بلوچستان ءَ جتاجتائیں وئیلاں دو زالبولاں ھوار نُھ مردم بیران، پنچ زدگ

بلوچستان ءِ جتا جتائیں جاھاں وئیلانی آسر ءَ دو زالبولاں ھوار نُھ مردم بیران بیتگ اَنت ءُ پنچ ٹپی بوتگ اَنت-

سربوتگیں ھالانی رِد ءَ سوئی ءِ دمگ بگٹی کالونی ءَ لاپ پُریں زالبولے ءِ آپریشن ءِ وھد ءَ ڈاکٹرانی نادلگوشی ءَ زالبول گوں چک ءَ ھوار بیران بوتگ-

دومی وئیل بلوچستان ءِ دمگ کوھلو ءَ یونین کونسل نساؤ ءَ نظر محمد لوھارانی ءِ لوگ نزیک ءَ شوروانی ترکگ ءَ چہ شپانکے ءِ پنچ میش مرتگ اَنت-

ھمے وڑ شال ءَ ٹرک ءِ ھڈ کنگ ءِ وھد ءَ پٹرول ٹینک ءِ ترکگ ءَ چہ جان محمد نامیں پوریاگرے بیران بوتگ ءُ شال ءَ دگہ وئیلے ءَ دو ٹولیانی میان ءَ جنگ ءُ چوپ ءِ وھد ءَ مطیع اللہ ء محمد عیسیٰ بیران بوتگ-

دگہ یک وئیلے بلوچستان ءِ دمگ خضدار ءِ دمگ کواڑسک ءَ کور ءَ جان شودگ ءِ وھد ءَ دو دمگی زھگ بُڈ اِتگ ءُ بیران بوتگ اَنت-

پنجگور ءِ دمگ سراوان ءَ ناشناسیں سلاہ بندیں مردمانی تیرگواری ءَ چہ داؤد ء جمیل نامیں مردمے سک ٹپی بوتگ-

ھمے وڑ بلوچستان ءِ جتا جتائیں جاھاں بوتگیں دگ ءِ وئیلاں دو مردم مرتگ ءُ وھدے کہ چار ٹپی بوتگ اَنت-

مروچی بوتگیں دگ ءِ وئیل سبی نیشنل ھائے وے ءُ اورماڑہ ءِ ھند ءَ بوتگ اَنت وھدے کہ لھتے ٹپی کراچی ءَ برگ بوتگ اَنت –

بلوچستان ءِ دمگ ڈیرہ مراد جمالی ءَ ناشناسیں سلاہ بند لوگے ءَ پُترتگ ءُ زالبولے ءَ ھوار دو مردم کشتگ اِت-

اے وئیل ڈیرہ مراد جمالی ءِ شھر سٹی پولیس تھانہ ءِ نزیک ءَ گولہ چوک ءَ بوتگ ءُ اود ءَ ناشناسیں سلاہ بندیں مردم لوگے ءَ پُترتگ ءُ تیرگواری اش کتگ ءُ زالبولے ءَ ھوار دو مردم کشتگ ءُ تتکگ اَنت-

وئیل ھال ءِ رسگ ءَ سٹی پولیس وئیل جاہ ءَ سر بوتگ ءُ کشتگیں مردمانی لاش سول ھسپتال ڈیرہ مراد جمالی ءَ سر کتگ اَنت-

وئیل ءِ درگت ءَ دگہ گیشیں سرپدی نہ رس اتگ-