بلوچستان ءِ باپاری شھر حب چوکی ءَ چہ زورانسری بیگواھی ءِ دو وئیل دیما اتکگ اَنت کہ اِشانی تہءَ یک انچیں مردمے ھم ھوار اِنت کہ آئی پِت یازدہ سال پیش لشکریاں بیگواہ کُتگ ءُ داں انگت بیگواہ اِنت۔
بیگواہ بیوکیں مردمانی پجار اسد بگٹی ءُ فتح ء زباد ءِ ناماں چہ بیتگ۔
اھوالکارانی ردءَ زورانسری بیگواھی ءِ آماچ بیتگیں اسد بلوچ ءِ پِت یازدہ سال پیش لشکریاں دزگیر کنگ ءَ پد بیگواہ کُتگ کہ داں انگت بیگواہ اِنت وھدیکہ گوستگیں روچاں حب چوکی ءِ نذر چورنگی ءَ چہ آئی زھگ اسد بگٹی ھم زورانسری بیگواھی ءِ آماچ کنگ بیتگ۔
بیگواھیں مردمانی یل کنائینگ ءِ ھاترءَ جھد کنوکیں گل وائس فار بلوچ مسنگ پرسنز ءَ ھمے مردمانی بیگواھی ءِ ھال راست کنانءَ گُشتگ کہ کھول ءِ ردءَ اسد اللہ بگٹی 28 مارچ ءَ حب ءَ ابید نمبر پلیٹیں ویگو گاڑی ءَ سواریں سلاہ بندیں مردماں بیگواہ کُتگ۔
گل ءِ ردءَ کھول ءَ مارا ھال داتگ کہ اسد بگٹی ءَ بیھار رسگ ءَ بیتگ اَنت کہ آ وتی بیگواھیں پِت ءِ کیس ءِ درگت ءَ ھاموش بہ بیت۔
دومی نیمگ ءَ ھال اِنت کہ چیریں ادارگانی کارمنداں چار مارچ ءَ فتح ء زباد زورانسری بیگواھی ءِ آماچ کُتگ۔ اھوالانی ردءَ بیگواھ بیتگیں مردم پوریا گر اِنت کہ بلے آئی بیگواہ کنوک آئی یل کنگ ءِ ھاترءَ پنچ لکھ ءِ لوٹ کنگ ءَ اَنت۔
زانگ بہ بیت بلوچستان ءَ چُشیں وئیل پیش ءَ ھم دیما اتکگ اَنت کہ آودہ لشکریاں ءُ چیریں گلانی کارمنداں بیگواھی ءَ پد زر ءِ لوٹ کنگ ءِ پئیم کتکاریانی تہءَ ھوار بیتگ اَنت۔