نبشتانک: بے ھُدائیں وتکُشی بالگیگ
دی سوئیسائیڈ ڈرون
نبشتہ کار : ڈاکٹر ابدلتیپ بلوچ
دی بلوچستان پوسٹ
یک کارے ءِ ٹھینگ گِران اِنت، بزان کہ کار ءِ پیلو کنگ ءَ جُھدے لوٹ ایت بلے کار ءِ ھراب کنگ سک آسان اِنت یک ماڑی یے بہ بیت یا توری یک کسانیں گِسے ھم بہ بیت آئی ءِ بندگ ءَ پنچ یا شش ماھے لگ ایت بلے ھمے ماڑی ءُ گِس ءِ تباہ کنگ ءَ یک ساھتے ھم نہ لگ ایت تھنا آس بہ دئے گُڑا آ ماڑی وت سُچ ایت ءُ پُر بیت یا بمب ئِے بہ جن پد ءَ وت تباہ بیت گِند ئے ماڑی ءُ گِسے ءِ بندگ ءَ لکھانی ھساب ءَ کلدار ھم ھرچ بنت بلے پہ آئی ءِ تباہ ءُ ھمپُسگ ءَ یک بمبے ءِ بھا لوٹ ایت ھمے داب ءَ پہ یک زورگِرے ءَ نزوریں ھمساھِگیں مُلکانی سر ءَ اُرش کنگ ءُ آ نزوریں راج ءِ ڈیھ ءِ سر ءَ کبزا کنگ وَ آسان انت بلے ھمے زورانسری ئیں کبزا ءِ برجاہ دارگ ءُ یک گیرتمندین ءُ زِندگیں راجے ءِ ایردست کنگ سک گِران اِنت وھدیکہ یک زِندگیں راجے یکمُشت بہ بیت ءُ پہ وتی بنی آدم بُندری لوٹ ، بزاں پہ وتی آزاتی ءُ راجی آجوئی ءِ جُھد ءَ سِلاھبندیں گھگیری بہ کنت گُڑا زورگِر توری ھر وڑ ءَ زوراک بہ بیت یک روچے الم پْروش وارت، یک روچے لازُم کیت ھمے ایردستیں راج آجو بیت بلے بَے ایش انت کہ راج وتی گلامی ءَ بہ مار ایت، راج ءِ تہ ءَ رجدوستی ءُ ڈیھ دوستی ءِ مارشت بہ بنت راج ءِ نودربر، کواس ءُ زانتکار بزگیں راج ءَ یکمُشت کنان ءَ راجی آجوئی ءِ سِلاھبندیں گھگیری گلاں کُمک بہ کن اَنت راج ءِ لس مھلوک ءَ ڈیھ ءِ سر ءَ بدیں دُژمن ءِ زورگِری، دود ءُ رواجانی لگتمالی ءُ گُلامی ءِ بابت ءَ سرپدی دیان ءَ آجوئی ءِ آشوب ءَ مھکم ءُ آجوئی ءِ جُھد ءَ برجاہ بہ دار اَنت گُڑا یک گلامیں راجے ءَ وتی جُھد ءِ برورد ءَ آجوئی الم رس ایت۔
چوناھا ماں چیرجنگاں مُدام زورگراں پْروش وارتگ چے ءَ کہ زورگر ایردستیں چاگِرد ءِ تہ ءَ کُشت ءُ کوش ءِ بدیں تُرسے دیان ءَ وتگڑیں ایمنی ودی کنگ ءِ جُھد کنت بلے اے زورانسری گلامیں راج ءِ تہ ءَ دُژمن ءِ ھلاپ ءَ گیشتر نپرت ودی کنت ءُ گھگیر دژمن ءِ ھمے وتگڑیں ایمنی ءَ کانچ ءِ داب ءَ پْروشین اَنت چوشکہ یک دو ھزار کلدار ءِ بمبے دو کروڈ کلدار ءِ ماڑی ءَ تباہ بنت بزاں ماں چیرجنگ ءَ دُژمن ءَ مُدام اناگتیں اُرشانی تُرس، بے آرامی ءُ تکانسری رس ایت۔
ھمے جنگی تاوان، کبزاگیری ءِ برجاہ دارگ ءِ ھرچ ءُ راجدوستانی سِلاھبندیں جُھدانی آسر ءَ 1955-75 ءَ امریکہ ماں ویتنام، 1979-89 ءَ سوت روس ءُ پد ءَ 2001-21 ءَ امریکہ ءَ ماں اوگانستان ءِ چیر جنگ ءَ پْروش وارتگ ءُ ھمے وڑ ءَ ھستیں وھد ءَ سھودی اَرب ءِ سروگانی ءَ چِل ءُ سے باسکیں مُلکانی گل کہ ارب تپاکی لشکر ءِ نام ءَ زانگ بیت ماں یمن ءَ چہ 2015 ءَ پْروش ورگ ءَ اِنت اگاں ما چیر جنگ ءِ بابت ءَ چیزے وان ایں یا پٹ ءُ پول بہ کن ایں گُڑا ما سرپد بہ بَہ ایں کہ زورگِر ءَ پہ وتی کبزا ءِ مُھکم کنگ ءَ یکشل ءَ جنگی ھرچ، پہ وتگڑیں دیمرویاں زر زیانی، راجدْروھانی زر ءِ لوٹ ءُ بلاھیں آسراتیانی پیلو کنگ ءَ ھوار پہ لس مھلوک ءِ نااُمّیتیں مھر ءَ ھم چیزے کنگ لوٹ ایت کہ ایردستیں راج نپرت ودی مہ کنت ءُ وت ءَ ایردست ھم مہ پھم ایت، دلیریں ورناہ گھگیری ءِ سِلاھبندیں گلاں ھوار مہ بنت۔
بزان چیرجنگ پیل ءُ شاپی کُروس ءِ میان ءَ جنگ اِنت کہ ھما آسراتی کہ شاپی کُروس ءَ ھست اَنت آ پیل ءِ کِر ءَ ھما داب ءَ نہ اَنت کہ جنّگ ءُ تچگ گْوش اَنت ئِے! بزاں چیرجنگ ءِ جنگی ھرچاں امریکہ ءُ روس ءِ وڑ ءَ دِگہ بازیں آسودگیں مُلکاں پْروش داتگ۔
اگاں ما مرچیگیں زمانگ ءَ گِند ایں کہ دُنیا ءَ سِلاہ ءِ پِڑ ءَ سک دیمروئی کُتگ امریکہ، روس، چین ءُ پرانس ءَ S-500 ، Supersonic Brahmos Cruise Missile ، H-777 ، Attack Drone، Rafale Fighter Jet ءُ دِگہ وڑ وڑیں سِلاہ جوڑ کُتگ اَنت کہ اے تھنا دو ملکانی میان ءِ جنگاں پہ دِژمنے ءِ کارجاہ، بالی پِٹ، ملیٹری انسٹالیشن، شھر ءُ دگہ سٹرائیکِنگ آسراتیانی تباہ کنگ ءَ کارمرز بنت بلے ایشاں چیرجنگ ءِ ھلاسی ءَ شریں سِلاہ انگت جوڑ نہ کُتگ اَنت بلکیں ایشی ءِ چپ ءَ پہ چیرجنگولاں وڑ وڑیں دِگہ کسان کسانیں سِلاہ ودی بوتگ اَنت کہ آ پہ یک زورگِرے ءِ تباہ کنگ ءَ چیرجنگولاں آسانی ءَ دزکپ اَنت انچوشکہ وتکُشی بالیگ اَنت کہ انگریزی ءَ سوئیسائیڈ ڈرون گْوش اَنت ئِے۔
چوناھا مرچیگیں جنگی زمانگاں تھنا بے ناھدائیں جنگی ڈرونانی سر باز کار بوگ ءَ انت امریکہ، روس، اسرائیل، تُرکی، ھندوستان، ایران ءُ چین ءِ وڑ ءَ دگہ بازیں دیمروئی کتگیں مُلکاں وڑ وڑیں آئی رینج سرویلینس ءُ اٹیک ڈرون تیار کُتگ اَنت کہ اے بے ناھُدائیں ڈرون چہ رَنوے ءَ بالگِر اَنت ءُ رنوے ءِ سر ءَ ایرکپ اَنت، اے ناھُدائیں بالیگاں میزائیل سنج کنگ بنت پمیشکا اے بالیگ پہ گْوریلہ گلاں بھا زُورگ ءَ سک گران اَنت، ایشانی زیرگ ءُ بڈ ءَ کنگ ھم بلاھیں آسراتی لوٹ اَنت البت نی روس ءَ لھتیں انچیں کسانیں جنگی ڈرون تیار کُتگ اَنت کہ آ وت میزائیل اَنت اے نوکیں کسانیں جنگی ڈرون ناں بالی پٹے لوٹ ایت ناکہ میزائیل ءُ دگہ بمبے ءُ آسراتی یے لوٹ ایت بس چہ سُند ءَ کش ءُ وتی ٹارگٹ ءِ نیمگ ءَ بال ئِے دئے۔
روس ءِ اے سوئیسائیڈ ڈرون ءِ نام Coyote-1 اِنت کہ نی آئی ءَ نوکیں ماڈل Coyote-2 ھم ھست کہ یک مردمے ایشی ءَ بڈ ءَ کنت، بال ئِے دنت ءُ نشانگ ءَ زُوران ءَ دُژمن ءِ ھر وڑیں بیس ءُ کیمپے تباہ کُت کنت چین ءَ ایشی ءِ مَٹ “CH-901” تیار کُتگ ءُ انی دگہ بازیں مُلک اے کسانیں وتکشی بمب ءَ گوں مزنیں شُمارے ءَ تیار کنگ ءَ انت۔
وھدے کہ 18 جنوری 2022 ءَ یمن ءِ ھوسی جنگولاں یو اے ای ءِ دبی شھر ءِ سر ءَ کسانیں وتکُشی ڈرونے ءِ اُرش کُت ءُ دبی بالی پٹّ ءَ بیرانی یے ودی کُت گُڑا تھنا دُنیا ءِ ھما مُلک تُرس آماچ بیتگ اَنت آیاں دِگہ راج ایردست کُتگ اَنت یا ایردستیں راجے ءِ گھگیری ءِ آماچ اَنت چے ءَ کہ اے وڑیں ارزان بھائیں ڈرونے چہ دیر ءَ بال کنت ءُ دُژمن ءِ بلاھیں ماڑی، کارجاہ، ملٹری بیس ءُ دگہ ملٹی بلین ڈالر ءِ آسراتیاں آسانی ءَ تباہ کنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔