اسلام آباد ءَ حفیظ بلوچ ءِ زورانسری آوار جنی احتشام ءِ بے کانودی کُشکاری ءِ بگیری ءَ زھرشانی کنگ بوتگ

پاکستان ءِ درالھکومت اسلام آباد ءَ یکشمبے ءِ روچ ءَ بلوچستان ءِ چہ سیادی داروکیں نودبراں وتی بیگواھیں سنگت حفیظ بلوچ ءِ زورانسری آوار جنی ءُ احتشام بلوچ ءِ بے کانودی کُشکاری ءِ بگیری ءَ روانک کشگ بوتگ ءُ زھرشانی کنگ بوتگ-

بلوچ اسٹوڈنٹس کونسل جار سر ءَ نودبرانی دستاں پلے کارڈز ، بینرز ءُ بیگواھیں نودربرانی اکس چست کتگ ءُ شھر ءِ دگاں روانک کش اِتگ ءُ نیشنل پریس کلب ءِ دیم ءَ زھرشانی کتگ ءُ زورانسری آوار جنیانی بگیری ءَ نارا جتگ-

قائداعظم شھدربرجاہ ءِ ایم فل ءِ نودربر حفیظ بلوچ ھمے ماہ ءَ چہ خضدار ءَ بیگواہ کنگ بیتگ وھدیکہ بین الاقوامی اسلامی شھدربرجاہ ءِ بی ایس مچی ءِ ساری ئیں سمسٹر ءِ نودربر احتشام بلوچ چوٹیانی گوازینگ ءَ وتی لوگ ءَ پنجگور ءَ شتگ کہ اود ءَ آ بیگواہ بوگ ءَ پد آئی ءِ تیرسُپتگیں لاش دستکپتگ- آئی ءِ ھمراہ ءُ بلوچ راج دوستاں آئی ءِ کوش ءِ بھتام پاکستانی چیریں ادراہ ءُ لشکر ءِ سر ءَ جتگ-

زھرشانی کنوکاں بلوچ نودربر ءِ زورانسری آوار جنی ءِ دْرچ بند کنگ ءُ گوشتگ کہ حفیظ بلوچ ءَ یل بہ کن اِت-

نودربراں گْوشتگ کہ ھرکسی ءِ مات پت وتی چکاں چُٹیاں لوگ ءَ لوٹائین اَنت- مئے مات پت منت کنگ ءَ اَنت ھدا ءَ بہ چار اِت لوگ ءَ میا اِت اگاں ناں تو ھم گار بیگواہ ءُ یا کُشگ بہ ئے-

آیاں گْوشتگ کہ چکاس برجاہ ءَ اِنت بلے وانگ وتی جاہ آ اے وھد ءَ اد ءَ زھرشانی کنگ ءَ اَنت-

نودربراں گْوشتگ کہ اے وھد ءَ ڈیھ ءِ جتا جتائیں شھراں وانوکیں نودربر تُرس ءِ آماچ اَنت، ءُ آیانی لوگانی مردم ھم پریشان اَنت-

نودربرانی گْوشگ اِنت کہ مارا وانگ ءَ بل اَنت تاکت ءُ تُپنگ ءِ زور ءِ سر ءَ نودربراں تُرسینگ ءِ دْرچ ءَ بند بہ کن اَنت ءُ بیگواھیں بلوچ نودربراں یل بہ کن اَنت آیاں وانینگ ءِ ھک دیگ بہ بیت –

زھرشانی ءَ قائد اعظم شھدربرجاہ ءِ گوستگیں استاد ءُ انسانی ھکانی باسک پرویز ھود ءُ پرازنہ باری ءَ ھم بھر زرتگ-