شال ءَ بیگواھیں مردمانی زھرشانی برجاہ

دروگیں میڑ ءِ نام ءَ بیگواھیں بلوچانی کوش ءِ سر ءَ گامگیج زورگ بہ بیت – ماما قدیر

بلوچستان ءِ بنجاھی شھر شال ءَ زورانسری آوار جنگ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی شال پریس کلب ءِ دیم ءَ برجاہ، زھرشانی ءَ مروچی چار ھزار چار سد ءُ ھپتاد ءُ دو روچ سرجم بوتگ – ژوب ءَ سیادی داروکیں پبلک کتابجاہ ءِ سرکماش ففتی خیالی مندوخیل ءُ آئی دگہ ھمراھاں بنجل ءِ ترءُتاب ءُ کتگ –

ھمے وھد ءَ گل ءِ کمک سرکماش ماما قدیر بلوچ ءِ گوشگ ات کہ بلوچستان ءَ بیگواھیں مردمانی کھول بازیں ازاب ءِ تہ ءَ گوزگ انت –

آئی گوشگ ات کہ سی ٹی ڈی ءَ دستاں ھمک روچ زورانسری آوار جنگ بوتگیں مردمانی دروگیں میڑ ءِ کوش ءَ چہ بیگواھیں مردمانی کھول پریشانی آماچ انت – بلوچستان ءِ تہ ءَ پاکستانی پوج ءِ دست ءَ زوراکی ءِ آماچ بوتگیں مردمانی ھک دئیگ ءَ میاں استمانی ادارہ ءُ انسانی ھکانی گلاں وتی چم بند کرتگ انت –

آئی ءِ گوشگ ات کہ ادا یک بلاھیں انسانی المیہ ءِ ودی بوھگ انت اگاں اشی گر ءُ دار ءَ ھنّیگ ءَ چہ گامگیج زورگ نبوت گڈا جاورھال تباھی ءِ نیمگ ءَ رؤنت –

آئی ءِ گوشگ ات کہ بلوچ راج ءَ گیشتر واب ءَ بُست کنگی انت ءُ وتی جُھد برجاہ دارگی انت – نوں مار ءَ وتی مردمانی کوش ءُ زورانسری آوار جنی ءِ سر ءَ ھاموش بوھگی نہ انت –