مچھ ءِ وئیل: شال ءَ دربندیں ھرتال، نندانکی زھرشانی برجاہ

دی بلوچستان پوسٹ

مچھ ءِ وئیل ءِ ھلاپ ءَ بلوچستان ءِ بنجاھی شھر شال ءَ دربندیں ھرتال برجاہ اِنت ھمے رنگ ءَ کھول ءُ ھزارہ برادری ءِ نیمگ ءَ پنچمی روچ ءَ جونانی ھمراھی ءَ نندانکی زھرشانی برجاہ اِنت –

ھرتال ءِ جار ھمسنتیں تاجران بلوچستان ءِ نیمگ ءَ بنجاھی شھر شال ءِ دزبندیں نھاد جاہ ھرتال ءِ سوب ءَ بند اَنت ھمے رنگ ءَ دگانی سر ءَ ھم رؤگ ءُ آیگ کم اِنت –

دومی نیمگ ءَ شال ءِ ھون بادینوکیں ٹنٹ ءَ ابید ھم مچھ ءِ وئیل ءَ ودار نندانک ءَ نشتگیں مردمانی نیمگ ءَ رودراتکی شھدگ ءَ زھرشانی نندانک ءَ پنچمی روچ ءَ برجاہ –

ودار ءِ آسر ءَ نندوکیں مردماں سر وزیر پاکستام عمران خان ءِ آیگ ءِ وداریگی ءَ چم اش راھیگ اَنت بلے داں انگت ءَ سروزیر ءِ آیگ ءِ جار شنگ نہ بیتگ بلے مروچی مریم نواز ءُ سر وزیر سندھ کابینہ ءِ ھواری ءَ شال ءِ آیگ ءِ جار اش جتگ –

ھمے رنگ ءَ جتا جتائیں سیاسی رھشونانی نیمگ ءَ مچھ وئیل ایر جنگ ءُ ھزارہ برادری ءِ ھمدردی ءَ شال ءَ سر بیتگ اَنت-

گوستگیں شپ ءَ پی ٹی ایم ءِ رھشون مھسن داوڑ ءَ ھم وتی ٹویٹے ءَ گُشتگ کہ ھزارہ برادری ءِ گم ءُ رنجاں سرجمی ءَ ھواراں –

مھسن داوڑ ءَ گُشتگ کہ من ءَ بلوچستان ءِ روگ ءَ بندش جنگ بیتگ بلے مئے گل ءِ رھشون ءُ باسک ملا بھرام زبیر شاہ ءُ باچا ھان شال ءَ نشتگیں ھزارہ برادری ءِ نندانکی زھرشانی ءَ جاڑیگ اَنت ءُ پی ٹی ایم ھروھد ءَ ھزارہ برادری ءِ گون ءَ ھمکوپگی ءَ ساجو اِنت –

زانگ بہ بیت سَے جنوری ءَ بلوچستان ءِ دمگ مچھ ءَ اشکرانی چات ءَ میان اُستمانء ناشرکاریں گل داعش ءَ یازدہ ھزارہ کاریزکارانی گردن بُر اِتگ ءُ کُشتگ اَنت –

پاکستان ءِ تھ ئِے کارانی وزیر شیخ رشید ءَ دگہ وزیرانی دوچاری ءُ گپ ءُ ترانی ءِ بے سوبی ءَ پد سروزیر بلوچستان جام کمال ءِ گپ ءُ تران بے سوب بیتگ – زھرشانی کنوکاں سروزیر پاکستان عمران ھان ءِ آیگ ءَ داں جونانی کَل ءُ کسارات نہ منّ اِتگ –