بلوچ اسٹوڈنٹس ایکشن کمیٹی ءِ نیمگ ءَ شال ءَ پروفیسر عزیز بگٹی ءِ یات ءَ ادبی ستاشانی ءَ مراگش

بلوچستان ءِ بنجاھی شھر شال ءَ بلوچ اسٹوڈنٹس ایکشن کمیٹی ءِ نیمگ ءَ پروفیسر عزیز بگٹی ےِ یات ءُ آئی ادبی ستاشانی ءِ واستا شال ءَ مراگش برجم دارگ بیتگ –

مراگش ءَ بازیں کچے ءَ نودربر، استاد ءُ ادب دوستیں مردماں بھر زرتگ ءُ مراگش پُر مڑا کرتگ – مراگش ءَ بلوچ ادیب ءُ کواساں بھر زیروکیں مردمانی دیم ءَ وتی لیکہ درشان کرتگ ءُ پروفیسر عزیز بگٹی ءِ ادبی کار ءُ سرگوست ءِ سر ءَ ڈاکیومینٹری ھم پیش کرتگ ءُ بک اسٹال ھم برجم داشتگ –

مراگش ءَ پروفیسر منظور بلوچ، پروفیسر حامد بلوچ، پروفیسر ممتاز بلوچ، یار جان بلوچ، ایڈوکیٹ عمران بلوچ ءُ پروفیسر عزیز بگٹی ءِ چُک زبرین بگٹی ءَ بھر زیروکیں مردمانی دیم ءَ تران کرتگ ءُ وتی وتی لیکہ درشان کرتگ اَنت –

تران کنوکاں پروفیسر عزیز بگٹی ءِ ادبی کارانی سر ءَ ستاشانی کرتگ ءُ آئی ءِ سرگوست ءُ جد ءُ جھد ءِ سر ءَ سنگیں گپ ءُ تران-

آیاں گوشت کہ بلوچ ادب ءَ پروفیسر عزیز بگٹی ءِ کرد سر ءَ پینل ڈسکشن ءَ پینلسٹ ءَ گوشتگ کہ پروفیسر عزیز بگٹی ءَ بلوچ ادب ءَ یک ھنچیں وھدے ءَ نشتاری، سیاستکاری، چاگرد ءُ راجدپتر ءَ یک ھنچیں راستیں راھے ءِ پرینگ ءَ ھنچیں ارواھے بکش اِتگ کہ ھمود ءَ بلوچ راج ءَ نا اشنائیں مردم بلوچ راجدپتر ءُ آئی ءِ چاگردی ارزشت ءِ سر ءَ ند چِستی بیتگ – آئی ءَ بلوچ ادب ءَ نبشتاری ءِ وڑ ءُ پیماں رژنا کرتگ –

بلوچ اسٹوڈنٹس ایکشن کمیٹی ءَ گوشتگ کہ پروفیسر عزیز بگٹی ءِ یات ءُ آئی ءِ ادبی جوانیں کارانی سر ءَ ستاشانی کنت ءُ مراگش ءَ پروفیسر عزیر بگٹی ءِ ادبی گران بھائیں جھد ءُ سرگوست ءِ سر ءَ یک ڈاکیومینٹری ءِ پیش کنگ ءُ برجم داشتگیں مراگش ءَ بُک اسٹال برجم دارگ بیتگ –

آئی ءَ وتی درشانی ءِ گڈسر ءَ گوشتگ کہ بلوچ اسٹوڈنٹس ایکشن کمیٹی یک دیمروئی دوستیں نودربر گلے ءِ بستار ءَ ھروھد ءَ لبزانکی مراگش برجم داریت ءُ بلوچ ادیب ءُ کواسانی زانت ءُ زانشت مئے واستا مزنیں ارزشتیں مڈی اَنت ءُ آیانی مڈی ءُ گران بھائیں زانت ءَ گل ھروھد ءَ مھکم داریت اِنت –