نودربر گلانی یکجاھی ءَ نیاد، ھمے سال ءِ نوزدہ جنوری ءَ شال ءَ ترندیں زھرشانی کنگ ءِ جار پِرینتگ

شال ءَ بلوچ نودربر گلاں یکجاھی ءَ نیاد کتگ نیاد ءِ سرکماشی بلوچ اسٹوڈنس ایکشن کمیٹی ءِ بنجاھی پتر ءِ باسک صمند بلوچ ءَ کتگ وھدیکہ نیاد ءَ بلوچ استوڈنس ایکشن کمیٹی، بلوچ اسٹوڈنس آرگنائزیشن پجار، پیپلز اسٹوڈنس فیڈریشن ءُ پشتون اسٹوڈنس فیڈریشن ءِ اگدق دار ھم نیاد ءَ ساڑی بوتگ انت –

گوستگیں سال ءِ نومبر ءِ ماہ ءَ بلوچستان شھدربر جاہ ءَ زورانسری آوار جنگ بوتگیں نودربر سھیل بلوچ ءُ فصیح بلوچ ءِ یل کنائینگ ءِ ھاتر ءَ نودبرانی الائنس نیاد اڈ داتگ کہ اود ءَ درسیں وئیل ءُ سرکار ءِ بے وسی گندگ ءَ پد بازیں پیسلہ ءِ زورگ بوتگ ءُ الائنس نیمگ ءَ چہ اے پیسلہ منّگ بوتگ انت –

الائنس ءَ یکجاھی اے پیسلہ کُتگ کہ دو ماہ ءَ گیش انت کہ زورانسری آوار جنگ بوتگیں نودربر زاھر کنگ نہ بوتگ انت دومی نیمگ ءَ سرکاری مردمانی کول ءِ پروشگ ءُ ھستیں وھد ءِ سرکار ءِ ھچ نہ گوشگ ءَ بازیں جست ءِ ودی بیت اِنت- کہ بیگواھیں نودربرانی زند ءَ ھترہ بوت کرت کنت – الائنس اولی روچ ءَ چہ پُرایمنیں سیاسی وڑ ءُ پیم وتیگی کرتگ انگت ھم ھمے درچ ءَ برجاہ داریت وتی توار ءَ چِست کنت –

نودربر گلانی یکجاھیں نیاد ءَ اے پیسلہ کنگ بوتگ ھمے سال ءِ نوزدہ جنوری ءَ شال ءَ زھرشانی کنگ بیت انت کہ چاگرد ءِ درسیں تک ءُ پھناتاں سیادی داروکیں مردماں بھر زورگ ءِ ھاتر ءَ کوشست تیز کنگ بنت –