کیچ: سی ٹی ڈی ءَ چار مردمانی دزگیری ءِ ٹاہ داتگ

بلوچستان ءِ دمگ کیچ ءَ مھکمہ انسداد دھشت گردی (سی ٹی ڈی) ءَ چار مردمانی دزگیری ءِ ٹاہ داتگ-

جارکش ء سی ٹی ڈی ءَ اے گپتگیں مردم دو زھگانی کوش ءَ ھوار بازیں ناشریاں ھوار بیتگ اَنت-

جارکش ء سی ٹی ڈی ءِ گوشگ اَت دزگیر کرتگیں مردمانی سیادی سلاہ بندیں گلان ئین اِنت –

سی ٹی ڈی ءِ رد ءَ اکتوبر دوھزار ءُ بیست ءُ یک ءَ تربت ءِ دمگ کوشاں دزبمب ءِ تراک ءَ دو زھگ بیران بیتگ اِت اَنت –

بلے تنی وھدی سی ٹی ڈی ءَ دزگیر بیتگیں مردمانی پجار دیم ءَ نیاؤرتگ اَنت ءُ نانکہ اے گشتگ کہ اے کیچ ءِ کجام ھند ءَ دزگیر کرتگ اَنت –

زانگ بہ بیت اکتوبر ءِ ماہ ءَ کیچ ءِ دمگ ھوشاپ ءَ ناگتی مارٹر گولھانی تراک ءَ دو زھگ بیران بیتگ اِت اَنت ، اے جنگ بیتگیں زھگانی کھولاں اے بھتام جتگ اَت اے زھگ پوج ءِ نیمگ ءَ آس دیگ بیتگیں مارٹرگولھانی لگ ءَ بیران بیتگ اَنت –

زھگانی کوش ءِ ھلاپ ءَ سرجمیں بلوچستان ءَ ترندیں زھرشانی بنا بیتگ اَت اشی ءَ پیسر سدانی کچ ءَ زھگ ءُ زالبولانی ھواری ءَ بازیں مردماں کیچ ءَ پد شال ءَ لاشانی ھمراھی ءَ زھرشانی کتگ اَت-

ھوشاپ ءِ وئیل ءِ درگت ءَ بلوچستان ھائی کورٹ ءِ بینچ ءَ پیسلہ کنان ءَ سرجمیں پَٹ ءُ پول ءِ پرمان کتگ اَت ءُ ڈی سی کیچ حسین جان، اے سی کیط عقیل کریم، نائب تھسیلدار ھوشاپ رسول جان درکتگ اِت اَنت –

ھائی کورٹ ءَ اے آفیسر سرجم ءَ کش اِتگ اَنت ءُ کشگ بیتگیں ھردوکیں زھگ شھید گوشتگ اَنت-

پد ءَ ھوشاپ ءِ وئیل ءَ درکنگ بیتگیں آفیسر سپریم کورٹ ءَ پد ءَ داشتگ اَنت –

زانگ بہ بیت سی ٹی ڈی ءَ اشی ءَ پیسر بلوچستان ءِ جتا جتائیں جاھاں مردمانی دزگیری ءُ دیم پہ دیمی جنگ کوشانی ٹاہ داتگ اَنت –

گوست ءَ ھم اے وڑیں وئیلاں دزگیری یا دیم پہ دیمی جنگ ءَ کشگ بیتگیں مردمانی پجار پیسر ءَ بیگواھیں مردمانی نامان زانگ بیتگ اَنت –

اے درگت ءَ سردار اختر مینگل ءَ گوشتگ کہ بلوچستان ءَ نودربرانی بیگواھی ھچ نوکیں گپے نہ اِنت بلکیں اے درچ بازیں سالاں چہ برجاہ اَنت اشی ءَ پیسر اد ءَ ورنا آوار جنگ ءُ آیانی لاش دور دیگ بیتگ اَنت ءُ اشانی بھتام سیکورٹی ادارھاں لڈگ بیتگ بس نِی نام بدل بیتگ پیسر ءَ سیکورٹی پورس ھوار بیتگ نِی سی ٹی ڈی ءِ نام دیگ بیتگ سی ٹی ڈی وتی دیم ءَ سیاھیں پوست جنت ءُ وش اِنت-