بیگواھیں آصف ءُ رشید ءِ بیگواھی ءَ سَے سال سرجم بیگ ءَ کراچی ءَ زھرشانی کنگ بیت اِنت – کھول

چہ نوشکی ءَ پکنک ءَ شتگیں آصف ءُ رشید بلوچ ءِ بیگواھی ءَ سَے سال ءِ سرجم بیگ ءَ کھول ءَ گوشتگ بیست ءُ دو جنوری ءَ کراچی ءَ زھرشانی کنگ بیت اِنت –

کھول ءِ گوشگ اِنت آصف ءُ رشید سَے سال ءَ ساری وتی ھمراھانی ھمراھی ءَ نوشکی ءِ پکنک جاہ زنگی ناڑو ءَ شتگ اَنت کہ اود ءَ وتی لھتے ھمراھانی ھمراھی ءَ آوار جنگ بیتگ اَنت –

کھول ءِ گوشگ اِنت اشانی بیگواھی ءَ پد آیانی دست بستگیں اکس ادارھاں وت دیم ءَ آورتگ اَنت ءُ پد ھما اِنت اے بیگواہ اَنت چریشی ءَ آ دگہ آوار جنگ بیتگیں مردم وھد وھد ءِ سر ءَ یلو کنگ بیتگ اَنت بلے آصف بلوچ ءُ رشید بلوچ انگت ءَ یل کنگ نہ بیتگ اَنت –

آصف بلوچ ءُ رشید بلوچ ءِ گوھار سائرہ بلوچ ءَ شال ءُ کراچی ءَ ھوار اسلام آباد ءَ بیگواھیں مردمانی ھاتر ءَ برجم داشتگیں زھرشانیاں ھم بھر زرتگ ءُ وتی براتانی یل کنگ ءِ لوٹ کتگ –

ھمے درچ ءَ آصف بلوچ ءُ رشید بلوچ ءِ سَے سال ءِ گوزگ ءَ پد آئی ءِ کھول ءَ بیست ءُ جنوری دوھزار ءُ بیست ءَ کراچی پریس کلب ءِ دیم ءَ یک زھرشانی ءُ چاگردی رسانکجاھاں کمپئن برجم دارگ ءِ جار جتگ –

آیانی گوشگ اِنت اے روچ ءَ دراھیں مردم مئے ھمراھداری ءُ توار جوڑ بہ بنت داں مئے مردم یل کنگ بہ بنت –

ھمے درچ ءَ بلوچ یکجھتی کمیٹی کراچی ءَ آصف بلوچ ءُ رشید بلوچ ءِ ھاتر ءَ برجم دارگ بیوکیں زھرشانی ءِ پلامرزی کرتگ ءُ مھلوک ءِ گون ءَ دزبندی کتگ مھلوک اے زھرشانی ءَ بھر بہ زور ایت –