نبشتانک: تھنا آئی ءِ پگر ءُ یات پشت کپتگ اَنت
نبشتہ کار: تاھیر بلوچ
دی بلوچستان پوسٹ
من ءَ یات انت کہ من ءُ دگہ یک سنگتے بالگتر ءَ سنگتانی کِر ءَ ات ایں، 2018 ات بلے ماہ من ءَ یات نہ اِنت کہ کجام ماہ اَت۔ ما چہ سنگتاں موکل کرتگ اَت ءُ دیم پہ کیلکور ءَ روگ ءَ ات ایں۔ گُڑا مارا سنگتاں گُشت کہ شما کیلکور رو اِت دگہ یک سنگتے ھست بہ برات ئے گوں، گڑا سنگت سھب ءِ سرا مئے کِرا اتک ما ھم اے سنگت پیسرا نہ دیستگ ات گُڑا ما سنگتاں ءَ جُست کت کہ اے سنگت کے اِنت؟ سنگتاں پسّو دات ءُ گُوشت اے سنگت ءِ نام باسد اِنت، اے سنگت وتی نیمگ ءَ روگ ءَ اِنت۔ ما اے سنگت زُرت دیم پہ سپر ءَ رھادگ بوت ایں۔ من ءَ یات اِنت کہ روچ ءِ 4 بج ات ما در کپت ایں۔
ما وتی وڑ ءَ روان روان ءَ سنگت مھروانے اَت، گپ ءُ تران کنگ ءَ اَت۔ ما درائیں راہ ءَ آئی گپاں گوشدارگ ءَ اَت ایں ما شپ ءَ کیلکور ءَ سنگتانی جاہ ءَ سر بوت ایں آئی ءَ من ءَ کرت! سنگت تو ھال کن شما کُج ئے سنگت اِت؟ من گوشت ما آواران ءِ آئی ءَ گوشت کہ سنگت من شمارا پیسر ءَ نہ دیستگ من گوشت ھو راست گوش ئے سنگت من ھم ترا پیسر ءَ نہ دستگ مئے دیوان گوں سنگتاں برجاہ اَت سنگتاں مارا نپاد دات ءُ گوشت سنگتاں شما بہ وپس اِت کہ شما سپر ءَ بوتگ اِت گڑا ما پہ وشی وتی نپادانی سر ءَ تچک بوان بوتیں سنگت ہرکس وتی وابجاھاں روان بوت۔
سھب ءَ مھلہ ما چہ واب ءَ پاد آتکاں سنگتاں مارا چاہ آپ کرت۔ ما گوں سنگتاں نشتگ اَت ایں۔ مئے سپر انگت دیم ءَ اَت مارا مھلہ جنزگی اَت گڑا من باسد جان گوشت سنگت مئے سپر ءَ دیم اِنت نوں مارا جنزگی اِنت، تو باریں چے گوش ئے؟ تو گوم ءَ دیم کائے یاں ھمد دارئے، تئی سپر مارا دوست بوّگ ءَ اَنت کائے گوں برواں دیم ھمسپر نہ ایں۔ آئی گوشتگ کہ اگاں شما کولواہ ءَ رو اِت گڑا من گوں شما ھمسپر باں من گوشت ھو پُل ما اول کولواہ رویں ءُ پدا دیم ءَ وتی نیمگ ءَ جنزیں آئی ءَ گوشت ھو سنگت گڑا شر اِنت ھوار رویں، من ھم کولواہ کایاں گوں۔
گڑا مھروانیں سنگتانی دلوشیں دیوان برجاہ اَت، سنگت گپ ءُ مسکرائی کنگ ءَ اِت اَنت مارا دیم ءَ جنزگی اَت گڑا من گوشت کہ سنگتاں شمئے دیوان سک وش اِنت، بلے مارا سپرے دیم ءَ اِنت، اگاں شما مارا موکل دے اِت، گڑا ما چہ شمئے رزا ءَ دیم جنزاں بہ ایں۔ سنگتانی گپ ھمے بوت کہ اگاں شمارا سک ءَ زروری کار نیست گڑا یک ءُ دو روچ ءَ بدار اِت،گندکے بیت۔ گڑا ما گوشت زندگ بباں گندگ باں مدام ما ءُ شما ھواریں۔ مارا دیم کار ھست، دیر اِنت چہ وتی سگتاں جتا بوتگیں، دگہ وھدے کہ سرکپیت گڑا الم شمئے کِرا یک ءُ دو روچ داراں۔ گڑا ماچہ سنگتاں موکل کرت ءُ دیم پہ وتی سپر ءَ جنزاں بوتیں۔ ما روان روان ءَ باسد جان ءِ مھروانیں تران ءُ مسکراھی برجاہ اَت داں ما کولواہ ءَ سنگتانی کِرا سربوت ایں۔ ما چاہ ءُ نان وارت مئے سپر انگت دیم ءَ اَت۔ گڑا من باسد جان ءَ گوشتگ کہ سنگت مارا دیم ءَ روگی اِنت تو چے گوش ئے مئے گوں کائے؟ آئی ءَ پہ بچکندگے گوشت سلامت بات اِت سنگتاں منی سنگت ھمیش اَنت آتکگ اَنت منی دیم ءَ اگاں شما گومن کا اِت ءُ دار اِت جوانتر اِنت۔ من گوشت نہ شنکوں مارا دیم ءَ روگی اِنت سلامت بات ئے جگر بس ھواراں زندگی ءِ بوت وت ءَ الم گنداں۔
ما موکل کرت ءُ دیم پہ وتی نیمگ ءَ جنزان بوتیں زند ءِ روچ ھمے وڑ ءَ گوزاں اِت اَنت، مزنیں مدتے گوست اَت من گوں باسد ءَ جان ءَ دچار نہ کپتگ اِت آں۔ بس مھروانیں سنگتانی مھر مدام یات کاینت بلوچ ءِ جھد ء آجوئی ءِ کاروان جنزان اِنت ما گوں مسکین سرڈگار ءَ کولے کرتگ، مارا پہ وتن کربان بوگی اِنت پہ مادریں گلزمین ءُ بلوچ ننگے پھازگ ءَ سنگتانی شھیدی دائم ھست اَنت۔
من چو مدامی وڑ ءَ سھب ءَ واب ءَ پاد آتک آں ءُ وتی موبائل پچ کرت گوں سنگتاں ھال ءُ اھوال کناں ءَ من ءَ بدیں ھالے رستگ کہ سھبی کولواہ ءَ ٹوھین جنگے بوتگ ءُ دیراں برجاہ بوتگ۔ اے سھب 9 اکتوبر 2021 سھب اَت من گوشت کہ ھُدا تو وت ھیر بہ کن ءُ سنگتاں سلامت کن۔ ھمے وڑ ءَ گوں فون سنگتاں ھال ءُ اھوال کناں ءَ داں چار ءُ پنچ گنٹہ گوستگ ھمے ھال رست کہ چار سنگتے ءِ شھیدی ھال اِنت۔ بلے اے گپ انگت پکا نہ اِنت۔ بس مئے دوا ھمیش اَت یاں ھُدا اے ھال دروگے بات ءُ سنگت سلامت بات اَنت ھمے وڑ ءَ دگہ یک ءُ دو گنٹھ ءَ پد من ءَ ھال رست کہ باسد جان گوں چار سنگت ءَ شھید بوتگ من ءَ ھما گپ یات آتک اَنت زندگی ءِ بوت گندگ الّم باں، بلے زندگی ءَ پد ءَ گندگ ءَ موہ نہ دات۔ بس تھنا پگر ءُ یات پشت کپتگ اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔