لوگ واجہ بے جرم ءَ بندیگجاھاں بندیگ کنگ بیتگ- نرگس بلوچ

زورانسری آوار جنی ءِ نشانگ بوتگیں فیاض سرپرہ ءِ لوگ بانُک نرگس بلوچ ءَ وتی لوگ واجہ ءِ یل کنائینگ ءِ لوٹ کتگ-

شال ءِ نندوکیں نرگس بلوچ ءَ گْوشتگ کہ پاکستانی پوج ءِ کارندھاں آئی ءِ لوگ ءَ بیڑبرتگ ءُ وتی ھمراھی ء منی کسان سالیں زھگ ءِ پت گوں وت برتگ- نرگس بلوچ ءِ رِد ءَ پوجی کارندھاں آئی ءَ را گوشتگ ئے کہ تئی لوگ واجہ ءَ جُست پُرس ءَ پد یل کن ایں-

بیگواھیں فیاض بلوچ ءِ لوگ بانُک ءَ گوشتگ کہ منی لوگ واجہ پاکستانی پوج ءِ کارندھاں منی دیم ءَ زورانسری آوار جتگ چریشی ءَ پد فیاض ءِ درگت ءَ ھچ وڑیں ھال ءُ اھوال دست نہ کپتگ کہ آ کجا اِنت کجام جرم ءَ چہ پاکستانی پوج ءَ چست کتگ ءُ بندیگجاھاں بندیگ کتگ-

نرگس بلوچ ءَ جھانی انسانی ھکّانی ادارھاں ھوار بلوچستان ھکومت ءَ چہ فیاض سرپرہ ءِ دیم آرگ ءُ پہ سلامتی یل کنائینگ ءِ لوٹ کتگ-

زانگ بہ بیت فیاض سرپراہ گوستگیں سال ءَ 30 اگست چہ شال ءَ پاکستانی پوج ءَ آئی ءِ لوگ ءَ چہ آوار جتگ ءُ تنی وھدے آ دیم ءَ آرگ نہ بوتگ-

فیاض بلوچ ءِ زورانسری آوار جنی ءِ بگیری ءَ مروچی بلوچ سوشل میڈیا ایکٹویسٹس ءِ نیمگ ءَ چہ ٹوئیٹر کیمپئن برجم دارگ بوگ ءَ اِنت وھدے کہ سیاسی ءُ انسانی ھکانی باسک فیاض بلوچ ءَ ھوار دگہ بیگواھیں مردمانی پہ سلامتی درکنگ ءِ لوٹ کتگ-