گورکوپ ءُ بولان ءَ پاکستانی پوج ءِ زوراکی برجاہ

بلوچستان ءِ دمگ کیچ گورکوپ ءَ پاکستانی پوج ءِ زوراکی برجاہ، دمگی مردمانی رد ءَ دمگ ءِ تہ ءَ نوکیں پانگس جوڑکنگ بوتگ جنگل ماندارگ بوتگ انت ءُ بلوچستان ءِ دمگ بولان ءَ مروچی دومی روچ ءَ ھم پاکستانی پوج ءِ زوراکی برجاہ بوتگ اَنت –

گیشیں ھالانی رِد ءَ بلوچستان ءِ دمگ بولان ءَ گوستگیں دو روچاں پاکستانی پوج ءِ لشکر کشی برجاہ انت- مروچی لشکر کشی اُچ کمان، سجاول ءُ چپ چاگردی دمگاں تاں برگ بوتگ –
دمگی اھوالکار ءِ رِد ءَ پوج مزنیں کساسے ءَ اے دمگاں روگ انت وھدیکہ آھاں بالی گرابانی ھم کمک گون انت –

گوستگیں روچ ءَ بالی گراباں بازیں دمگاں تیرگواری ھم کرتگ –

ھمے وڑ بلوچستان ءِ دمگ گورکوپ ءَ یک ھپتگے ءَ گیش انت کہ لشکر کشی بندات کنگ بوتگ مروچی آئی ءِ تہ ءَ گیشی آرگ بوتگ –

دمگی مردمانی رِد ءَ مزنیں کچے ءَ پوج لشکر کشی ءَ بھر زورگ ءَ اَنت،وھدیکہ دگہ پوج ھم آیگ ءَ اَنت۔

اھوالکار ءِ رِد ءَ پاکستانی پوج ءَ سری گورکوپ ءَ کلگ کور ءُ جنگلاباد ءِ کورانی تہ ءَ بازیں جنگل مانداشتگ اَنت – پوج ءَ کوھی دمگ دمس ءُ رنگاں کور ءِ دپ ءَ نوکیں پانگس جوڑ کُرتگ۔

زانگ بہ بیت بلوچستان ءِ دمگ گورکوپ ءُ بولان ءَ ھوار ایندگے دمگاں ھم پاکستانی پوج ءِ زوراکیانی ھال بیگ ءَ اَنت گوستگیں سال ءِ گڈی ماہ ءَ بولان ءُ ھرنائی ءَ مزنیں کساسے ءَ لشکر کشی کنگ بوتگ – شاھرگ ءَ لس مردم ھم زورانسری آوار جنگ ءُ بیگواہ کنگ بوتگ انت، اود ءِ جنگلانی ھم ماندارگے ھال اتکگ –

ھمے وڑ یک ھپتگے ءَ پیش کیچ گورکوپ بندات بیتگیں پاکستانی پوج ءِ لشکرکشی روچ پہ روچ گیش بیان اِنت، لشکر کشی ءِ میان ءَ بازیں مردمانی آوار جنیانی ھال ھم اتکگ –

بولان ءُ گورکوپ ءَ پاکستانی پوج ءِ نیمگ ءَ بیوکیں لشکر کشیانی بارہ ءَ دگہ ھال دیم ءَ نیاتکگ اَنت –