چہ کیچ ءَ دو کس بیگواہ، چاگردی رسانکجاہ ٹوئٹر ءَ راشد ھسین ءِ یل کنگ ءَ کمپئین

ٹی بی پی پتر ھال ءَ سر بیتگیں ھالانی رد ءَ بلوچستان ءِ دمگ کیچ ءَ دو نودربر پاکستانی پوج ءَ آوار جتگ ءُ بیگواہ کرتگ اَنت –

گیشیں ھالانی رد ءَ کیچ ءِ دمگ گومازی ءِ ورنایے آوار جنگ ءَ پد بیگواہ کنگ بیتگ، آوار جنگ بیتگیں ورنا ءِ پجار ھپت تبک ءِ نودربر اسامہ ء مھمد جان ءِ نام ءَ زانگ بیتگ –

کھول ءِ رد ءَ کسان سالیں چُک ءِ اُمر ھبدہ سال اِنت ھب چوکی ءَ ھپتمی تبک ءِ نودربرے بیتگ ءُ بیست ءُ سَے مئی ءَ پوج ءَ کیچ ءِ دمگ گومازی ءَ لشکر کشی ءِ وھد ءَ آوار جتگ ءُ بیگواہ کرتگ کہ انگت ءَ بیگواہ اِنت –

بیست ءُ سَے مئی ءَ لشکر کشی ءِ وھد ءَ دَہ ورنا ءُ کسان سال آوار جنگ ءُ بیگواہ کنگ بیتگ اَنت کہ آیانی تہ ءَ یک دگہ نودربرے طلال ء دوست مھمد ھوار اِنت، آ دگہ مردمانی بیگواھی ءِ ھال ءَ پیسر ءَ کھولاں کرتگ اَنت کہ اسامہ ءِ آوار جنی ءِ ھال مروچی کھول ءَ راست کرتگ –

ھمے رنگ ءَ گوستگیں شپ ءَ پاکستانی پوج ءَ کیچ ءِ دمگ تربت ءَ تعلیمی چوک ءَ یک لوگے ءِ سر ءَ بیڑ برتگ ءُ اود ءَ عطا شاد ڈگری کالج ءِ نودربر امام ء سعید آوار جتگ ءُ برتگ –

ھمے رنگ ءَ ارب امارات ءَ بیگواھیں راشد ھسین ءِ واستا وی بی ایم پی ءُ دگہ مردماں چاگردی رسانکجاہ ٹوئٹر کمپئین کارمرد کرتگ –

ارب امارات ءَ بیگواھی ءَ پد پاکستان ءِ دست ءَ بیگ بیتگیں بیگواھیں راشد ھسین ءِ یل کنگ ءِ واستا چاگردی رسانکجاہ ٹوئٹر ءَ مروچی کمپیئن کارمرد کنگ بیتگ –

کمپیئین ءَ راشد ھسین ءِ یل کنگ ءِ لوٹ کنگ بیتگ ءُ داں انگت ءَ اے کمیئین #SaveRashidHussain کارمرد بیگ ءَ اِنت کہ چریشی ءَ بازیں پھناتانی مھلوک کامرد کنگ ءُ راشد ھسین ءِ یل کنگ ءِ لوٹ ءَ کنگ ءَ اَنت –

بلوچ ایکٹیویسٹ ھپسہ بلوچ ءَ وتی ٹوئٹر ءَ نبشتگ کرتگ ءُ گوشتگ کہ دو سال، پنچ ماہ ءُ بیست ءُ ھپت روچ سرجم اِنت کہ راشد ھسین پاکستان ءِ تھاریں زنداناں لَٹ ءُ کُٹاں سگگ ءَ اِنت –

آئی ءَ گوشتگ کہ اے سالاں بیگواھی ءَ آئی ءِ مات یکشلیں ودارانی درداں سگگ ءَ اِنت –

چاگردی رسانکجاہ ٹوئٹر ءَ بلوچستان ءَ بندوکیں چاگردی رسانک کارمرد کنوکیں پھناتانی مردم راشد ھسین ءِ اکس ءُ آئی ءِ بارہ ءَ نبشتگاں شنگ کنگ ءُ آئی ءِ یل کنگ ءِ لوٹ ءَ کنگ ءَ اَنت –

وی بی ایم پی ءِ نیمگ ءَ دیمتر ءَ گوشگ بیتگ کہ کھول ءِ گوشگ اِنت کہ راشد ھسین بیست ءُ شش دسمبر دوھزار ءُ ھژدہ ءَ ارب امارات ءَ دزگیر کنگ ءُ بیست ءُ دو جون دو ھزار ءُ نوزدہ ءَ امارات ءِ سرکار ءَ پاکستان ءِ دست ءَ داتگ کہ آئی ءِ راستی ءِ ھال ڈیھی رسانکدراں وت شنگ کرتگ، کھول ءِ گوشگ اِنت کہ راشد ھسین ءِ سر ءَ ھرچ بھتامے ھست آ امیدگساں موہ دیگ بہ بیت –

دومی نیمگ ءَ راشد ھسین ءِ گوھار فریدہ بلوچ ءَ مروچی وتی یک ٹویٹے ءَ گوشتگ کہ پاکستان ءِ گور ءَ راشد ھسین ءِ آوار جنگ ءِ سبباں ھچ منانک نیست ءُ ھمے سبب اِنت کہ راشد ھسین ءِ بارہ ءَ گپ جنگ ءَ نہ منّگ اِنت –

ھمے رنگ ءَ بیگواھیں ڈاکٹر دین مھمد ءِ جنک سمی بلوچ ءَ ٹوئٹر ءَ یک شنگ کرتگیں تامر بندے ءَ گوشتگ کہ مروچی ءَ دو سال پیسر بیست ءُ شش جون دوھزار ءُ نوزدہ ءَ انسانی ھکانی باسک راشد ھسین گیر کانودی رنگ ءَ چہ ارب امارات ءَ دیم پہ پاکستان ءَ آرگ بیتگ ءُ اے درچ ءَ ٹوئٹر ءَ یک کمپیئن ءِ بیگ ءَ اِنت اشی ءَ دراھیں مردم بھر بہ زور اَنت –