کیچ ءَ پاکستانی پوج ءِ دست ءَ زورانسری آوار جنگ بوتگیں دو ورنا یل کنگ بوتگ اَنت

دی بلوچستان پوسٹ پتر ءَ سر بوتگیں ھالانی رِد ءَ بلوچستان ءِ دمگ کیچ ءِ بنجاھی شھر تربت ءُ تمپ ءَ پاکستانی پوج ءِ دست ءَ زورانسری آوار جنگ ءُ بیگواہ بوتگیں گلشیر بلوچ ءِ محمد جان ءُ تلال ء چئیرمین دوست محمد مروچی یل بوتگ ءُ وتی گِساں سر بوتگ اَنت –

تلال بلوچ بیست ءُ سَے مئی ءِ شپ ءَ پاکستانی پوج ءَ دگہ نُھ کسانی ھمراھی ءَ آوار جتگ ءُ بیگواہ کتگ ءُ پد ءَ آئی ءَ ھواری ءَ آوار جنگ بوتگیں درسیں ھمراہ یک یک ءَ یل کنگ بوتگ انت –

ھمے وڑ کیچ ءِ دمگ تربت ءَ چار سال ساری شانزدہ اگست دوھزار ھبدہ ءَ پاکستانی پوج ءَ گلشیر بلوچ زورانسری آوار جتگ ءُ بیگواہ کتگ کہ مروچی آ چہ ریاستی ازیت جاھاں یل کنگ بوتگ ءُ گِس ءَ سر بوتگ –

زانگ بہ بیت بلوچستان ءِ جتا جتائیں دمگاں پاکستانی پوج ءِ زوراکی یکشل ءَ برجاہ انت تنی وھدی ھزارانی کچ ءَ بلوچ نودربر ورنا ءُ کماش سیاسی رھشون زورانسری آوار جنگ ءُ بیگواہ کنگ بوتگ انت کہ آھانی تہ ءَ کمے کساس ءَ مردم یل کنگ بیتگ اَنت –

دومی نیمگ ءَ شال ءَ گار ءُ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ اِنت –

گل ءِ گوشگ اِنت کہ ھمود ءَ کم کساساں مردم یل بیگ ءُ دومی نیمگ ءَ دوسری مردم گرگ ءُ گار کنگ بیگ ءَ اَنت – وی بی ایم پی ءِ رِد ءَ تنی وھدی پنجاہ ءَ ھزار ءَ گیش مردم پاکستان ءِ چیریں زنداناں بندیگ انت –