بلوچستان ءَ پوج انسانی ھکانی لگتمالی ءَ ھوار اِنت – عبداللہ عباس

جرمنی ءَ شمبے ءِ روچ ءَ یونیورسٹی آف بون ءَ ایمنسٹی انٹرنیشنل ءِ چیردستی ءَ یک نیادے برجم دارگ بیتگ – اے نیاد ءَ ہیومن رائٹس کونسل آف بلوچستان ءَ سیادی داروکیں عبداللہ عباس بلوچ ءَ وتی ھیال ءُ لیکہ درشان کنان ءَ گشتگ اَر بلوچستان ءَ زورانسری آوار جنی، انسانی ھکانی ناگیگیں لگتمالیاں پاکستانی پوج ءُ آئی ءِ چیریں ادارہ دزمانجن اَنت-

عبداللہ عباس ءَ گوشتگ اَت پاکستانی پوج سیاسی باسکانی آوار جنگ ءَ دزمانجن اِنت بلے اشی ءَ ابید ھم پاکستان یورپی یونین جی ایس پی پلس ءُ ہیومن رائٹس کونسلے باسک اِنت-

عبداللہ عباس ءَ گوشتگ اَت پاکستان وتی جنگء ساز ءُ ساماناں یورپی ڈیھاں زوت ایت –

آئی ءَ گُشتگ اَت اگاں یورپی ڈیھ انسانی ھکانی جرائماں داشت نہ کن اَنت گڑا وتی سلاھاں پاکستان ءَ مہ دے اَنت ءُ دانکہ اے پوج کشی ءِ بھر جوڑ مہ بنت-

عبداللہ عباس ءَ گوشتگ اَت پاکستانی پوج بلوچستان ءَ ناگیگیں انسانی ھکانی لگتمالی ءَ دزمانجن اِنت سیاسی باسکاں ھوار دگہ پھناتاں بندوکیں مردماں سیاسی بندوکی ءَ بیگواہ کنگ ءَ اَنت-

آئی ءَ گُشتگ خلیجی ڈیھ عرب امارات ءَ بلوچ باسکانی دزگیری کنگ ءُ پاکستان ءِ دست ءَ دیگ ءَ اَنت-

آئی ءَ وتی تران ءَ حفءظ زھری ءِ بارو ءَ گپ کنان ءَ گوشتگ کہ ھمے سال ءِ جنوری ءَ گیر کانونی رنگ ءَ چہ دبئی ءَ دزگیر کنگ بیتگ ءُ پاکستان ءِ دست ءَ بیتگ –

آئی ءَ گُشتگ کہ گوستگیں دو ماھاں چہ بلوچستان ءَ یک سد ءُ شست ءُ پنچ مردم زورانسری آوار جنی ءِ آماچ کنگ بیتگ اَنت ءُ یک سد ءُ یازدہ مردم کُشگ بیتگ اَنت-

عبداللہ عباس ءَ نیاد ءَ بلوچستان ءَ انیگیں جاورانی سر ءَ وتی لیکہ درشان کتگ اَنت-

عبداللہ عباس ءِ سیادی ہیومن رائٹس کونسل آف بلوچستان ءَ اِنت کہ بلوچستان ءَ انسانی ھکانی پادمالی ءَ سر ءَ ماھی ھالاں شنگ کنت-