راج وتی راجی زّبان ءَ چی ءَ رَد نبیسّ ایت- ابدلستار بگٹی

نبشتانک: راج وتی راجی زّبان ءَ چی ءَ رَد نبیسّ ایت

نبشتہ کار : ابدلستار بُگٹی

دی بلوچستان پوسٹ

رَدی وَ بنی آدم ءِ دست ءَ بیت ءُ بنی آدم ءَ مُدام چہ ردیاں دربُرتگ پمیشکا من ءَ ھم رَدی دوست بنت چی ءَ کہ داں وھدے ما رَدی نہ کن ایں ما ھچ دربُرتگ نہ کن ایں۔ اِے ٹَوکاں من نہ گْوشگ ءَ آں بلکیں گیدی ءِ بلاھیں زانتکار ءُ شاھزانت ھم گْوش اَنت انچوشکہ واجہ ھینری پورڈ جاھے ءَ گْوش ایت “بُندری رَدی ھما اِنت کہ ما چہ ھما ردی ءَ ھچ دربرگ ءِ دلگوش نہ کن ایں”
واجہ پاول بیر بریانٹ گْوش ایت “وھدے کہ تو رَدی یے کن ئے گُڑا ترا سَے چیز چَہ ھمے رَدی ءَ دلگوش کنگ لوٹ ایت: وتی رَدی ءَ بہ منّ، چہ ردی ءَ دربر ءُ ردی ءَ دوبار مہ کن”
واجہ بریڈون مُل گْوش ایت “سرپدیں مردم چہ وتی رَدیاں دربر اَنت البت شیوّار چہ دِگر ءِ کُتگیں رَدی ءَ دربرگ ءِ جُھد کن اَنت”
اگاں تو ردی ءِ بستار ءُ ارزِشت ءِ بابت ءَ گیشتریں پٹ ءُ پولے کنگ لوٹ ئے گُڑا چہ گوگل پریام ءَ شوھاز بہ کن گُڑا ردی ءِ بابت ءَ اود ءَ ھم ترا بازیں سرپدی یے رس ایت۔ البت ترا اود ءَ ھم ھمے یکیں سرپدی رس ایت کہ ردی دربرگ ءِ بُندری پادینک اِنت بزاں نودربری ءَ بِہ گر داں شاھزانتی ءَ ردی بنی آدم ءِ ھمراہ اِنت ءُ بنی آدم مُدام ءُ یکشل ءَ چہ وتی رد کُتگیناں دربرگ ءِ جُھد ءَ انت۔

نی ما وتی نبشتانک ءِ سر ءَ کا این ءُ گپ کن ایں مئے راجی زُبان بلوچی چی ءَ رَد نبیسّگ بیت؟! مارا یک ٹوکے ءِ سر ءَ تچک بیگ لوٹ ایت کہ دنیا ءِ توک ءَ تھنا ھما راجانی زُبان دیمروئی کنات وھدے کہ آ وتواجھیں راج ءِ زھگیں نودربر ءُ پدریچ وتی راجی زُباناں وت ماں وانگجاھاں وان اَنت، راجی زُبان ءِ روتاک، ماھتاک ءُ گِندگُش ءِ وڑیں آسراتی بہ بنت پد ءَ مرچیگیں زمانگ ءَ ھر راج ءِ وانِندگیں مھلوک ماں گْوانکواں پہ کلوہ، ٹپال ءُ گپ ءُ رپ ءَ وتی جِند ءِ زُبان ءَ کارمرز بہ کن اَنت۔ بلے پہ بلوچ راجی زُبان ءِ دیمروئی ءَ اِے آسراتی نیست ناں کہ بلوچ راج ءَ ماں وانگجاھاں جِند ءِ راجی زُبان وانینگ بنت ءُ ناں کہ پہ براھوھی ءُ بلوچی ءِ دیمروئی ءَ آسراتی یے ھست ءُ نَیکہ بلوچ راج ءِ تہ ءَ ھم چوشیں سرپدی ءُ آگاھی یے ھست کہ ما گْوانکو آنی تہ ءَ وتی راجی زُبان ءِ آبیکدار ءُ بزانت بلد ءَ ایرگیج ءُ کارمرز بہ کن ایں۔

البت ما راج ءَ یک سرپدی یے اَلم گْوشگ لوٹ ایں مارا وتی راجی زُبان رکینگ لوٹ ایت کہ مئے راجی زُبان ءِ زگریں گال گار ءُ بیگواہ مہ بنت۔ مارا وتی راجی زُبان وت وانگ ءُ زانگی انت ءُ پد ءَ کم کم ءَ دربرگ ءُ نبیسّگی انت۔ توری رَد ھم نبیسّ ایں بلے پد ءَ وت کم کم ءَ وت ھیل گِر ایں۔ راجی زُبان ءِ وانگ ءُ زانگ ءِ وھد ءَ مارا ھر چیز ھورت چارگی انت گُڑا ما چیزے دربر ایں۔ انچوشکہ دنیا ءِ ھر زُبان ءَ نامگال(Noun)، پنامگال(Pronoun)، کارگال(Verb)، کُمکّار گال(Helping Verb or Modal verbs)، ستاگال(Adjectives) ءُ تپور گال(Preposition) ءِ وڑیں رھبند چیز بنت۔ اگاں ما وتی راجی زُبان ءِ اِے چیزاں سرپد بوتگ ایں گُڑا بزاں ما وتی راجی زُبان ءَ وت سے روچ ءِ تہ ءَ زان ایں البت پد ءَ پہ ھیل کنگ ءَ مارا وانگ ءُ نبشتہ کنگ لوٹ ایت۔

انچوشکہ ما دْراہ سرپد ایں کہ بلوچی مئے راجی پجّار اَنت ءُ چہ زُبان ءِ وانگ ءُ نبیسّگ ءِ برکت ءَ سرجمیں راج ڈیھ دوست ءُ راجدوست بنت پمیشکا مرچاں بازیں بلوچ برات ءُ گْوھار پہ راجی زُبان ءِ دیمروئی ءَ ماں وٹس ایپ، ٹیلی گرام، پیسبُک ءُ دگہ دامگی پریاماں کار ءَ اَت۔ ھر کس راجی زُبان ءَ وت دربرگ ءُ دیم ءَ ھم وانینگ ءِ جُھد ءَ انت چریشی ءَ ما دْراہ زیت راجی زُبان ءَ وت وان این ءُ دربر ایں بلکیں پد ءَ دیم ءَ ھم وتی سْیاد، وارس، دزگْوھار ءُ سنگتاں راجی زُبان ءِ بارہ آگاھی دے ایں کہ ھر کس وتی گْوانکو آنی راست کارمرزی ءَ راجی زُبان ءِ نبشتہ ھیل کُت کنت۔

البت پہ بلوچی نبشتہ دربرگ ءَ من شُمارا یک سوج دیگ لوٹ آں کہ چوناھیگا ما دْراہ وَ بلوچ ایں پمیشکا ما دْراہ وتی ماتی ءُ راجی زُبان ءِ وانگ ءُ سرپد بیگ ءَ زبر ایں۔ گُڑا ما ءُ شُما لھتیں روچاں بلوچی نبشتانک، آزمانک ءُ گْوشکنداں وانان کن ایں، بزاں شُما ھم یک انچیں دابے ءَ بلوچی نبشتانک، آزمانک ءُ گْوشکنداں بہ وان اِت کہ شُما وت استاد اِت بزاں انچو نبشتھاں ھورت ءُ دلگوش ءَ وان اِت کہ شُما چَہ نودربرانی نبشتھاں ردیِاں چارگ ءَ اِت۔

بلے بَے (شَرت) ایش انت کہ ما ھر کسے پیسر ءَ وت راجی زُبان ءِ درونتاں سرجمی ءَ بہ وان ایں بزاں ما پیسر کارگال، کُمکّار گال ءُ ستاگال وڑیں چیزاں جْوان سرپد بَہ ایں۔ بزاں یکبرے بلوچی درونتانی وانگ ءَ رَند تو انچیں دابے ءَ بلوچی وانان کن کہ تو چہ نبشھاں نزوریاں چارگ ءُ رَدیاں پٹگ ءَ ئے گُڑا ھمے داب ءَ تو زیت دربر ئے۔ چریشی ءَ مستریں پائدگ ایش انت کہ ترا مُدام بلوچی درونت تاجگ بنت۔

منی راج ءِ بْرات ءُ گْوھاراں ما اُمیت کن ایں کہ شُما زیت وتی راجی زُبان ءِ نبشتہ دربر اِت چوناھیگا شّما وت بلوچ اِت پمیشکا پہ شُما بلوچی نبشتہ دربرگ ھچبر اڑ ءُ اڑاندے نہ بیت۔ بس ما اشتاپ مہ کن ایں ھمے ھیالداری بہ کن ایں کہ ھر چیزے ما نبیسّگ ءَ ایں گُڑا ما وت ھم ھمے نبشتگیں چیزاں دو سے رند ءَ چمشانک بہ دے این ءُ وتی نبشتہ رَدیاں وت کَشان کن ایں چی ءَ کہ ھر زُبان ءِ ندکار ءُ نبشتہ کار نبیسّگ ءِ وھد ءَ اشتاپیگ نہ بنت بلکیں دو سَے رند ءَ وتی نبشتگیں گالرِداں وت وانان ءُ وتی رَدیاں راست کن اَنت ھمے داب ءَ مارا چہ وتی رَدیاں دربرگ لوٹ ایت ءُ پہ راجی زُبان ءِ دیمروئی ءَ مارا وت جُنزان کنگی اِنت چی ءَ کہ اے مئیگ ءُ شُمئے راجی زمہ واری اِنت کہ ما راج ءَ سرپد کنان ءَ بلوچی وت دربر ایں ءُ وتی راج ءَ ھم وانین ایں کہ مئے بلوچ راجی زُبان ءَ ھم گیدی ءِ دگریں زُبانی ڈول ءَ دیمروی بہ رس ایت۔

بلوچ شالا میزران بات اَنت، راج شالا مُدام وتی راجی زُبان وانان ءُ راجدوست بہ بات اَنت ءُ راجی زُبان شالا دیمرویاں سربات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔