بلوچستان ءِ دمگ قلات ءَ دگ ءِ وئیل ءَ پنچ مردم بیران بیتگ اَنت۔
دگ ءِ وئیل قلات ءِ منگچر ھند ءَ شال کراچی مزن شھدگ ءِ سرءَ بدرنگ ءِ ایریا ڈویژنل کمپلیکس ءِ نزیک ءَ کوچ ءُ ٹوڈی گاڑی ءِ نیام ءَ ڈِک ورگ ءِ سوب ءَ بیتگ کہ اِشی آسر ءَ پنچ مردم بیران بیتگ اَنت۔
وئیل ءِ سوب ءَ گاڑی ءَ سواریں سید فرید اللہ ء سید عبدالواسع راج سید جھمنند حرمزئی پشین ءُ آئی ھمراھیں دو جنین ءُ دو زھگ ھما دمان ءَ بیران بیتگ اَنت وھدیکہ کوچ ءِ ڈرائیور وئیل ءِ جاہ ءَ چہ تتکگ۔
واکداراں جون نزیکیں نادراھجاہ ءَ بُرتگ اَنت۔
زانگ بہ بیت گوستگیں روچاں یک دگ ءِ وئیل ءَ یکیں کھول ءِ چار مردم بیران ءُ ٹپیگ بیتگ اِت اَنت، چاغی ءَ پک اپ ءُ ٹرالر ءِ ڈِک ورگ ءِ سوب ءَ یکیں کھول ءِ چار مردم بیران بیتگ اِت اَنت۔
وئیل آدینگ ءِ روچ ءَ دمگی مزن شھر دالبندین ءِ ھنکین اسماعیلی لانڈھی ءَ آر سی ڈی شاھراہ ءَ ھما وھد ءَ دیما اَتکگ وھدیکہ اے مردم مچھ ءَ چہ دالبندین ءَ روگ ءَ بیتگ اَنت کہ دومی نیمگ ءَ چہ آیوکیں ٹرالرءَ اِشانی زامیاد اولاک جتگ۔
اسسٹنٹ کمشنر دالبندین عرفان خلجی ءِ ردءَ اے وئیل ءَ یکیں لوگے چار مردم بیران بیتگ اَنت کہ اِشانی تہءَ لوگ واجہ، لوگ بانک، کسانیں جنکو ءِ ءُ آئی وسیگ بیران بیتگ اَنت وھدیکہ کسانیں بچ اِش ٹپیگ بیتگ ءُ ٹرالر ءِ کلینر ھم ٹپیگ بیتگ۔