نِمدی یے پہ کمانڈر شھید ھالد ھیدر ءَ
نبشتہ کار : مھروان راجی
دی بلوچستان پوسٹ
دیدگیں ھالد جان اگاں ترا یادیں ھما شپ ءَ کہ ما شما نِھنگ ءِ کور ءَ اِتیں سنگتاں یکّے دومیگ ءَ گوں سک باز بھیس بازی کُت (چار 4) ادارہ گیش گڑا تو بچکند اِت ءُ گوشت مھروان من ءُ تو بریں روئیں بُرز ءَ بانڈُم ءَ گاٹ ءَ چوش کہ من سنگتانی وڑ ءَ گنداں اے یا وَ انشپی بلوچستان ءَ آجو کن اَنت اگاں نہ گڑا الم رسترے چریکاں ھال دے اَنت کہ ما پلاں کور ءَ نشتگ اِنت من کندگے جت ءُ گوشت راست گُشے بیبگر چوش کہ سنگتاں گِنداں ھمے وڑ گندگ ءَ آیگ ءَ اِنت، سنگت انگت گیش گپ جنا اِت اَنت من ءُ تو دیم پہ بانڈُم روان اِتیں بیبگر اگاں تو یادے گڑا اے شپ ءَ سک سرد اَت، من ءُ تو شُت ایں بانڈُم ءِ سر ءَ من ءَ نا چادر گون اَت ءُ نا کہ جرسی گور ءَ اَت گڑا تو وتی چادر من ءَ دات کہ تو کسترے ترا سرد کنت، من مڑاہ کُت ءُ گوشت من ءَ سرد کنگ ءَ نہ اِنت بلے تو بچکند اِت ءُ گوشت من زاناں تو نوجوانے ترا سرد نہ کنت بلے اے چادر ءَ بزیر وتی جان ءَ پتا، تو گوشت من ءَ کوٹے گوار ءَ اِنت من ءَ اینچو سرد نہ کنت، تئی مھروانی چو بام ءِ داتگیں رُژنائی ءَ زاھر اَت، بلے مرچی ترا ما ھال دیگ لوٹ آں ھالد جان آ شپی من ءَ سک سرد کنگ ءَ اَت منی بلوچی مڑاہ اِتاں کہ من چادرے زیرگ ءَ انان کُت من چار اِت چادر یکّے اگاں من بزیراں ترا سرد کنت، من آ وھد ءَ اے چیز ءَ زنگ ءَ نہ اِت اَنت ءُ من نزانت کہ ترا چہ وت ءَ گیش سنگتانی پکر اِنت کہ تو کمانڈری ءَ اَبید سنگتاں ھچ نگوشت ءُ اتک ئے منی گوم ءَ گاٹ داشت ھالاں کہ ترا ھپتگے بیتگ اَت چہ سیاجی ءَ اتکگ اِت ئے سک ژند اِت ئے بلے زمین ءِ مھر ءُ سنگتانی پکر ءَ ترا مُدام مئے میان ءَ ساڑی کُتگ اَت تو لوگ ءَ کم ءُ مئے کرا گیش وھد گوازینت آ ھمے چیز اَت کہ تو گوں سنگتاں مُدام کند اِت ءُ مزاک کُت ھچ سنگت گوں وت ءَ دل گران نہ کُت من تئی ھمے شرّیانی شیدا اِتاں ءُ من دربرگ ءَ اِتاں کہ یک زمین زادگے ءَ چینچو وت ءَ مھروان کنگی اِنت چِد ءُ پیش من بس تئی نام اِش کُتگ اَت بلے تئی کرّا آیگ ءَ رَند من ءَ گُمان بیت کہ تئی زمین ءَ گوں اِشک، سنگتاں گوں مھر، ءُ وتی منزل پہ سر بیگ ءِ جنون، سنگتاں باز کم بیان کُتگ اَت، سک باز درس ھالد جان چہ تئی کتاب ءَ در بُرت، تئی داتگیں یک یک پنتے چو کوہ ءِ البرز ءَ انگت منی سینگ ءَ نکش اِنت-
دیدگیں ھالد جان ترا ھال دیگ لوٹ آں اے وھد ءَ کہ من ترا پہ نِمدی ءَ نبشتہ کنگ ءَ آں شپ ءِ ادارہ 2 اِنت ھما کور اِنت، سنگت اَنت، بھیس اِنت، من ھما جاگہ ءَ نشتگاں کہ من ءُ تو شُت اِیں نشت اِیں، ھما بانڈُم اِنت بلے اے رند ءَ منی کرا کس نہ نِشتگ من ایوک ءَ آں، سرد نہ اِنت پرچا کہ گرماگ اِنت من ءَ چادر ھم گون نیست منی گوانکوئے لیٹ ءَ درستیں سُنٹوئیں مکِسک ھمد ءَ آرتگ ءُ جمہ کتگ اَنت من ءَ سک ورگ ءَ اَنت، ھالد جان دریگتیں تو گون بتینے تو من ءَ سرکل داتگ اَت من گوش داشتگ اَت مرچی رمس 18 اپریل 2022 اِنت،مرچیگ ءَ چہ یک سالے پیسر 18 اپریلے شپ اَت من تو ھمے جاگہ ءَ گاٹ ءَ اِتیں تو من ءَ سرکل دیگ ءَ اِت ئے من کند اِت ءُ گوشت بیبگر اگاں من انی سنگتانی نیمگ ءَ تیرے بہ جن آں تئی ھیال ءَ سنگتانی بھیس کجام نیمگ ءَ روت ،؟ تو ھاھاھا کند اِت ءُ گوشت سنگتاں بل آ اے وھد ءَ بلوچستان ءِ آجو کنگ ءِ نزیک ءَ رس اتگ اَنت آہ ھالد جان گُشے مرچی ھم تئی کندگانی توار اِنت بلے تو اد ءَ نہ ئے ۔شھیدی مُراد بات ترا ارواہ-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔