کوھلو ءَ کریمہ بلوچ ءِ ناساڑی ئیں نماز جنازہ وانگ بیتگ

بلوچستان ءِ دمگ کوھلو ءَ کریمہ بلوچ ءِ ناساڑی ئیں نماز جنازہ وانگ بیتگ -جنازہ ءَ سیاسی ءُ چاگردی مردماں بھر زرتگ ءُ ناساڑی ئیں نماز جنازہ ساھت یازدہ ءَ عیدگاہ ءَ وانگ بیتگ –

گوستگیں چار روچاں بلوچ نودربر گل آزاد ءِ گوستگیں سروک ءُ بلوچ زالبول رھشون کریمہ بلوچ ءِ نماز جنازہ سرجمیں بلوچستان ءَ ھوار پاکستان ءِ شھراں وانگ بیتگ – کریمہ بلوچ ءِ جسد ءِ آرگ ءَ پد بلوچ سیاسی تکاں ھمے گوشگ بیگ ءَ اِنت کریمہ بلوچ ءِ “کوش” ءَ پاکستانی چیریں ادارہ دزمان جن اَنت –

سیاسی مردمانی گوشگ اِنت کریمہ بلوچ ءِ جسد ءِ آیگ ءَ پد پاکستانی پوج ءِ نیمگ ءَ اے منانک ءَ زانگ بیت کہ کریمہ بلوچ ءِ ادریرہ ءِ کروجگ ءُ آئی ءَ جسد ءَ سیاسی مردمانی دست ءَ نہ دیگ ءُ پد ءَ لس مردماں جنازہ ءَ بھر زورگ ءَ نیلگ اے درستیں گپانی منانکاں پدر کنت-

نماز جنازہ بلوچستان نیشنل پاٹی ءِ دمگی سروک ملک گامن مری ءَ وانینتگ ءُ نماز جنازہ ءَ پاٹی ءِ باسکاں ھوار شھریاں بھر زرتگ ءُ کریمہ بلوچ ءِ ارواہ ءَ دوا کرتگ –

کریمہ بلوچ ءِ ناساڑی ئیں نماز جنازہ ءَ مُلا داوت داتگ اَنت بکے آیاں نماز جنازہ ءِ وانگ ءَ انکاری کرتگ چریشی ءَ بی این پی ءِ رھشون ءَ وت نماز جنازہ وانینتگ -.

زانگ بہ بیت گوستگیں روچاں ھزدار ءَ کریمہ بلوچ ءِ نماز جنازہ بگیری ءَ بی این پی ھزدار ءِ رھشون شفیق الرھمان ساسولی ءَ وت وانینتگ اَت –

شفیق الرھمان ساسولی ءِ گوشگ اَت کہ کریمہ بلوچ راجی گیرت ءِ نام اِنت ءُ آئی ءِ جسد ءِ کمشرپی کنگ ءُ مردماں جنازہ ءَ بھر زورگ ءَ نیلگ ایرجنی اِنت –

شفیق الرھمان ءَ گوشتگ اَت کہ ما ترسوک نہ اِنت اگاں ترسوک مئے نماز جنازہ ءَ بھر زرت نہ کن اَنت ءُ وانینت نہ کن اَنت ما وت وتی جنازھاں ونت ءُ وانیت کن ایں –