دستونک
شائر : سلیم ناز
دی بلوچستان پوسٹ
رَهن بَنت مئے میتگ ءِ دیوال ءُ دَر
زُلم ءُ زوراکی نہ مان اِیت داں َاَسر
ڈنک جتگ آستونکے مارا نیست گِلگ
لگتگ پاد ءَ وتی جند ءِ تَپر
زات ءُ زریات، برات کشی کد گار بیت
زانت ءُ رژن ءِ نوک بیت باریں سَپر
گَل مبو پہ برات ءِ کوش ءَ زّر هرید
تئی دپ ءَ گاجیل بَنت وشیں هَبر
راج ءِ بدواه جُهد ءِ بداه گوشبدار
پُلگدیں ماتانی تَل کُت تو جَگر
روچے در کیت پہ بلوچ ءَ راج ءَ زرور
اُوست ءِ درچک سبز اِیت سرکیل بیت سَبر
بیرکے دوچاں پہ تئی سالونکی ءَ
مان پوشاں مانش ءَ من تئی دوبر