فیاض بلوچ ءِ زورانسری آوارجنی ءَ ھچ ادارہ ھک دیگ ءَ نہ انت – نرگس فیاض

زورانسر آوار جنگ بوتگیں فیاض علی ءِ لوگبانک نرگس فیاض ءَ مروچی شمبے ءِ روچ ءَ شال پریس کلب ءَ اھوالکاراں گوں تران کنان ءَ گوشتگ کہ ھنچیں چاگرد ءَ کہ اودا ءَ ھک لوٹگے درسیں در بند کنگ بہ بنت گڈا اودا ھک لوٹگے درسیں امیت بس اھوالکاراں گوں بندوک بنت – ھمے سوب انت کہ بلوچستان ءِ کنڈ کنڈ ءَ ھمک روچ ھک لوٹوک وزیر گزیر، جج یا پولیس ءِ گور ءَ نہ رونت بلکنہ شال پریس کلب ءَ وت ءَ سر کن انت – دراہ ھمے امیت ءَ گوں ادا کائینت کہ بوت کنت اھوالکاری ءِ پڑ ءَ بندوکیں راستیگیں اھوالکار ءِ آھانی دردانی توار جوڈ بہ بیت آئی ءِ توار ءَ زمواراں سر بہ کنت کہ اودا ءَ نزوریں توار سر نہ بیت انت –

آئی ءَ گوشتگ کہ مروچی من وتی گپاں شمے اھوالکارانی دیم ءَ جنگایاں اے نوکیں جیڑھے نہ انت بلکنہ بلوچستان ءِ ھر سیمی گِس ھمے زورانسری آوار جنی ءِ جیڑہ ءَ آماچ انت – بلوچستان ءَ زورانسری آوارجنی ءِ جیڑہ تول گران انت- زورانسری آوارجنی وڈیں گیر انسانی درچ ءَ منی لوگواجہ فیاض علی ء محمد اعظم ھم گون انت –

آئی ءِ گوشگ ات کہ منی لوگواجہ فیاض علی سال دوھزار بیست ءُ یک ءِ سِی اگست ءَ شپ ءِ ادار نُھ ءَ چہ فقیر آباد شال آوار جنگ بوتگ کہ لھتے ناشناسیں مردم مئے گِس ءِ تہ ءَ پُترتگ آھاں منی لوگواجہ جست پُرس ءِ نام ءَ گوں وت برتگ ءُ ھمے گوشتگ کہ دو ادار ءَ پد یل کن انت – آھاں ھمے گوشتگ کہ آ پاکستان ءِ چیریں ادارھانی کارمند انت ءُ آھاں فرنٹئیر کور ءِ سلاہ بندیں کارمند ھم وتی ھمراھی ءَ گون بوتگ –

آئی ءِ گوشگ ات کہ فیاض ھمے کارمنداں گوں وت برتگ کہ شش ماہ گوزگ ءَ پد مار ءَ آئی ءِ درگت ءَ ھچ گوشگ بوھگ ءَ نہ انت – بیست ءُ چار ادار ءِ گوزگ ءَ پد ما لوٹ اِتگ کہ ارزی ءَ نبشتہ بکنائینیں گڈا واکداراں مئے ارزی نبشتہ نہ کرتگ پہ زور سَے ماہ ءَ پد مئے ارزی پہ زور نبشتہ بوتگ – ما ضیاء لانگو ءَ ھوار ھوار ھچ چشیں در ءِ یل نہ داتگ کہ اودا فیاض ءِ بیگناھی ءِ پریات نہ برتگ – اپوزیشن لیڈر ءُ بلوچستان اسمبلی ءِ باسکانیءُ ھر یکے ءِ گور ءَ کہ ما شُت کُتگ وتی نزوریں توار سر کتگ بلے بید مایوسی ءَ مار ءَ دگہ ھچ نہ رستگ –

آئی ءَ گوشتگ کہ مروچی فیاض ءِ زورانسری آوار جنی ءَ شش ماہ پرگوستگ مئے زند اے ششیں ماھاں بندیگ جوڈ بوتگ شش ماہ من وتی شیرواریں چک ءِ ھمراھی چوں گوازینتگ کس اندازہ جت نہ کنت –

فیاض استما ءِ نادراھے ءُ ھما روچ ءَ آ برگ بوتگ آ وش وش نہ بوتگ – فیاض کیڈٹ کالج جعفرآباد نودربرے بوتگ انجینئرنگ ڈپلومہ کنگ ءَ پد آئی ءَ بیچلر ءِ ڈگری گپتگ، آئی ءَ باپاری کنگے شوک بوتگ ھمے وھد ءَ آئی پراپرٹی باپاری کنگی بوتگ منی لوگ واجہ ءَ گوں ھچ وڈیں سیاسی یا مزھبی گلاں سیادی نیست –

آئی ءَ گوشتگ کہ پاکستان ءِ رھبند مئے جان ءُ مالانی پھازگے باور کنائینیت بلے پہ مئے ھاتر ءَ ھچ وڈیں کانود رھبند کار گرگ نہ بنت – یک ماسومیں زھگ ءَ کہ اے وھدی وتی پت ءِ کُٹ ءَ گوازی کنگی ات آ چہ اے دراھیں جاورھالاں سرپد نہ انت کہ آئی پت ملک ءِ تاکتوراں کشان کتگ برتگ – فیاض ءِ ودار ءَ تنی وھدی آئی ءِ نام پر نہ کتگ – من شمار ءَ جست کنگ لوٹاں دنیائے تہ ءَ کجام ریاست اِنت کہ وتی مردماں بید جُرم ءَ سالانی سال بیگواہ بہ کنت؟ ریاست مات ءِ داب ءَ بیت گڈا پرچا پہ ما ماتو ئے –

آئی ءَ گوشتگ کہ من واکداراں جست کنگ لوٹاں کہ فیاض کجام جرم ءُ کانودانی رِد ءَ آوار جنگ بوتگ فیاض ءِ زورانسری آوار جنی ءَ مئے سرجمیں کھول ءِ زند ازاب ءِ تہ ءَ گوزگ انت گوستگیں شش ماہ انت کہ ما تانہ ءُ آمیدگساں چکر جنگ انت نوں مئے گور ءَ بید زھرشانی کنگ ءَ دگہ ھچ راہ ءُ در پش نہ کپتگ – مار ءَ لاچار کنگ بوھگ انت کہ زھرشانی بہ کنیں –

آئی ءَ گوشتگ کہ اے پریس کانفرنس ءَ ما بُرزی تبک ءِ ھاکماں گوشگ لوٹیں اے ناانساپی سر ءَ گامگیج بہ زور انت فیاض ءَ یل بہ کنائیناں اگاں آئی ءِ سر ءَ الزام ءِ ھست گڈا آمیدگس ءَ آرگ بہ بیت –

اے پریس کانفرنس ءَ بلوچستان ءَ زورانسری آوار جنگ بوتگیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءُ دگہ ھم ساڈی بوتگ انت –