روکپتی بلوچستان ءَ ایرانی پھزدار ءُ سلاہ بندانی میان ءَ جنگ، دو ایرانی پھزدار بیران چار زدگ

سر بیتگیں ھالانی رد ءَ روکپتی بلوچستان ءِ دمگ ریگان ءَ سلاہ بندیں مردمانی ءُ ایرانی پھزدارانی میان ءَ جنگ ءُ چوپ ءَ چار ایرانی پھزدار زدگ بیتگ اَنت ءُ دو بیران بیتگ اَنت –

ھالانی تہ ءَ گوشگ بیتگ کہ ایرانی پھزداراں نشہ باپاری ءِ بھتام ءَ اشانی سر ءَ بیڑ برتگ ءُ چریشی ءَ دوئیں نیمگاں تیرگواری بندات بیتگ –

تیرگواری ءَ آسر ءَ ایرانی پھزدارانی دو احسان شیرخانی ءُ رضوانی بیران ءُ زدگ بیتگءں محسن اعلایی، مھمد صادق، معین نژاد، علی ذوالعلا ءُ علی تانوردی ءِ ناماں زانگ بیتگ اَنت –

ایرانی پھزدارانی نیمگ ءَ تنی وھدی اے ھال ءِ درگت ءَ دگہ ھال دیم ءَ نیتکگ اَنت ءُ ناکہ آئی ءَ دگہ جانی تاوانانی بارو ءَ گپ دیم ءَ آورتگ اَنت –

زانگ بہ بیت روکپتی بلوچستان ءَ گیشتر چوشیں وئیل بیگ ءَ اَنت ءُ اشانی گر ءُ دار کنگ ءَ گوستگیں روچ ءَ انٹی نارکوٹکس ءَ ھم تیرگواری کرتگ اَت ءُ چریشی ءَ یک مردمے بیران بیتگ اَت –