مشکے، گچک، سکن راگے ءَ پاکستانی پوج ءِ سر ءُ پُرانی تہ ءَ گیشی، لشکرکشی ءِ گمان

سربیتگیں ھالانی رِد ءَ مشکے ءِ کوھی دمگاں ھوار آواران ءُ پنجگور ءَ پاکستانی پوج ءِ سر ءُ پُرانی تہ ءَ گیشی اتکگ ءُ بالگرادانی بال برجاہ بیتگ، دمگی مردماں مزنیں لشکر کشی ءِ گمان پدر کرتگ –

دی بلوچستان پوسٹ

اھوالکار ءِ رِد ءَ مشکے ءِ دمگ تنک کور، گجر، راگے ءُ سکن ءَ مزنیں کساسے ءَ لشکر کوھی دمگانی تہ ءَ پُترتگ –

مشکے ءِ کوھی دمگاں ھوار گچک کھن، پینک کلانچ، گلی کنڈ ءَ ھم پاکستانی پوج ءِ تر ءُ گردانی تہ ءَ گیشی اتکگ –

ھمے وڑ چہ پنجگور ءَ سربوتگیں ھالانی رِد ءَ مروچی سرجمیں روچ ءَ سَے جنگی بالگردان گچک ءُ آواران ءِ کوھانی سر ءَ برز ءَ بال بیتگ اَنت-

زانگ بہ بیت اے دمگاں پیش ءَ چہ لشکر کشی بوگ ءَ اَنت ھمے گمان کنگ بیت لشکر کشی ءِ تہ ءَ گیشی آرگ ءِ پیسلہ کنگ بوتگ –

اے دمگاں ھوار بلوچستان ءِ بازیں دمگاں گوستگیں یک دھک ءَ گیش انت کہ پاکستانی پوج ءِ زوراکی یکشل ءَ برجاہ انت ـ لشکر کشیانی میان ءَ بازیں مردمے آوار جنگ ءُ بیگواہ کنگ بوتگ اَنت، اھانی تہ ءَ کمے کساس ءَ مردم یل کنگ بوتگ اَنت وھدیکہ دوسری آوار جنگ ءُ بیگواہ کنگ بوتگ اَنت آھانی تہ ءَ بازیں مردمے روچ ء مروچی گار ءُ بیگواہ انت بازینانی زانگولیں جون دست کپتگ انت –

اے درگت ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ رھشون ماما قدیر بلوچ ءَ گوستگیں روچ ءَ وتی درشان ءِ تہ ءَ گوشتگ ات کہ کیچ ءَ پنچ مردم یل کنگ بوتگ بلے دومی نیمگ ءَ کاھان ءُ سبی ءَ دگہ پنچ مردم پوج ءَ زورانسری آوار جتگ ءُ بیگواہ کتگ اَنت –

آئی ءَ گشتگ ات کہ انو پاکستانی پوج ءَ سرجمیں بلوچستان ءِ تہ ءَ وتی سُر ءُ پُر گیش کرتگ انت – چار روچ ءَ پیش کاھان ءَ پوجی زوراکیاں چہ پد گوستگیں روچ ءَ بمبور ءِ تہ ءَ لشکر کشی کنگ بوتگ وھدیکہ ایندگہ دمگاں ھم مزنیں کچے ءَ لشکر کشیانی گمان انت –