شال: سی ٹی ڈی ءَ دروگیں میڑ ءَ دو سال پیسری آوار جتگیں مردمے کُشتگ

سربوتگیں ھالانی رِد ءَ پاکستان ءِ پوجی ادارہ کاؤنٹر ٹیررازم ڈیپارٹمنٹ (سی ٹی ڈی) ءِ یک دگہ دیم پہ دیمی میڑے دروگ بوتگ، دروگیں میڑ ءَ دو سال پیسر زورانسری آوار جنگ ءُ بیگواہ بوتگیں مردمے کُشگ بیتگ کہ آئی ءِ کھول ءَ پدر کُتگ –

ھمے ماہ ءِ دوازدہ رمس ءَ سی ٹی ڈی ءَ ٹاہ داتگ ات کہ شال ءِ دمگ نیوکاھان ءَ دیم پہ دیمی میڑ ءَ بلوچ لبریشن آرمی پنچ باسک جنگ بیتگ کہ آھانی تہ ءَ خان محمد ءُ جمیل احمد ءَ ھوار دگہ سَے مردمے نام ھوار اَنت-
دومی نیمگ ءَ بلوچ لبریشن آرمی ءَ اے میڑ رد کُتگ ات ءُ گل ءِ جارکش ءَ وتی درشان ءِ تہ ءَ گوشتگ ات کہ گل ءِ باسکانی ھچ وڑیں میڑ نہ بوتگ بلکیں آوار جنگ بوتگیں مردم کُشگ بوتگ انت –

اے دروگیں میڑ ءَ جنگ بوتگیں یک مردمے ءِ پجار خان محمد جھمنند سوراب گدر ءِ نام ءَ چہ بوتگ، خان محمد ءِ کھول ءَ آئی ءِ پجار راست کُتگ گوشتگ کہ اے دوسال پیسر پاکستانی پوج ءَ چہ پنجگور ءَ زورانسری آوار جتگ ءُ بیگواہ کتگ بیتگ –

ھمے وڑ ھمے ماہ ءِ چاردہ رمس ءَ سی ٹی ڈی ءَ ٹاہ داتگ اَت ءُ گوشتگ ات کہ آھاں بلوچ سلاہ بندیں گل ءِ دو مردم سراج احمد ءُ حسن جان گوں سلاہ ءُ شورواں دزگیر کتگ انت –

پد ءَ رند ءَ ہیومن رائٹس کونسل آف بلوچستان ءَ اے نامانی شوھاز کُت گڑا سرپد بوت کہ دوئیں مردم سراج احمد ء واحد بکش ءُ حسن جان ء رحمت زورانسری آوار جنگ بوتگیں مردمانی لڑ ءَ ھوار انت – دؤیں ورنا یازدہ جون دوھزار ءُ بیست ءُ یک ءَ پاکستانی پوج ءَ آوار جتگ انت ءُ ھما انت کہ گار انت –

زانگ بہ بیت اشی ءَ پیش ھم سی ٹی ڈی ءِ نیمگ ءَ چہ شال ءُ مستونگ ءَ دروگیں میڑانی راستی پدر بوتگ اَنت وھدیکہ پنجگور ءُ دگہ دمگاں دزگیریانی سر ءَ ھم شک دارگ بوگ ءَ انت –