کسے ءِ گمان ءَ نیست اَت پیر مرد ءِ کاروان چوش جنز اِیت- ٹی بی پی ستاشانی

ستاشانی: کسے ءِ گمان ءَ نیست اَت پیر مرد ءِ کاروان چوش جنز اِیت

ٹی بی پی ستاشانی

12 جولائی 1927 ءَ نواب مھراب ھان ءِ لوگ ءَ ودی بیتگیں بگٹی ٹک ءِ نوزدھمی سردار ءِ باگ ءِ سر ءَ کنوکیں نواب اکبر ھان بگٹی ءِ نمیرانی ءَ پانزدہ سال گوازینت ءُ اے کوھانی تہ ءَ جِک دیوکیں شوک ءُ ڈولڈاریں ھسا ءِ دست ءَ کنوکیں اسپیت ریش ءُ چھرگ ءِ تہ ءَ بیمانی ودی کنوک مروچی ھم آئی ءِ یاتگیری ءَ بلوچستان ءِ میتگ میتگ اے پھری پرس ءَ دارگ ءَ اِنت –

بازیں تکاں اے گمان نیست اَت پیر مرد ءِ جِک دیوکیں ھسا بازیں سالاں پد ھم ورنائی ءِ دروشم ءَ زندگ بیت کنت بلے آئی ءِ سُھر تاک ءُ گوھریں گالاں بلوچستان ءَ یک ھنچیں روہ ءِ بکش اِت کہ آئی ءِ وشبو بلوچستان ءِ کُنڈ کُنڈ ءَ شنگ ءُ تالان بیت –

بلوچانی گھگیریں کماش بلوچستان ءَ پانزدہ فروری نوزدہ سد ءُ ھپتاد ءُ سَے ءَ بہ گر داں سَے جنوری نوزدہ سد ءُ ھپتاد ءُ چار ءَ بلوچستان ءِ سیزدھمی گورنر بیتگ اَت –

بلوچستان ءِ ھسا دست ءَ کنوکیں کماش چار فروری نوزدہ سد ءُ ھشتاد ءُ نُھ ءَ بہ گر داں نوزدہ سد ءُ نود ءَ بلوچستان ءِ پنچمی سروزیر بیتگ اَت –

اگاں راجدپتر ءِ تہ ءَ چوشیں سر کم گندگ ءَ کیت گڑا ھمود ءَ نواب اکبر ھان بگٹی ءِ وڑیں کماش جھد ءِ نوک رُستگیں ورنایانی تہ ءَ رُدوم ءِ تہ ءَ گون کپ اَنت –

ھنچش آئی ءِ اگدوانی رمس ءُ سال گندگ ءَ کاینت ھنچش آئی ءِ نمیرانی ءِ سال ھم ھمے نزیکیں کڑیانی تہ ءَ ھوار بیت کُت کن اَنت –

پانزدہ سال ءِ گوزگ ءَ پد ھم بلوچانی دل ءَ بگٹی ءِ ھون انگت ءَ کوھلو ءِ نگپھانیں کوھانی تہ ءَ ترپگ ءَ اَنت ءُ انگت ءَ ھمے گمان بیت اِنت بلوچ بگٹی ءِ داتگیں دیمونیاں یک تچکیں رنگے ءَ یاتگیری کنگ ءَ اَنت –

نواب بگٹی تئی بارو ءَ گوشگ بیت اِنت تو وتی وانگ ایچی سن کالج ءَ وتی وانگ سرجم کتگ ءُ چریشی ءَ پد تو آکسفورڈ وانگ سرجم کتگ ءُ نوزدہ سد ءُ چِل ءُ شش ءَ وتی ٹک ءِ نوزدھمی سردار گچین کنگ بیتگ ئے –

بلوچستان ءَ نواب بگٹی ءِ اے کاروان ءِ برجم کنگ ءَ بازیں مردم بے ستک بیتگ اَنت کہ آ یک سردارے ءُ آ ھچبر راج ءِ دیمروئی ءَ لوٹ اِت نہ کنت بلے اے چیزانی سرجم بیگ ءَ پد نواب بگٹی ءَ اے گپ ءُ ھیال ءُ لیکہ بلوچانی تہ ءَ ودینت کہ من سرداری ءِ ھواری ءَ شُمئے پانک ءَ ھن جُت کُت کن آں –

بلوچ سردار یا بلوچ رھشون؟ اے گپ آئی ءِ نیمرانی ءَ پد آئی ءَ را رھشونی ءِ پنام بکش اِت ءُ ھروھدی ءَ آ یک رھشونی ءِ بستار ءَ بلوچ مھلوک ءِ دل ءُ مازگانی تہ ءَ نمیران بیت –

بزانکہ نواب اکبر ھان بگٹی ءَ کوھلو مری ٹک ءِ سیادانی ھواری ءَ سال دوھزار ءُ سَے ءَ بہ گر داں دوھزار ءُ شش ءَ بلوچ راجی زرمبشت ءِ واستا وتی کاروان ءِ بور سرکار ءِ ھلاپ ءَ تاچینتگ اَت –

اے ھما روچ اَت کہ بلوچستان ءِ کُنڈ کُنڈ ءَ یکشل ءَ کپان بیت ءُ سال دوھزار ءُ شش ءُ بیست ءُ شش اگست ءِ روچ اَت کہ کوھلو ءِ کوھانی تہ ءَ بمبگواری کنگ ءَ نواب اکبر ھان بگٹی وتی سِی ءُ ھپت ھمراھانی ھواری ءَ نمیران بیتگ اَت –

بلوچ پدریچ نواب اکبر ھان بگٹی ءِ کاروان ءَ داں کجا سر کن اَنت کجام ھد ءَ وتی سر ءَ ستک دار اَنت اشی ءِ پدراھی ءَ بلوچستان ءَ ھستیں زرمبشت پدر کنگ ءَ گندگ بیت اِنت –