شال ءَ بیگواھیں مردمانی ھاتر ءَ زھرشانی برجاہ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ شش سد ءُ بیست ءُ دو روچ سرجم بوتگ انت – سیاسی ءُ چاگردی باسک حمل بلوچ، خادم بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ اقوام متحدہ ءِ جنرل اسمبلی کرارداد ءِ رِد ءَ زورانسری آوار جنی سنگینیں انسانی جُرمے، فوجداری ءِ کانودانی رِد ءَ آئی ءِ سزا ھم ھست اِنت، اقوام متحدہ ءِ انسانی ھکانی کمیشن ءِ کارکنوکیں ٹولیاں اشی ءِ سر ءَ درشان ھم داتگ کہ زورانسری آوار جنی تھنا جُرمے نہ انت بلکنہ انسانی ھکانی بگیری دارگے املے آ تُری ناشرکاری ءِ دارگے ھاتر ءَ بہ بیت، پاکستانی ریاست وتی ھکانی ھاتر ءَ توار چست کنوکیں بلوچاں زورانسری آوار جنگ ءُ بیگواہ کنگ ءَ اِنت ءُ آھاں ماورائے عدالت کُشگ ءَ اِنت کہ میاں استمانی انسانی ھکانی بگیری ءَ کنگ ءَ اِنت –

آئی ءَ دیمتر ءَ گوشتگ کہ پاکستان دنیائے چماں ھاک مان کنگ ءَ انت ءُ وڈ وڈیں ھُنر ھیلاں بلیک میل کنگ انت ءُ بلوچستان ءِ تہ ءَ زوراکی کنگے سرجمیں سیمسر سرگوز کرتگ انت، اے وھدی سرجمیں دنیائے تہ ءَ درساں گیش بلوچستان ءِ تہ ءَ مردم زورانسری آوار جنگ ءُ بیگواہ کنگ بوھگ انت کہ ریکارڈ ءِ تہ ءَ ھست انت – بلوچستان ءَ زورانسری آوار جنیانی تہ ءَ چُک ءُ زالبولانی ھم مزنیں کچ ءِ ھوار –