ھزدار: سُھرک ءِ نادراھی ءَ یکیں کھول ءِ سَے زھگ بیران بیتگ اَنت

سر بیتگیں ھالانی رد ءَ ھزدار ءِ دمگ وڈھ پلی ماس ءَ سُھرک ءِ نادراھی ءَ یکیں کھول ءِ سَے زھگ بیران بیتگ اَنت –

دمگی مردمانی گوشگ اِنت کہ جانسلامتی ءِ نادلگوشی ءِ سبب ءَ دمگ ءَ سُھرک شنگ ءُ تالان بیتگ ءُ چریشی ءَ پد انی سھرک ءِ نادراھی گیش بیتگ –

دمگی مردمانی گوشگ اِنت جانسلامتی ءِ گر ءُ دار کنوک اگاں گیش بے سما بیت اَنت گڑا بزانکہ اے نادراھی گیشتر مردم کُشت کنت اِنت –

اے درگت ءَ اسٹنٹ کمشنر وڈھ ءَ اھوالکاراں گوں گپ کنان ءَ گوشتگ کہ پلی ماس ءَ سئیں زھگانی بیرانی سُھرک ءِ نادراھی ءَ بیتگ ءُ چاگردی رسانکجاھاں لس مردم ڈسپنسری ءِ نام ءَ بھتام جنگ ءَ اَنت –

ھمے درگت ءَ دمگ ءِ لیویز بنشوناں ھم گوشتگ کہ چاگردی رسانکجاھاں گوشگ بیگ ءَ اِنت ردیں دوا ءُ سُچنانی سبب ءَ زھگ بیران بیتگ اَنت اے راستیں گپ ئِے نہ اِنت –

زانگ بہ بیت ھمے ماہ ءَ بلوچستان ءِ دمگ کیچ ءِ بنجاھی شھر تربت ءَ ھم سُھرک ءِ نادراھی ءِ ھال بیتگ کہ اود ءَ جانسلامتی ءِ کمکی کارمند نادراھی ءِ گر ءُ دار کنگ ءَ کڈن کنگ بیتگ اَنت –