روکپتی بلوچستان ءَ ایرانی بسیج ءِ سر ءَ بمب اُرش

بمب اُرش سراوان ءَ بیتگ کہ اود ءَ یک مردمے بیران ءُ سَے زدگ بیتگ اَنت –

سر بیتگیں ھالانی رد ءَ روکپتی بلوچستان ءِ دمگ سراوان ءِ شھر ءَ فلکہ کوزہ ءِ چار راہ ءَ ناشناسیں مردماں ایرانی بسیج ءِ سر ءَ بمب اُرشے کرتگ –

بمب اُرش ھما وھد ءَ کنگ بیتگ کہ ایرانی بسیج گوزگ ءَ بیتگ ءُ ھمے وھد ءَ ناشناسیں مردماں بمب تراکے کرتگ، بمب پرپَٹے ءَ بندوک بیتگ –

اھوالکار ءِ رد ءَ بمب تراک مھمد عبدین نامیں شھری ءِ بیران بیتگ ءُ دگہ سَے کس زدگ بیتگ اَنت-

روکپتی بلوچستان ءَ وھد وھد ءِ سر ءَ ایرانی پوج ءُ پولیس ءُ دگہ ادارھانی سر ءَ وھد وھد ءَ اُرش بیگ ءَ اَنت ءُ مروچی بیتگیں اُرش ءِ زمہ واری تنی وھدی کس ءَ نہ منّ اِتگ –

دمگ ءَ ھواریں مردمانی گوشگ اِنت کہ روکپتی بلوچستان ءِ سیمسری دمگ شمسر ءَ ایرانی لشکر ءِ دست ءَ کُشگ بیتگیں پوریاگرانی کوش ءَ پد روکپتی بلوچستان ءَ جاور نگیگ بیتگ اَنت –

زانگ بہ بیت گوستگیں وھداں ایرانی سیمسری لشکر ءَ تیرگواری کرتگ ءُ پوریاگر ءُ باپاری مردماں ھوار بازیں کچے ءَ مردم بیران بیتگ اِت اَنت چریشی ءَ پد روکپتی بلوچستان ءَ زرمبشت ءِ جنزگ ترند تر گندگ ءَ آیگ ءَ اَنت –