ٹی بی پی کارست |بوبی سینڈز – حکیم بلوچ

ٹی بی پی کارست

کارست: بوبی سینڈز

نبشتہ ءُ پولکار: حکیم بلوچ

1954 ءَ جون ءُ روژالین سینڈز ءِ لوگ ءَ ںارتھرن آئرلینڈ ءِ دمگ انٹریم ءِ ایبٹ کراس ءَ ودی بیتگیں روبرٹ جیررڈ (بوبی) سینڈز وتی مات ءُ پِت ءِ چاریں چُکانی تہءَ مستریں چُک بیتگ، روبرٹ سینڈز ءَ دو کستریں گوھار مارسیلا ءُ برناڈیٹ ءُ یک کستریں برات ءِ جون سینڈز بیتگ – سینڈز کھولءَ وتی ھمسایگانی بیھار ءُ ناشریں رویانی سبب ءَ ایبٹ کراس یل داتگ ءُ راتھکول ءَ روگ ءَ لاچار بیتگ اَنت۔ راتھکول کہ آودہ 30% جھمنند کیتھولک عیسائی مذھب ءَ چہ سیادی داروکیں مردم بیتگ اَنت ءُ کیتھولک وانگجاہ ھم بیتگ۔ روجر (بوبی) سینڈز ءَ سٹیلا مارس اسکول ءَ ونتگ ءُ ھمے اسکول ءِ کلب ءِ ھاتر ءَ فٹبال گوازی ھم کتگ –

1966 ءِ وھد ءَ راتھکول ءَ ھوار سرجمیں بیلفاسٹ ءَ نیکراھی جنگ ءُ جدل بندات بیت اَنت ءُ جاور باز ھراب بیت اَنت، ءُ کسانیں کساس ءَ جھمنندیں کیتھولک مھلوک انگیر کنگ بیت اَنت – چہ اے جاوراں پیسر بوبی سینڈز ءِ سنگتی گوں پروٹیسٹنٹ آں (عیسائی مذھب ءِ دگہ فرقہ اِنت) بیتگ، بلے اناگتی آئی ءِ سنگتاں آئی ءِ گوما اھوال کنگ بند کُت ءُ سینڈز ءَ ھم باز زیت دربرت کہ آئی ھاترءَ المی انت کہ آ گوں کیتھولک کہ آئی ءِ فرقہ ءِ مردم اَنت گوں ھمایاں نزیکی بہ کنت –

بوبی سینڈز ءَ 1969 پانزدہ سال ءِ اُمبر ءَ اسکول یل داتگ، ءُ نیو ٹاون ایبی ٹیکنیکل کالج ایڈمیشن زرتگ اَت، بوبی سینڈز ءَ وانگ ءَ ھوار 1970 ایلکزینڈرز کوچ ورکس ءَ کار دربرگ بندات کُتگ اَت۔

بوبی سینڈز ءَ ایلکزینڈرز کوچ ورکس یک سالی ءَ چہ ھم کم وھد ءِ تہءَ یک دیگ کپت، بوبی سینڈز ءَ مدام پروٹیسٹنٹ ھم کارانی دست ءَ کم شرپی ءِ دیمپانی کنگ کپتگ، بازیں ھم کارانی رد ءَ بوبی سینڈز ءَ اے کم شرپی داں مزنیں وھدے ءَ نادلگوش کُتگ اَنت۔ بلے پدءَ جنوری 1971 ءِ یک بیگاھی ءَ وھدے آ وتی کار ءَ ھلاس کنگ لوگ ءَ روگ ءَ بیت گُڑا السٹر لویالسٹ ٹارٹن گینگ ءِ ( نارتھرن آئرلینڈ ءِ گوں برتانیہ ءَ یکجاھی لوٹوکیں سرکار دوستیں گل) لھتیں باسک کہ گوں بوبی سینڈز ءَ ھم کار بنت آئی ءَ توپگ ءِ زور ءَ دار اَنت ءُ گُش انت کہ یک فینین یے (آئرش ریپبلکن آرمی ءِ باسک ءِ اگاں آئرلینڈ ءِ آجوئی جھدکار ءِ) ھاترءَ ادا کار کنگ چہ آئی بالاد ءَ مستریں گپ اِنت ءُ اگں آ وتی زند ءَ رکینگ لوٹ گُڑا دگہ رندءِ ادا گندگ مہ بیت – بوبی سینڈز ءِ جندءِ گپانی رد ءَ ھمے ھما دمان بیتگ کہ آئی ءَ پیسلہ کُتگ کہ سلاہ بندیں جھد ءَ ابید دگہ راہ نیست اِنت –

چوناھا بوبی سینڈز ھمے ھاترءَ نام آور اِنت کہ آئی ءَ پہ وتی لوٹانی ھاترءَ شد ھڑتال کُتگ اَت ءُ داں وتی زند پہ لوٹانی ھاترءَ ندر ھم کتگ اَت –

بوبی سینڈز بازیں زوراکی ءُ وتی مھلوک ءِ سر ءَ بیوکیں برتانیہ زلماں پد 1972 ءَ آئی آر اے بزاں آئرش ریپبلکن آرمی ءَ ھوار بیت، بوبی سینڈز وتی جھد ءِ سوب ءَ دو رند ءَ دزگیر کنگ بیت اولی برءَ 1972 ءَ دزگیر کنگ بیت ءُ داں اپریل 1976 ءَ بندیگ بیت ءُ آئی سرءَ گیر قانودی سلاہ کارمرز کنگ ءِ بھتام بیت – بوبی سینڈز وھدیکہ 1976 ءَ چہ جیل ءَ یل بیت آ پد ءَ گوں وتی مھلوک ءَ وتی جھدءَ برجاہ کنت ءُ یک رندے پدءَ کساس شش ماہ ءَ پد برتانیہ ءِ پولیس آئی ءَ دزگیر کنت ءُ نارتھرن آئرلینڈ ءَ میز بندی جاہ ءَ کہ پیش لونگ کیش ڈیٹینشن سینٹر ءِ نام ءَ زانگ بیتگ بندیگ کنگ بیت –

بوبی سینڈز ءَ دومی رند ءَ چاردہ سال ءِ سزا دیگ ءُ بندیگ کنگ بیت اِنت- بوبی سینڈز وھدے دومی رند ءَ زندانی کنگ بیت گُڑا بندی جاھانی جاور مٹ بنت، آئرلینڈ ءِ سیاسی بندیگانی سر ءَ بازیں بندش جنگ بنت آیانی پیشی چیروکائی بنت، آیاں سیاسی بندیگانی حیثیت دیگ ءَ ابید جرمکارانی پیم ءَ چارگ بنت –

بندیگ جاھانی تہءَ آئرش سیاسی بندیگانی سرءَ زلم ءُ آیاں آیانی بُنکی ھک نہ دیگ ءِ بگیری ءَ آئرش جھد کار زندان ءِ تہ ءَ زھرشانی بندات کن اَنت، اے زھرشانی (بلینکیٹ) ءُ (ڈرٹی) ءِ نام ءَ زانگ بنت، بلینکٹ زھرشانی ءَ بندیگ تھنا یک کمبل (بلینکیٹ) ءِ پوش اَنت ءُ دگہ پوچ گورا نہ کن اَنت – وھدیکہ سِل (ڈرٹی) زھرشانی ءَ بندیگ وتا ساپ نہ کن اَنت بزاں نہ شود اَنت۔ بوبی سینڈز اے دوھیں زھرشانیاں بھر زیر اِت ءُ بندیگانی نیام ءَ باز نامدار بیت اِنت – پنچ سال ءِ کچ ءَ وڑ وڑیں زھرشانیاں پد ھم وھدے برتانیہ ءِ سرکار بندیگانی لوٹان پیلو نہ کنت گُڑا شُد مرگ ءِ شور بندی کنگ بیت اِنت ءُ بوبی سینڈز درستاں پیسر وتی نام ءَ دنت ءُ پد ءَ اے شُد مرگ ھڑتال ءِ سروکی ءَ کنت –

01 مارچ 1981 ءَ بندات بیتگیں شُد ھڑتال نارتھرن آئرلینڈ ءُ برتانیہ ءَ ھوار بازیں ڈیھاں نامدار بیتگ ءُ برتانیہ ءَ بازیں مردماں سرکار ھم نبشتہ کُتگ کہ بندیگانی لوٹ پیلو کنگ بہ بنت – بوبی سینڈز ءُ آئی ءِ ھمراھیں جھدکارانی شُد ھڑتال ءِ مھلوک ءِ تہ ءَ نامداری ھمینچو ود اِیت کہ بوبی سینڈز چہ بندیگ جاہ ءَ چہ گچین کاریاں اوشت اِیت ءُ 10 اپریل 1981 ءَ شُد مرگ ءِ 41 می روچ ءَ 30 ھزار اوٹاں گوں گچین کاریاں باج بر بیت اِنت – بوبی سینڈز ءِ مھلوک ءِ تہ ءَ ودوکیں مھر ءُ آئی لوٹاں گوں یکجاھی درشان ءَ ابید ھم برتانیہ ءِ کنسرویٹو پارٹی ءِ مزن وزیر مارگریٹ ٹیچر ءَ نہ تھنا بندیگانی لوٹ منگ ءَ مکن کُتگ بلکیں اے ھم گُشتگ کہ اَے مردم جرمکار اَنت ءُ ایشانی لوٹ ھچ پیم منگ نہ بنت –

03 مئی 1981 بوبی سینڈز کوما ءِ آماچ بیت ءُ 05 مئی 1981 ءَ 66 روچ ءَ شُد مرگ ءَ نند ءَ پد بیران بیت – بوبی سینڈز ءِ مرگ ءَ پد امریکہ ءَ ھوار بازیں ملکاں بوبی سینڈز ءِ مرگ ءِ پد ءَ رنج ءُ غم ءِ درشان کُتگ۔ رسانکداں مارگریٹ ٹیچر ایر جتگ ءُ گُشتگ کہ آئی ءَ وتی ملک ءِ دگہ پارلیمنٹرین ءِ لوٹ نہ من اِتگ ءُ بیرانی ءَ اِشتگ – بوبی سینڈز ءِ میت ءَ رسانکدرانی ردءَ کساس یک لک ءَ بُرز مردماں بھر زرتگ ءُ آئرش یونین زھرشانی کنان ءَ ھڑتال کُتگ اَنت – بوبی سینڈز ءِ مرگ ءَ پد کساس 9 دگہ شُد ھڑتال ءَ نشتگیں آئرش جھدکار بیران بنت ءُ زھرشانی 03 اکتوبر 1981 ءَ آسر بیت ۔ زھرشانی ءِ ھلاس بیگ ءَ پد بندیگانی لوٹ منگ بنت ءُ آیاں آیانی ھک دیگ بنت ۔

دلگوش: ٹی بی پی ءَ کارستانی درگت ءَ سرپدی ءُ اھوال چہ انٹرنیٹ ءُ دگہ جاھاں زیرگ بیتگ اَنت ءُ اِشانی تہ ءَ ردی اگاں گیشی ءُ کمی الم بیت کن اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔