عثمان کاکڑ زمین ءِ میار، بلوچستان ءَ پرسیگ، باپاری بنجل

پشتونخوا میپ ءِ رھشون عثمان کاکڑ بنکی ھنکین مسلم باغ ءَ زمین ءِ میار کنگ بیتگ، ھزارانی کچ ءَ مھلوک ءَ بھر زرتگ –

ھمے ماہ ءِ ھبدہ رمس ءَ پشتون رھشون عثمان کاکڑ ءِ سر ءِ پروشگ ءِ سبب ءَ آ شال ءِ ھسپتال ءَ برگ بیتگ کہ اود ءَ آئی ءِ سر ءِ بُر ءُ برین کنگ بیتگ چریشی ءَ پد آ ھاسیں بالیگ ےِ سر ءَ کراچی ءَ غا ھان نادراہ جاہ ءَ برگ بیتگ اود ءَ نگھداشتیں کوٹی ءَ آئی ءِ درمانی بندات بیتگ ءُ بازیں روچاں درمانی کنگ ءَ ابید ھم آئی ءَ ٹپ نہ سگگ اِتگ ءُ بیران بیتگ –

گوستگیں روچاں آئی ءِ لاش ایمبولنس ءِ سر ءَ چہ کراچی ءخ دیم پہ شال ءَ آرگ بیتگ بلوچستان ءِ باپاری شھر ھب ءَ بہ گر داں شال ءَ مھلوک ءَ بازیں جاھاں ھب، اوتھل، بیلہ، وڈھ، ھزدار، سوراب، کلات، منگوچر، کھڈ کوچہ، مستونگ ءُ لکپاس ءَ پرتپاکی ءُ پُلانی گون ءَ ایمبولنس وش اتک کنگ بیتگ –

ھمے رنگ ءَ سریاب دگ ءَ شال ءَ ھاکی گراؤنڈ ءَ آئی ءِ لاش شش اداراں آرگ بیتگ ءُ اود ءَ ھزارانی کچ ءَ مھلوک جاڑیگ بیتگ اَنت، چریشی ءَ پد عثمان کاکڑ ءِ لاش ھسپتال ءَ سرد ھانہ ءَ برگ بیتگ ءُ مروچی سھب ءَ مُچی ءِ دروشم ءَ آئی ءِ بنکی ھنکین مسلم باغ ءَ برگ بیتگ کہ راہ ءَ بازیں جاھاں دگ ءِ کش ءَ اوشتوکیں مردماں آئی ءَ سھر چکیں دروت ندر کرتگ –

آئی ءِ جنازہ ءَ بلوچستان ءَ ھوار پاکستان ءِ سیاستکاراں بھر زرتگ مھمود ھان اچکزئی، ڈاکٹر مالک بلوچ، میاں مھمد افتخار، منظور پشتین ءُ محسن داوڑ ءَ ھوار بازیں مردماں بھر زرتگ ءُ ھزارانی کچ ءَ مردماں نماز جنازہ ءَ ھوار بیتگ اَنت –

نماز جنازہ جمعیت علما اسلام کے پی کے ءِ اُستانی امیر مولانا عطا الرحمٰن ءَ وانینتگ ءأ عثمان کاکڑ ھماھی ءِ گوشگ بیتگیں مانشجاہ ءَ زمین ءِ میار کنگ بیتگ –

ھمے وڑ ءَ بلوچستان ءِ بنجاھی شھر شال ءَ ھوار بلوچستان ءِ دگہ جاھاں پرسیگ ءُ دراھیں باپاری بنجل بند کنگ بیتگ اَنت –

بلوچستان ءِ اسمبلی ءِ اپوزیشن ءِ پاٹی ءَ عثمان کاکڑ ءِ غائبانہ نماز جنازہ بجلی تھانہ شال ءَ ونتگ –