بیگواھیں ڈاکٹر دین مھمد ءِ بیگواھی ءَ دوازدہ سال سرجم بیگ ءَ کراچی ءَ زھرشانی

زھرشانی بیگواھیں ڈاکٹر دین مھمد بلوچ ءِ جنک سمی دین ءِ دزبندی ءَ کنگ بیتگ، زھرشانی کراچی آرٹ کونسل ءَ بندات بیتگ ءُ تران ءُ پریس کلب ءِ دیم ءَ شتگ –

زھرشانی ءَ بازیں کچے ءَ نودربر، سیاسی گل، بلوچ یکجھتی کمیٹی، سندھی رھشون ءُ چُک ءُ زالبولاں ھوار جتا جتائیں پھناتاں ھواریں مردماں بھر زرتگ –

زھرشانی ءَ زھرشانی کنوکانی دستاں ڈاکٹر دین مھمد بلوچ ءِ اکس ءُ نبشتگیں بینر ءُ دگہ بیگواھیں مردمانی کھول ھوار بیتگ اَنت –

زھرشانی کنوکاں شھر ءِ دگانی سر ءَ ڈاکٹر دین مھمد بلوچ ءِ یل کنگ ءِ واستا اوگام جتگ ءُ سرکار ءَ لوٹ کرتگ کہ آ اے دوازدہ سالاں بندیگ کرتگیں بلوچ ڈاکٹر ءَ یل بہ کنت ءُ آئی ءِ زھگانی پریاتاں گوش بہ داریت –

زھرشانی ءَ ڈاکٹر دین مھمد ءِ جنک سمی دین ءَ تران کرتگ ءُ گوشتگ کہ اشی ءَ شما سرپدے کہ من ھرکجا برے سارتی ءُ برے لھڑیں گرمانی تہ ءَ وتی پت ءِ شوھازگ ءَ دراں ٹکان اَنت –

سمی دین ءَ گوشتگ کہ ھچ چوشیں جاہ ءِ پش نہ گپتگ کہ اود ءَ من ءَ وتی پت ءِ یل کنگ ءِ اُمیت بیتگ اَنت، آئی ءَ گوشت کہ من کسان اُمری ءَ وتی راہ ھمے سفر ءَ گوں بندوک کرتگ ءُ اے دوازدہ سال اَنت ءُ دوازدہ روچ نہ اَنت-

آئی ءَ گوشت کہ من وتی زند ءَ ھنچش تکانسراں کہ منی ءُ منی کھول ءِ زند ناوشیں رنگے ءَ گوزگ ءَ اَنت ءُ ھنچش سما بیت کہ وتی زند ءَ ھمے ادارھانی دیم ءَ ببا بہ دے ءُ اے کلوہ ءَ بہ دے آ کجام انسانیت ءِ ٹاہ ءَ دیگ ءَ اَنت –

آئی ءَ گوشت کہ من بیست ءُ یکمی کرن ءَ دگ ءُ دگہ چیزانی لوٹ ءَ نہ کنگ ءَ آں ءُ من وتی پت ءَ لوٹگ ءَ آں،آئی ءَ گوشت کہ اگاں مئے مردم جنگ ءُ گار کنگ بیتگ اَنت ءُ آیانی ھڈ مارا پیشدارگ بہ بنت –

آئی ءَ گوشت کہ اے دوازدہ سالاں ھما انسان ھکانی واستا یک شھماتے بیت کہ آ تنی وھدی مارا انساپ دیگ ءَ بے سوب بیتگ اَنت –

زھرشانی ءَ بھر زیروکیں مردماں تران کرتگ ءُ گوشتگ کہ اے ھما وھد اِنت کہ اے گوانک پیسر ءَ بلوچستان ءَ بس بیتگ ءُ نِی اے بیگواھی ءِ گوانک جنوک سندھ، پکتونواہ ءُ پنجاپ ءَ ھم سر بیتگ –

زھرشانی ءَ بلوچ نودربر رھشون شبیر بلوچ ءِ گوھار سیما بلوچ ھم ھوار بیتگ ءُ آئی ءَ تران کرتگ ءُ گوشتگ کہ من ھمے رنگ ءَ سمی ءِ وڑ ءَ پنچ سالاں وتی برات ءِ ودار ءَ نیشتگ اَنت –

سیما ءَ گوشت کہ من ھروھد ءَ لوگ ءَ رواں گڑا منی مات من ءَ اے گپ ءَ جُست کنت سیما تو شتگے شبیر ءِ بارہ ءَ ھال ھست؟ یا ناں؟ من آئی ءِ دیم ءَ بے توار باں –

ھمے وڑ ءَ ڈاکٹر دین مھمد بلوچ ءِ یل کنگ ءِ واستا چاگردی رسانکجاہ ٹوئٹر ءَ ھم #SaveDrDeenMohdBaloch ھیش ٹیگ کارمرد کنگ بیتگ ءُ انگت ءَ بازیں ھسابے ءَ بلوچ تکاں بندوکیں مردم ھمے ڈس ءَ کارمرد کنگ ءَ اَنت-

ڈاکٹر دین مھمد سال دوھزار ءُ نُھ ءَ بلوچستان ءِ دمگ ھزدار اورناچ ءَ سرکاری ھسپتال ءِ ڈیوٹی ءِ وھد ءَ آوات جنگ بیتگ –

آ روچ ءَ پد آئی ءِ زھگاں بلوچستان ءَ ھوار کراچی، اسلام آباد ءَ یکشل ءَ زھرشانی کنگ ءَ گندگ ءَ آیگ ءَ اَنت ءُ اشی ءَ ابید سال دوھزار ءُ چاردہ ءَ سمی دین ءَ وائس فار بلوچ پرسنز ءِ وائس چیئرمین ماما قدیر، زاکر مجید ءِ گوھار فرزانہ، بیگواھیں رمزان ءِ زھگ الی ھیدر ءِ ھمراھی ءَ شال کراچی داں اسلام آباد ءَ پند ءَ روانک جتگ –