لاھور ءَ بلوچ نودربرانی آوار جنگ ءُ بیگواہ کنگ پدردی املے- بلوچ اسٹوڈنس

بلوچ اسٹوڈنس وفاق و پنجاپ ءِ جارکش ءَ وتی شنگ کرتگیں درشان ءِ تہ ءَ گوشتگ کہ بلوچستان ءَ زانشجاہ ءِ نہ بوھگے سوب ءَ ھزارانی کچ ءَ نودربر پنجاپ ءُ دگہ سوبھاں پہ وانگ ءَ در کپ اَنت بلے بژنی گپ ءِ کہ بلوچستان ءِ نودربر نوں پنجاپ ءِ زانشجاھاں ھم.پھریز نہ انت ھما نودربراں رژناھیں باندات ءِ واب زرتگ ءُ بلوچستان ءَ.چہ پنجاپ ءَ اتکگ انت نوں ادا دزگیری ءَ پد بیگواہ بوھگ ءَ اَنت –

جارکش ءَگوشتگ کہ گوستگیں روچاں پنجاپ یونیورسٹی لاھور ءِ ھاسٹلانی تہ ءَ پنجاپ پولیس ءَ شپ ءِ وھد بیڑ برتگ بلوچ ءُ پشتون نودربرانی کوٹی پٹ پول کرتگ انت آ تُرسینگ بوتگ انت اشی ءَ ابید لاہور ءِ دگہ جاھاں نندوکیں چار بلوچ نودربر ھاسٹلانی تہ آوار جتگ ءُ بیگواہ کتگ انت پدا رند ءَ آھانی تہ ءَ دو یل کنگ بوتگ بلے دگہ دو نودربر ھنگت گیرکانودی بیگواہ انت – ھر دو نودربر کیچ ھوشاپ ءِ جاھمنند انت ءُ پنجاپ کالج ءِ نودربر انت کہ آھانی نام ادم ءُ عمران انت –

زانگ بہ بیت اے بیگواھی ءُ آوار جنی ءِ درچ برجاہ انت چریشی ءَ نودربر ماژگی ازیت ءِ آماچ بوھگ ءَ انت یک نیمگے بلوچستان ءِ شاھدربرجاھاں نودربرانی زورانسری آوار جنی ءِ درچ یکشل ءَ گیش بوھان انت دومی نیمگ ءَ ملکے دگہ سوبھاں ھم بلوچ نودربر ھمے گیر کانودی امل ءِ آماچ انت کہ پدردی امل ئے –

جارکش ءَ گڈسر ءَ وتی درشان ءِ تہ ءَ گوشتگ کہ ما اے زانشت دژمن پالیسی رد کنیں ءُ پنجاپ ءِ سرکار ءُ وفاقی سرکار ءَ ھوار ملک ءِ دگہ ادارھاں چہ لوٹ کنیں کہ لاھور ءَ آوار جنگ بوتگیں نودربراں یل بکنائین انت ءُ آوارجنی درچ ءَ ھمدا چہ بہ دار انت –