ءَ دیگ نہ بیتگ۔
بلوچستان ءِ زرباری شھر گوادر ءِ جھمنند جنید بلوچ ء اللہ بخش 12 اکتوبر 2012 ءَ چہ اوتھل زیرو پوائنٹ ءَ زورانسری بیگواھی ءِ آماچ کنگ بیتگ۔
مولانا ھدایت الرحمن ءَ اے گپ پاکستانی سر وزیر شھباز شریف ءِ مروچی گوادر تروتاب ءِ وھد ءَ آئی راھسرءَ داتگیں نندانک جاہ ءَ چہ رسانکدرءَ تران کنان ءَ گُشتگ۔ آئی ءَ گُشتگ کہ مارءَ چہ تھی اھوالاں سرپدی رستگ کہ جنید اللہ بخش کہ گوستگیں بازیں سالاں چہ بیگواہ اِنت آ آزار جاھانی تہءَ کُشگ بیتگ ءُ آئی لاش ھم کھول ءَ دیگ نہ بیتگ۔
یات بہ بیت پاکستانی سر وزیر شھباز شریف مروچی گوادر ءِ تروتاب آیگی اِنت ھما وھدءَ دومی نیمگ ءَ گوادر ءِ مھلوک وتی لوٹانی حق ءَ آئی راھسرءَ زھرشانی نندانک داتگ اِش ءُ نشتگ اَنت۔
بلوچستان ءِ تیاب دپی شھر گوادر ءَ ھک دے تھریک ءِ سروک مولانا ھدایت الرحمان بلوچ، حسین واڈیلہ ءَ دمگی دریاوردانی ھمراھی ءَ آدینگ ءِ روچ ءَ پاکستانی وزیراعظم شھباز شریف ءِ گوادر ءِ تر ءُ تاب ءِ درگت ءِ سر ءَ زھرشانی ءِ جار جتگ ءُ گْوشتگ کہ گوادر پورٹ ءِ دیم ءَ وزیراعظم ءِ گھگیری وش آتک کنگ بیت، آیانی گْوشگ اِنت کہ ھزارانی ماتانی تاسپیں بچّ بیگواہ اَنت مردم گرانبھائی ءَ چہ دلسیاہ اَنت، سیمسری باپاری ءِ بند ءُ پھازوکی لشکر ءِ رویشگ تہ ءَ مٹی نیتکگ۔
گوستگیں روچاں مولانا ھدایت الرحمن ءَ گُشتگ اَت کہ گوادر، مکران ءُ بلوچستان ءِ جیڑہ یکشل ءَ ڈالچار کنگ بئیگ ءُ بیگواھیں مردمانی یل نہ بیگ ءِ سرءَ حق دو تحریک سر وزیر پاکستان شھبار شریف ءِ تروتاب ءِ وھدءَ 24 جون آدینگ ءِ سھب ادار 11 ءَ پورٹ دگ ءِ سرءَ زھرشانی کنت، سروزیر ءِ گھگیریں وش آتک بیت اِنت آئی ءَ درستیں مھلوک ءَ چہ بھر زیرگ ءِ گُشتگ اَت۔
آئی ءَ گُشتگ کہ بنجاھی ءُ پرگینگی سرکار ءِ نیمگ ءَ بلوچستان ءِ جیڑہ یکشل ءَ ڈالچار کنگ بئیگ ءَ اَنت۔ گوادر ءُ مکران ءِ جیڑہ گیوار بیگ ءَ نہ اَنت۔ مزنیں واکدار وتی تروتابانی تہءَ تھنا ھاسیں تک ءَ گوں نیاد کن اَنت، ھمیشی سوب ءَ لس مھلوک ءِ ھقیگیں بُنکی جیڑھانی سرءَ پاد پِر دیگ بیگ ءَ اِنت۔