کریمہ بلوچ ءِ کوش ءِ بگیری ءَ تربت ءَ زھرشانی ءُ روانک

دی بلوچستان پوسٹ

بلوچستان ءِ دمگ کیچ ءِ بنجاھی شھر تربت ءَ بلوچ یکجھتی کمیٹی ءِ دزبندی ءَ نامی ئیں بلوچ زالبول رھشون ءُ بلوچ اسٹوڈنٹس آرگنائزیشن آزاد ءِ گوستگیں چیئرپرسن کریمہ بلوچ ءِ ناھکیں کوش ءِ بگیری ءَ مھلوک ءَ بازیں کچے ءَ زھرشانی روانک ءُ زھرشانی کرتگ –

روانک ءُ زھرشانی ءَ کیچ ءِ جتا جتائیں وانگجاھانی نودربراں ھوار زالبول ءُ چکانی بازیں کچے ھوار بیتگ ءُ آیانی دستاں کریمہ ءِ کوش ءِ ھلاپ ءَ اکس ءُ نبشتگیں تاک ءُ انساپ ءِ لوٹ ءَ کنگ ءَ بیتگ اَنت –

روانک ءَ بھر زیروکیں مردم تربت ءِ دگانی سر ءَ تران بیتگ ءُ شھر ءِ بنجاھی شھید فدا چاراہ ءِ سر ءَ مُچے ءِ دروشم ءَ مُچ بیتگ اَنت –

ھمے وھد ءَ جتا جتائیں راجدوستیں پاٹی، نودربر گلاں ھوار سول سوسائٹی ءِ رھشوناں کریمہ بلوچ ءِ جد ءُ جھد ءَ را سھریں دروت ندر کرتگ ءُ گْوشتگ کہ کریمہ بلوچ ءِ مزنیں ھِمت ءُ اوپار ءُ نہ اوشتوکیں جھد ءَ مروچی تربت بے تاھیر کرتگ -آیاں گْوشت کہ مروچی اے کچ ءَ بلوچ زالبول دگانی سر ءَ درکپتگ ءُ زھرشانی کنگ ءَ اَنت ءُ اشی ءِ منّینگ ءَ اَنت کہ کریمہ بلوچ مروچی ھم مئے دلانی تہ ءَ زندگ اِنت –

تران کنوکاں گْوشت کہ بلوچ راجی جھد ءِ پژدر ءَ بلوچ سیاسی باسک ءُ رھشونانی کوش مئے جزبگ ءَ گستا کرت نہ کن اَنت –

ھمے وھد ءَ زھرشانی کنوکاں کینیڈا ءِ سرکار ءِ سر ءَ کڈنی کرتگ ءُ گْوشتگ کہ کریمہ بلوچ ءِ کوش بلوچستان ءَ سیاسی باسکانی کوش ءُ آوارجنیانی درچ اِنت، البت تچکیں رنگے ءَ اشی ءِ پَٹ ءُ پول کنگ بہ بیت –

آیاں گْوشت کہ مروچی سرجمیں دنیا ءَ بلوچ زھرشانی کنگ ءَ اَنت ءُ ما کینیڈا ءِ پولیس ءِ بنداتی رپورٹ ءَ رد کن ایں – زھرشانی کنوکاں گْوشت کہ کریمہ بلوچ ءِ کشندھاں بلوچ راج شری ءِ سر ءَ زانت بلے آ کُشندہ ریپکار ءُ چالاک اِنت بلے ما لوٹ ایں کہ دنیا سرپد بہ بیت مئے دشمن بلوچستان ءَ ھوار یورپ ءُ کینیڈا ءَ سر بیتگ اَنت –

زانگ بہ بیت بلوچ اسٹوڈنٹس آرگنائزیشن آزاد(بی ایس او آزاد) ءِ گوستگیں چیئرپرسن کریمہ بلوچ ءِ جون بیست ءُ یک دسمبر ءَ کینیڈا ءِ شھر ٹورنٹو ءَ لیک شور نامیں دمگے ءِ نزیک ءَ یک کوھے ءِ گور ءَ کورے ءِ تہ ءَ دزکپتگ –

اے ناھکیں کوش ءِ ھلاپ ءَ مروچی چارومی روچ ءَ ھم بلوچستان ءِ جتا جتائیں جاھاں زھرشانی بیگ ءَ اَنت ءُ زھرشانی ءَ ھواریں مردم کریمہ بلوچ ءِ ناھکیں کوش ءَ ریاستی کوش گوشگ ءَ اَنت –