نبشتانک: بلوچی زبان چون دربرگ بیت؟
نبشتہ کار : ھاتر اسلم
دی بلوچستان پوسٹ
دنیا ءِ تہ چوشیں کارے نیست کہ آ کنگ نہ بیت ھنچوکہ یک زانتکارے گْوش ایت “ھما وھد ءَ تئی دماگ، جسم ءُ روح پجیگ ءَ کار بہ کن اَنت، گڑا تو ھرچی کت کن ئے” بزان تو یک کارے دل ء سِتک کنگ بہ لوٹ ئے گڑا الم کت ئِے کن ئے-
نون گڑا گپ بلوچی زبان ءِ دربرگ ئیگ اِنت، بازین ءِ گْوش اِیت مئے ماتی زبان ماں سرکاری وانگجاھاں وانینگ نہ بوگ ءَ اَنت. گڑا ما چتور وت ماتی زباناں(بلوچی ءُ براھوی) ونت کرت کن ایں. ھنچوکہ من پیسَر ءَ گْوشت ھرچی کنگ بیت بس اے مردم ءِ جند ءِ سر ءَ اِنت کہ آ چنچو کار ءِ واستا تیار اِنت دگہ ھستی ءِ نبشتہ کنت، “کار ءِ کنگ ءَ چہ پیسر وتی سر ءَ یکین بہ کن” ترا اگاں وتی جند ءِ سر ءَ یکین بوت ءُ دومی مردمانی گپّاں چہ دل پروش نہ بوت ئے ، گڑا تو ھما وڑ کرت کن ئے کہ ھما وڑ تو واب دیستگ کہ تو بہ کن ئے نون بلوچی زبان ءِ وانگ ءِ واستا تئی جند ءَ را تیار بوگ لوٹ ایت-
دگہ یک چیزے شری ءِ سر ءَ دلگوش کنگ لوٹ ایت کہ مئے وانگجاھاں مئے ماتی ءُ راج زبان بیھ وانینگ نہ بوتگ اَنت ءُ انگت وانینگپ نہ بوگ ءِ برابر انت بلے انگت مئے زبان زندگ اِنت ، نبشتہ کار گیشتر بوان اَنت ءُ مئے لبزانک یک شریں وڑے ءَ ردوم زُران اِنت. گڑا اِد ءَ اوں اے ھبر دلگوش کنگ کَرز اِیت کہ آیاں بلوچی زبان چتور دَربُرتگ اے آیانی مھروانی اِنت کہ بلوچی ماں وانگجاھاں وانینگ نہ بیت بلے انگت آ جھد ءَ اَنت وتی لبزانک ءَ یک شریں نامے بہ دے اَنت-
مرچی باند ءَ وَ ‘سوشل میڈیا’ ءُ ‘انٹرنیٹ’ ءِ دَور اِنت ھر چیز ءَ بو لوٹ ئے ترا ھما وھد ءَ رَس ایت-
ھمے پیم ءَ بلوچی زبان ماں سوشل میڈیا ءَ ترا ھم دست کپ ایت بزان کہ ترا وانینگ بیت. من مرچی وتی زبان ءَ نَبیسّگ ءُ وانگ زان آں گڑا من ھمے سوشل میڈیا ءُ وٹسپی دیواناں چہ دربرتگ اے ھم مئے برات ءُ واجھانی زبان دوستی ءُ راجدوستی اِنت کہ وتی وھد ءَ چہ وھد کَش اَنت ءُ وتی زباناں وانین اَنت-
مئے واجہ ءُ برات ءُ گھار اَود ترا اَنچوش وانین اَنت ھنچوکہ تو ماں وانگجاھاں وان ئے اے دیواناں ھما مردم ھچ وانگ ءِ جند مہ زانت آ ھم شریں وڑے ءَ بلوچی دربَرت ءُ وت ءَ لبزانک ءِ یک شریں باسکے جوڑ کنت.پرچا اَود ءَ ھرچ دَرونتے(Lesson) روان دیگ بیت اَلم آ درونت ءِ تواربند(Voice) اوں روان دیگ بیت.اود ءَ بلاھیں زانتکار ءُ شائر ھم ھوار اَنت آ راج ءِ ھرچ وڑ ءَ وانینگ ءَ ساڑی اَنت اود ءَ چکاس گرَگ ھم بیت-
اے جھد ءَ لھتیں جوانیں اُستاد دیم ءَ بَرگ ءَ اِنت: اُستاد سَکی سَاوڑ، اُستاد گُل بلوچ، اُستاد زباد واھگ، اُستاد اَسد مراد، اُستاد زھیر مَلنگ، اُستاد سُیھل دشتی کہ من اے اُستاداں چہ سک باز دربرتگ ءُ دگہ بازیں واجہ ءُ براتے اے جھد ءَ دیم ءَ تیلانک دیان انت اے آیانی زبان دوستی ءِ مھر اَنت بے زَرّ ءَ وتی زبان ءَ وانین اَنت-
اے واجھاں سک باز وٹسپی دیوان( WhatsApp Group) اڑ کرتگ کہ اَود ءَ شپ ءُ روچ زبان ءِ دیمروئی ءِ واستا جھد ءَ اَنت پرچاکہ زبان راجانی پَجار اِنت- اے زبان اِنت کہ یک راجے ءَ چہ دومی راج ءَ یک جُتایں پجارے دَنت. ما اگاں یک جُتایں پجارے لوٹ ایں گڑا مارا اَلم وتی زبان وانگی اَنت ءُ نبشتہ کاری دیم ءَ بَرگی اِنت. گڑا مارا یک مھکَمیں پجارے ماں اے دنیا ءَ رَس اِیت-
نون تو چون وتی زبان ءَ ونت کُرت کن ئے ءُ درونت ترا ءَ چہ کجا ءَ دَست کپ اَنت؟ اے دَرگت ءَ مئے براتانی جھد توسیپ ءُ ستا کرز اَنت کہ آیاں یک بلاھیں جھدے بندات کرتگ وتی راجی ءُ ماتی زبان بلوچی ءَ ماں ‘Facebook’ ءَ وانینگ ءَ اَنت شما ماں پیسبُک ءَ “Balochi Language” نبشتہ بہ کن اِت اود ءَ شمئے دیم ءَ سک باز Page O group کیت اود ءَ شمارا بلوچی درونت سرجمی ءَ رَس اَنت ءُ اود ءَ شمارا وٹسپی دیوانانی ‘Link’ ھم دست کپ اَنت شما وٹسپی دیواناں ھوار ھم بوت کن اِت ءُ اَلم وتی زبان ءِ وانگ ءُ نبیسّگ ءَ زوت دَربر اِت-
گُڈسر ءَ، گُلیں راج ءَ گوں دَزبندی اِنت وتی زباناں اَلم بہ وان اِت.مرچی وَ اے وباؤ ءِ سَبب ءَ بلوچستان ءِ سرجمیں وانگجاہ بند اَنت ءُ بازیں مردمانی وھد زوال اِنت چہ وھد زوالی ءَ وتی زبانانی وانگ گھتر اِنت اُمیت اِنت راج چہ وتی وھد ءَ یک کسانیں اَدارکے کَش ایت ءُ وتی زبان ءَ وان ایت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔