مروچی دھمی روچ ءَ اسلام آباد ڈی چوک ءَ بیگواھیں مردمانی کھولانی زھرشانی نندانک برجاہ

گوستگیں روچ ءَ لاھور ءَ اسلام آباد ڈی چوک ءَ نشتگیں مردمانی ھمدردی ءَ زھرشانی، ڈی چوک ءَ نشتگیں مردمانی گند ءُ نند ءَ جتا جتائیں پاٹیاں اتکگ ءُ ھمدردی ءِ درشان کرتگ –

گوستگیں شش روچاں اسلام آباد نیشنل پریس کلب ءِ دیم ءَ نندانک ءَ مروچی چارومی روچ ءِ سارتیں شپ گوں آس ءِ ھواری ءَ اسلام آباد ڈی چوک ءَ بلوچستان ءَ گار ءُ بیگواھیں مردمانی کھولانی نندانک برجاہ –

نندانک ءَ نشتگیں مردمانی کھولانی لوٹ اِنت کہ سروزیر عمران بئیت ءُ مارا سدکی ءِ واستا دوچار بہ کپ ایت بلے روچانی گوزگ ءَ ابید ھم عمران خان نیتکگ ءُ نندانک ءَ اپوزیشن سرکار ءِ جتا جتائیں پاٹیاں رؤ آہ برجاہ اِنت –

گوستگیں شپ ءَ نندانک ءِ چپ ءُ چاگرداں زالبول پولیس دارگ بیتگ اَنت ءُ ہیومین رائٹس آف پاکستان ءَ ھم بازیں پولیسانہ دارگ ءُ مردمانی ترسینگ بژنیگ گوشتگ –

نصر اللہ بلوچ ءَ گوشتگ کہ نندانک ءَ ھواریں آجزیں مات بازیں بیماریانی آماچ بیان اَنت اگاں یک ماتے ءَ تاوان بیت آئی ءِ زند ءُ دگہ چیزے ءَ تاوانی بیت گڑا آئی ءِ زمہ وار سرکار اِنت –

زھرشانی نندانک ءَ بلوچستان ءَ گار ءُ بیگواھیں مردمانی بازیں کھول ھوار اَنت ءُ آیانی تہ ءَ سمی بلوچ، ھانی بلوچ، حسیبہ قمبرانی ءُ سیما بلوچ، زاکر مجید ءِ مات، ماھزیب بلوچ، جھانزیب قمبرانی ءِ مات، حزب قمبرانی مات ءُ سعید اھمد ءِ مات، راشد ھسین ءِ مات ءَ ھوار دَہ ءَ گیش کھولانی مردم ھوار اَنت –

گوستگیں روچ ءَ لاھور ءَ اسلام آباد ءَ نشتگیں مردمانی ھمدردی ءِ واستا بلوچ یکجھتی کمیٹی ءِ دزبندی ءَ زھرشانی ءُ مروچی ھم تربت ءَ بلوچ یکجھتی کمیٹی ءِ دزبندی ءَ زھرشانی جار پِرینگ بیتگ اَنت –

ھمے وڑ ءَ گوستگیں روچ ءَ پاکستان ءِ بنجاھی شھر اسلام آباد ڈی چوک ءَ نشتگیں بیگواھیں بلوچانی کھولانی نندانک ءَ سرکاری ءُ اپوزیشن ءِ نمائندگ اتکگ ءُ کھولانی گون ءَ پدردی درشان کرتگ اِت-

اتکگیں مردمانی تہ ءَ پاکستان مسلم لیگ ءِ بنجاھی رھشون احسن اقبال، عوامی نیشنل پاٹی ءِ زاھد خان، بلوچستان نیشنل پاٹی ءِ رھشون جھانزیب جمالدینی، پشتونخوا ملی عوامی پاٹی ءِ عثمان کاکڑ، نیشنل پاٹی ءِ اکرم دشتی ءَ ھوار جماعت اسلامی ءِ امیر سراج الحق ءُ دگہ رھشوناں اتکگ ءُ گوشتگ کہ بلوچستان ءَ بیگواھیانی وئیل روچ پہ روچ دراج کش بیان اِنت ءُ اے جاورھال ءَ سنگینی جاورھال ودینتگ اَنت اگاں سرکار ءَ اے وھد ءَ الکاپی ءَ دلگوش نہ کت اَنت گڑا بلوچستان ءَ چہ دست ءَ شُت کنت –

آیاں گوشتگ مک پی ڈی ایم کھولانی گون ءَ اوشتاتگ ءُ پی ڈی ایم ڈیھ ءِ جمھوریت ءُ پارلیمنٹ برزی ءَ آؤرت کنت –

آیاں گوشت کہ چیریں ادارھاں سیاست ءِ دزمانجنی ءَ ما ھلاس کنگ ءِ جد ءُ جھد ءَ کنگ ءَ ایں ءُ سرجمیں ڈیھ ءَ مھلوک ءِ برزی ءِ سرجم کنگ ءَ جد ءُ جھد برجاہ اِنت

ھمے وڑ اسلام آباد ڈی چوک ءَ کاونٹر ٹیررازم ڈیپارٹمنٹ ءِ کارمنداں گوستگیں شپ ءَ زھرشانی کنوکانی بنجل ءِ چپ ءُ چاگرد انگیر کرتگ اَنت ءُ ایچ آر سی پی ءِ باسکاں بیگواھیں بلوچانی کھولانی گند ءُ نند کرتگ ءَ سروزیر عمران خان کھولانی گون ءَ گند ءُ نند ءِ دزبندی کرتگ –

ہیومین راٹس کمیشن آف پاکستان ءِ باسکانی یک ٹولی ءِ بیگواھیں مردمانی یل کنائینگ ءِ ھاتر ءَ اسلام آباد ڈی چوک ءَ برجاھیں کھولانی نندانک ءَ اتکگ ءُ ھمدردی ءِ درشان کرتگ ءُ گوشتگ کہ مارا ترس اِنت سرکار تاکت ءِ زور ءَ کھولانی پاد کنگ ءَ جتا جتائیں وڑ ءُ پیماں کار بندگ ءَ اِنت –

ایچ آر سی پی ءَ چاگردی رسانکجاہ ٹوئٹر ءَ اے گپ کرتگ کہ کھولانی گمان اِنت مارا سرکار تاکت ءِ زور ءِ سر ءَ مار پاد کنت –

آئی ءَ سروزیر پاکستان عمران خان ءَ بنجل ءِ تر ءُ تاب ءُ بیگواھیں مردمانی جیڑہ ءِ سر ءَ الکاپی ءَ دلگوش کنگ ءِ دزبندی کرتگ –

ھمے وڑ ءَ گوستگیں روچ ءَ پنجاپ ءِ بنجاھی شھر لاھور ءَ بلوچ یکجھتی کمیٹی ءِ دزبندی ءَ پاکستان ءِ بنجاھی شھر اسلام آباد ءَ گوستگیں نُھ روچاں نشتگیں بیگواھیں بلوچانی کھولانی گون ءَ ھمدردی ءِ کنگ ءِ واستا لاھور ءَ زھرشانی کرتگ –

لاھور ءِ جتا جتائیں وانگی ادارھاں بندوکیں نودربراں بازیں کچے ءَ بھر زرتگ ءُ آیانی دستاں پلے کارڈز ءُ بینرز بیتگ اَنت کہ آیانی سر ءَ بیگواھیں مردمانی یل کنگ ءِ لوٹ نبشتگ بیتگ اَنت –