نبشتانک: عبداللہ ثناء، منی سنگت ءُ مصری مچ
نبشتہ کار: اصغر بلوچ
دی بلوچستان پوسٹ
عبداللہ ثناء نادرئی ءِ ھال ءَ دیر انت کہ چاگِردی رسانکدر ءَ گردگ انت۔ یک روچے من پوسٹے دیستگ کہ فرنٹیر کروف( ایف سی) ءِ کماندان عبداللہ ئِے چارگ ءَ شتگ۔ دل ءَ گشت کہ نوں عبداللہ ءِ سر ءَ ھاوند ءَ رھم کتگ، نوں توجیلّ ئِے بیت۔ اے ھمے وھد ات کہ حیات مرزا تربت آبسر ءَ شھید کنگ بوتگ ات ءُ ایپ سی وتی کرد ءَ اندیم کنگ ءُ وتی ھونی ئیں دستاں شودگ ءِ جھدے کنگ ءَ ات۔ بلے ھیر، ھمے وھد ءَ منی سنگت اوں بیمار ات، شومک ءِ نادراھی ات ئِے،گڈی اسٹیج-
من یک روچے وتی سنگت ءَ گشُت، “شوم تو اد ءَ جرمنی ءَ بہ مر ئے،ما ترا ھمد ءَ بُن دے ایں، مئے کر ءَ چوشیں پیسہ نیست کہ ترا کبر بکناں،” (جرمنی مانش کنگ ءِ ھاتر ءَ مردم مانش ءِ جاگہ ءَ بھا زورگی انت ءُ ایوک ءَ کل ءُ کسارت ءِ ھرچ چاردہ پانزدہ ھزار یورو بیت،ملکی بیست ءُ پنچ لکھ ءَ بُرز بہ زُور ئے، ھمے ھاتر ءَ دمی آسانتریں راہ، بُن دیگ انت) من پد ءَ اے گشت،”مئے کر ءَ چوشیں پسھے نیست کہ تئی جُون ءَ ملک ءَ راہ بہ دیاں۔” بلے، منی سنگت نوں وش انت، سلامت انت؛ سے مزنیں آپریشن ( میجر سرجری) بوت۔ اے آپریشناں کساس ملکی کروڑ ءُ نیم ، تو انگت گیش بہ زور،اتکگ۔ بلے اے درائیں ھرچ جرمنی ءِ سرکار ءَ کتگ انت، بلے کہ منی سنگت ءَ اے ملک ءِ شناس نامہ گون نہ انت؛ ءُ ما پہ باھوٹی نشتگ ایں۔
گپ بندر ءَ عبداللہ ثناء ءَ چہ چست بوتگ ات۔ چار پنچ روچ بیت کہ چاگردی رسانکدر ءَ پد ءَ عبداللہ ثناء ءِ نادراھی ءِ ھال گردگ ءَ انت۔ عبداللہ ءِ تب سک ھراب بوتگ ءُ کراچی ءَ برگ بیتگ؛ نادرجاہ ءَ انت۔ ڈاکٹر ءِ گشگ انت کہ جگر ئِے مٹ کنگی انت۔ ءُ اے آپریشن کنگ ءِ ھرچ ءُ درچ ھشتاد لک انت۔ اے وھد ءَ عبداللہ ءِ دست ءَ ھچ نیست، اوست آرگنائزیشن آئی ءِ کمک ءُ ھرچ درچ ءَ مدت کنگ ءَ انت، ھمے رنگ ءَ واجہ اسحاق خاموش ھم وتی بالاد ءَ چاگردی رسانکدر ءَ کیمپن کنگ ءَ انت۔ھمے ڈول ءَ بازیں عبداللہ ءِ منوک آئی ءِ کمے کمک ءَ کنگ ءَ انت۔ مروچی من دیستگ کہ فدا شھید چوک تربت ءَ پہ عبداللہ ثناء ءِ توجیل ءِ درگت ءَ چندہ کنگ بوگ ءَ انت۔
عبداللہ ثناء ءَ من چہ کسانی ءَ زاناں؛ ھما وھد ءَ چہ کہ عبداللہ ءَ نوکی سوت جنگ بندات کتگ۔ آ مجتّی، مئے باگ ءَ اتکگ، ھمود ءَ سوت ئِے جتگ۔ من ءَ شر یاد انت کہ مدام عطا شاد ءِ اے شیر جتگ ئِے “اے چتوریں سر گنوک انت پہ کے ءَ ودار بند انت کسے دامنے نہ کرز ایت اے دلاں کوار بند انت”مئے باگ ءَ سے مصری( شکر) بوتگ،من سر گپتگ آں ءُ عبداللہ ءُ آئی ءِ سنگتانی واستا پپونک( رنگ) سر شتگ ءُ داتگ انت۔ وھدے کھن ءُ کور جوہ شت انت، گڑا منی پت ءَ ڈیزل بیکو مشین ءِ سر ءَ باگ ءَ داشت۔ بلے ڈیزل گران بوان بوت، پت ھم ھلاس بوان ات، گڑا ما وتی باگ ءِ جند یلہ کت، باگ مرت ءُ ویران بوت۔ اے شکریں مچ ھم گیمران بوت ءُ مُرت انت۔ مروچی من عبداللہ ءِ گیمرتگیں دیم دیست کہ آ گوں وزیر ءُ گزیراں دست بندی کنگ ءَ انت ،گڑا مروچی من ءَ وتی ملک ءِ مصری مچ یاد اتک انت کہ آ نوں مرتگ انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔