سربوتگیں ھالانی رِد ءَ بلوچستان ءِ دمگ وندر ءَ ناشناسیں سلاہ بندیں مردمانی تیرگواری ءَ یک مردمے زدگ بوتگ –
زدگ بوتگیں مردم ءِ پجار ملا ساول ء علی نام ءَ چہ بوتگ – اھوالکار ءِ رِد ءَ اے مرد ناشناسیں مردماں گوستگیں بیگاہ ءَ ھما وھد ءَ تیرباران کُرتگ کہ مگرب ءِ نماز ءَ مسیت ءَ رؤگ ءَ بوتگ –
اے درگت ءَ بلوچ نیشنل مومنٹ ءِ انفارمیشن سیکریٹری دلمراد بلوچ ءَ گوشتگ کہ اے مرد آواران ءِ دمگ جاؤ ءِ جاھمنند انت دلمراد بلوچ ءَ الزام جتگ گوشتگ کہ اے مرد پاکستانی پوج ءِ ھاتر ءَ کارکنوکاں نشانگ کرتگ –
دلمراد بلوچ ءِ رِد ءَ اے وھدی اے مرد کراچی ءَ نادراھجاہ ءَ مرگ ءُ زند ءِ میان ءَ زندگی کنگ ءَ اِنت – آئی ءَ گوشتگ کہ پاکستانی پوج ءَ اشی ءَ پیش ھم ساول ءِ کھول ءِ سَے ورنا کُشتگ ءُ بازیں مردمے آوار جتگ ءُ بیگواہ کتگ انت –
اھوالکار ءِ رِد ءَ ملا ساول جاؤ ءَ نندوک بوتگ بلے پنچ سال بیت کہ وندر ءَ جاھمنند انت – دمگی مردمانی رِد ءَ آئی ءِ ناکوزتک سراج احمد ء احمد ءُ خالق داد ء محمد عیسی شش اکتوبر سال دوھزار شانزدہ ءَ پاکستانی پوج ءَ لشکر کشی ءِ میان ءَ کُشتگ انت وھدیکہ آئی ءِ دگہ نزیکیں سیادے حاجی محمد موسی ء نزر محمد ھژدہ جون سال دوھزار شانزدہ ءَ پوج ءَ کُشتگ –