نبشتانک: ھستیں چاگرد ءِ راجکاری (سیاست)
نبشتہ کار: گلستان بلوچ
دی بلوچستان پوسٹ
ھَست اَت یک مردے، آئی ءِ لْوگ ءَ ھست اَت یک کَرگینے، گڑا بازیں وھداں پد اناگت ءَ یک توپانے اتک، توپان بے کساس زور اَت، گڑا ھمے توپان ءَ مرد ءِ کَرگین ءِ چِپ جھل ءَ دور دات اَنت، مرد ءَ دگہ یک مردے آرت وتی گدان ءِ ( لوگ ئے ) چِپّانی شر کنگ ءِ واست ءَ وھدے کہ مرد کَرگین ءَ بالہ بوت، چِپّانی شر کنگ لگ اِت، اناگت ءَ مرد ءِ پاد شِترت اََنت ءُ مرد جَھل ءَ کَپت ءُ آئی ءِ پاد پُرشت اَنت وھدے کہ مرد ءِ پاد پُرشت اَنت گُڑا آئی ءَ کیس کرت، ھکومت ءَ لْوگ والا مردک ءَ را آمیدگس ءَ لوٹ اِت ءُ جُست ئِے کرت کہ تو مرد ءِ پاد پروشتگ ترا ایشی ءِ ھلاج کنائینگی اِنت، گُڑا لوگ ءِ واجہ ءَ کازی ءَ را پسّو دات ءُ گْوشت کہ منی وَ ھچ میار نہ اِنت، بلکیں اِے ردی وَ پاتال والا ئیگ اِنت کہ آئی ءَ پاتال جوانیں دابے ءَ نہ گْوپتگ اَنت پمیشکہ مرد وھدے کرگین ءَ بالہ بوتگ شِترتگ ءُ کپتگ آئی ءِ پاد پرشتگ اَنت، تو یک کارے بہ کن تئی مِھربانی بیت، تو پاتال والا ءَ بِہ لْوٹائیں لوگ واجہ ءِ گْوشگ ءِ پد ءَ کازی ءَ پاتال والا لوٹا اینت ءُ جُست ئِے کرت کہ تو پرچے ءَ شَریں دابے ءَ پاتال نہ گْوپتگ اَنت چہ آئی ءِ سوب ءَ مرد کپتگ ءُ آئی ءِ پاد پُرشتگ، نوں ترا مردک ھِلاج کنگی اِنت ءُ ایشی ءِ پاد ءِ ھرچ ءُ درچ ترا دیگی اَنت۔
پاتال والا ءَ درائینت ءُ گْوشت کہ واجہ اِد ءَ منی وَ ھچ گناہ نہ اِنت، من ھر وھدے کہ پاتال گْوپگ ءَ بِندات کن اِیں گُڑا من ءَ یک ھمساھگے ھست کہ آ وتی کپودراں پاتال گْوپگ ءِ وھد ءَ بال دَنت، وھدے کہ من کپودراں بالی ءَ گِند اِیں گُڑا منی سرجمیں ھیال گْوں کپودراں بیت گُڑا اِے وھد ءَ من نہ زان اِیں من چے پیم ءَ پاتالاں گْوپگ ءَ اوں پمیشکا منی پاتال ھراب گْوپگ بنت، تو چْوش بہ کن ھمے منی ھمساھگ ءَ بِہ لوٹائین ءُ جُست ئِے بہ کن آ پرچے اِے وھد ءَ کپودراں بال دَنت۔
کازی ءَ کپودر والا لْوٹا اینت ءُ جُست کرت کہ تو پرچے ءَ کپودراں بال دے ئے؟ کپودر والا ءَ کازی ءَ را پَسّو دات ءُ گْوشت کہ واجہ منی چے گناہ ءُ چے میار، اسل ءَ من ءَ کسان سالیں بچکیں چُکّے ھست آ ھر وھد ءَ چھٹی لوٹ اِیت من ءَ گْوش اِیت کپودراں بال بِہ دے، آ یک نہ سرپدیں گْونڈوے۔
ھمے پیم ءَ یکے ءَ دومی ءَ را میاریگ کُرت وت ءَ را بے میار ءُ بے گُناہ کرت۔ اگاں بہ چار ئے مئے ھستیں نام نِھادیں ھکومتی رھشون ھمے پیم ءَ اَنت، ھر کس وتی اھد ءُ دور ءَ کیت گْوستگیں ھکومت ءَ را میاریگ کنت ءُ وت ءَ را بری کنت ءُ گْوش اِیت من شَر آں۔ اِد ءَ بہ چار ئے گُڑا مئے چاگرد چْوں شر بیت ءُ چْوں گِھتری کیت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔