گوریچانی وزیرستان ءَ پاکستانی پوج ءِ سر ءَ اُرش، سَے کارندہ بیران

پاکستانی سیمسری دمگ گوریچانی وزیرستان ءَ سلاہ بندیں مردمانی نیمگ ءَ پاکستانی پوج ءِ سر ءَ اُرش، سَے کارندہ بیران بیتگ اَنت-

پاکستانی اُرد ءِ جارکش ءَ ٹاہ داتگ پاکستان اوگانستان ءِ سیمسراں ھواریں دمگ وزیرستان ءِ دمگ دیواگر ءَ پاکستانی پوج ءِ کارندھانی سر ءَ سلاہ بندیں مردماں سیمسر ءَ گوستگ ءُ تیرگواری اش کتگ چریشی ءَ پوجی کارندھانی نیمگ ءَ پسھی اُرش بیتگ-

آئی ایس پی آر ءَ ٹاہ داتگ سلاہ بندانی تیرگواری ءَ پاکستانی پوج ءِ سَے کارندہ بیران بیتگ اَنت-

آئی ایس پی آر ءِ رد ءَ بیران بیتگیں کارندھانی تہ ءَ ھوالدار تیمور، نائیک شعیب ءُ سپاھی ثاقب نواز ھوار اَنت-

زانگ بہ بیت تحریک طالبان پاکستان ءَ رمزان ءِ ماہ ءِ بندات ءَ “البدر ” ءِ نام ءَ بیڑ برگ ءِ جار جتگ اَت چریشی ءَ وزیرستان ءَ ھوار پاکستان ءِ دگہ جاھاں ٹی ٹی پی ءِ اُرشانی تہ ءَ گیشی اتکگ –

پَٹ ءُ پولی ادارہ سینٹر فار ریسرچ اینڈ سیکورٹی اسٹڈیز ءَ یک گوستگیں رپورٹے ءَ گوستگیں سال ءَ سَے ماھانی دیمپانی ءَ ھمے سال ءِ سَے ماھانی تہ ءَ ناشرکاری ءِ وئیلانی تہ ءَ یک سد ءُ ھپتاد ءُ سَے درسد گیشی اتکگ –

ٹکداری جاھاں ناشرکاری ءِ وئیلانی گیش بیگ ءِ ھواری ءَ پختونخواہ ءِ دگہ جاھاں ھم تیرگواری ءُ بمب تراکانی گیشی گندگ ءَ اتکگ اَنت گوشگ بیرگ اے وھداں پولیس، پوج ءُ ایکسائز اینڈ ٹیکسیشن ءِ کارندھاں ھوار نیم پوجی کارندہ ھم نشانگ کنگ بیتگ اَنت-