برات پولیس ءَ دزگیر کتگ ءُ چیریں ادارھانی دست ءَ داتگ – محمد عامر ءِ گوھار

چار شمبے ءِ روچ ءَ بلوچستان ءِ بنجاھی شھر شال ءَ پریس کلب ءِ دیم ءَ بیگواھیں محمد عامر ءِ گوھار ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ ھمراھی ءَ پریس کانفرنس کنان ءَ گوشتگ کہ منی برات عامر ء محمد اکبر ھمے سال ءِ بیست ءُ سَے نومبر ءِ شپ ءَ بلوچستان ءِ دمگ لسبیلہ گڈانی ءَ ھب پٹرول پمپ ءِ سر ءَ پولیس کارمنداں دزگیر کنگ ءَ پد لس پوشاکیں چیریں ادارھانی کارمندانی دست ءَ داتگ –

آئی ءِ گوشگ ات کہ منی برات آوار جنی ءَ پد ھماھیں بیگواہ انت مارا وتی برات ءِ درگت ءَ ھچ وڑیں سرپدی دیگ بوگ ءَ نہ انت –

آئی ءِ گُشگ ات کہ اگاں منی برات کُتکار انت گڑا پولیس والھاں بگیر وارنٹ پرچا دزگیر کتگ؟

نازیہ اکبر ءَ پریس کانفرنس کنان ءَ دیمتر ءَ گوشتگ کہ آواران ءَ تُرس، جنگی جاور ھال ءُ گِسانی ماندارگ ءِ سبب ءَ ما سال دوھزار ءُ پانزدہ ءَ چہ اود ءَ لڈِتگ ءُ ھب چوکی ءَ اتکگ انت تاکہ اد ءَ وانگ ءُ روزگار پہ ما ارزانتر بہ بنت بلے اد ءَ ھم مئے برات زورانسری آوارجنی آماچ کنگ بوتگ – منی برات ءِ سر ءَ اے وڑیں چونیں جُرمے بوتگ کہ چیریں ادارھانی کارمنداں آوار جتگ ءُ بیگواہ کتگ – اگاں منی برات کتکار انت گڑا آمیدگس ءَ پرچا آرگ نہ بیت اِنت؟

آئی ءِ گوشگ ات آئی برات ءِ آوارجنی ءَ تھنا ھمائی جند آوار جنگ نہ بوتگ بلے مئے کھول ءِ مالی کوش بوتگ پرچاکہ منی برات نادراھ بوگے جاورھالاں آئی ءَ تنگدستی ءُ لاچاری مزدوری کتگ بلے آئی ءِ آوار جنی ءَ مارا مالی، جانی ءُ ماژگی آماچ کنگ بوگ انت –

آئی ءِ گوشگ ات کہ منی برات ٹی بی ءِ نادراھی ءِ آماچ انت ٹی بی نادراھاں وتی درمان پہ وھد ورگی انت اگان اے میان ءَ نادراہ یک روچے وتی درماناں مہ وارت گڑا بندات ءَ چہ دوبر وتی کورس بندات کنگی انت اگاں ھما دمان ءَ آئی ءِ نادراھی الاج مہ بیت ٹی بی آئی ءِ مرگ ءِ سبب جوڑ بوت کنت –

آئی ءَ وتی برات ءِ یل کنگ ءِ لوٹ کتگ ءُ گوشتگ کہ اگاں آ کتکار انت کانودی وڈ ءُ ڈول ءَ دزگیر کنگ بہ بیت ءُ آمیدگس ءَ آرگ بہ بیت –