نبشتانک: نوں ندر اِنت گوادر ءِ ٹَٹ
نبشتہ کار: وسعت اللہ خان
رجانکار: ٹی بی پی بلوچی
دی بلوچستان پوسٹ
ھال اِنت کہ سی پیک ءِ سرچمگ گوادر ءَ چہ ناشرکاری ءَ رکینگ ءِ ھاترءَ گوں مھوریں آسناں یک ٹوھیں ٹٹ ءِ جنگ بیگ ءَ اِنت۔
اے شور بندی ءِ سرجمی ءَ پد گوادر پاکستان ءِ اولی شھر بیت کہ آئی ءِ ھاتر ءَ چُشیں گام زیرگ بیتگ۔ گوشگ بیگ ءَ اِنت کہ شھر ءَ پُترگ ءُ درکپگ ءِ دو جتائیں راہ بنت دانکہ گمانی مردمانی ءُ گامانی سر ءَ چم ایر کنگ بہ بیت ءُ ناں تھنا زِر ءُ اود ءَ کارکنوکیں درملکی مردم بلکیں آیاں ھوار لس شھریانی ھم پھازگ بہ بیت۔
ھرکس ءَ کہ اے “زانتکاریں شوربندی چِن ءُ لانچ” جوڑ کُتگ، آئی ءَ یا وَ جنگ زدگ ءُ چیرجنگی ءَ سان گپتگیں دمگانی تہ ءَ گوست ءَ بیتگیں انچیں جھدانی دپتر نہ ونتگ اگاں ونتگ ءُ وانگ ءَ پد اے گمان کُتگ کہ اے شوربندی چن ءُ لانچ ءَ ما وتی زمینی جاورانی رد ءَ اڈ کنگ ءَ اِنت پمیشکا الم سوبمند بیت۔
چہ اے گپ ءَ ھچ دگری نہ کپ ایت کہ ڈیھ ءِ چمانی تہ ءَ ناشرکاریں گل، گوریلا اگاں چیر جنگی جنگولاں اگاں پدائیاں چہ کجا کمک رسگ ءَ اِنت، کَے پرمایگ ءَ اِنت ءُ کَے اے گلاں زندگ دارگ ءِ ھاترءَ “ نرم دابیں شوک دابیں ورنایاں” ریپینگ ءَ اِنت۔
گپ ایش اِنت چُشیں گیر روایتی جنگ گوں روایتیاں اگاں تھنا جوابی وڑ ءُ پیماں گوں کٹگ بیت نہ کنت۔
اِشی ءِ ھاتر ءَ یکیں وھد ءَ سیاسی ءُ شیواریں شور ءُ ڈاہ اڈ دیگ ءُ لس مردمانی دل ءُ مازگاں کٹگ ءِ سَے نیمگی گام زیرگ سوبمند بیت کنت۔ ءُ لس مردم ءِ دل ھما وھد ءَ کٹگ بیت کنت وھدے آئی ءَ ڈیھ ءِ گپ ءُ کردانی یک دروشم ئِے بیگ ءِ سر ءَ باور بہ بیت، آ وت ءَ پیسلہ زورگ ءِ تہ ءَ ھوار سرپد بہ بیت ءُ آئی ءَ باور بہ بیت کہ اے یک نوک آبادیاتی ڈیھے نہ اِنت بلکیں آئی ءِ وتی بنکی ڈیھ اِنت۔
تھنا تاکت ءُ وتی زانتکاری ءِ زورے سر ءَ اگاں واھگ داشتگیں پشدر رس اِت کُت بہ کتیں گُڑا ٹٹ امریکہ ءَ ھم زرباری ویتنام ءَ جتگ اَت ءُ ھندی مھلوک آیانی پُشت ءَ اے گُشت ءُ دیم دات اَنت کہ مول ویت کانگانی ناشرکاری ءَ لس ویتنامیانی پھازگی اِنت۔
ٹٹ وَ فرانس ءَ ھم الجزائر ءَ مِک کُتگ اِت اَنت دانکہ لس الجزائری مھلوک چہ ایف این ایل ءِ ناشرکاریاں رکینگ بہ بنت۔
ٹٹ ءِ دوداں چہ فلسطینی ھم درستاں گیش سرپدی دارنت ءُ کشمیریاں ھم وتی ھمروچیگیں زند ءِ تہ ءَ چُشیں نہ دیستگیں ٹٹ ءِ دود ءِ دیمپانی اِنت۔
چہ ایشاں کجام دمگانی تہ ءَ ٹٹ جنوک وتی مولانی تہ ءَ سوبین بیتگ اَنت، بے تاھیری، یاگی بیگ اگاں ناشرکاری اگاں نہ منّوک اش داشت کُتگ اِش؟
ءُ ھئو ٹٹ ءِ پُشت ءَ وَ 80 سال ءَ پیسر سند ءِ ھر گوں آیانی ھزار کھولاں ھوار انگریز ھاکمانی دژمن سوریا بادشاہ پیر صبغت اللہ شاہ ءِ “ناشرکاراں” چہ رکینگ ءِ ھاتر ءَ داں بازیں سال ءَ ایر کنگ بیتگ اَت۔ گُڑا اے ٹٹانی پُشت ءَ زند گوازینوکیں ھزاراں کھول انگریزانی نیمگ ءَ تر اِت اَنت؟
شما جُست کُت کن اِت کہ من یک راجی ڈیھ ءِ باڑ دوستی ءَ گوں نوک آبادکارانی دروراں گوں پرچا سِل کنگ ءَ اَنت۔
دزبندی ایش اِنت بے تاھیری ءَ گوں دیمپانی کنگ ءِ ھاتر ءَ وتگڑیں روایتی وڑ ءُ پئیم اگاں ھر وڑ کِلہ ءُ کُنٹگ ءَ چہ پرایں نوآبادکاریں ڈیھانی کار ءَ نہ بیتگ اَنت گُڑ ءَ یک دیمروی نہ کُتگیں راجی ڈیھی ءَ چون سوبمندی دات کن اَنت ؟ چہ دگہ کسے ءِ سوبمندیاں تُری تو ھچ در مہ بر بلے دومیگ ءِ بے سوبیاں چہ دربرگ ءَ کجام زھنی جیڑہ اِنت؟
وھدے تو وتی شھرانی ءُ وتی مردمانی انگیر کنگ ءِ پیم ءَ گام زیرگ ءَ ساڑی بئے گُڑا چہ اِشی ءَ دگراں اے کلوہ سر بیت کہ جیڑہ ءِ دارگ ئے تئی پیسرگیں گامگیج بے سوب بیتگ اَنت پمیشکا تو یک نوکیں بلے وتگڑیں گامگیج ءِ کمک ءَ زیرگ ءَ اِت۔
چہ ایشی ءَ تئی بگیر ءِ اوست پرشت ءَ ابید ءِ گیشتر ود اَنت ءُ آئی ءَ گام گیج سوبین بیگ ءَ گندگ کاینت۔
شر اِنت تو یک شھرے ءَ ٹٹانی تہ ءَ کُت ءُ پھاز اِت۔ ایندگہ ابید ٹٹیں شھرانی چے بیت۔ کاروائی ءِ ھاتر ءَ سرین بستگیں یک جاھے ءَ پترت مہ کنت دگہ نیمگے ءَ چہ پتر ایت۔
ناشرکار بہ بنت کہ چیر جنگی اگاں جتاھی لوٹوک یا آجوئی لوٹوک۔ تو آیاں ستر وتی دل تبیں کجام ھم نام بہ دے، آ ھندی کمک ءَ ابید انچش اَنت آپ ءَ ابید ماھیگ۔
اگاں اے شور ءِ سرجمی ءَ ھم گوادر ءَ ناشرکاری ءِ وئیل ءِ بیت گُڑا دیمی گام ءُ ھندی وڑ ءُ پئیم چی بنت؟
من اِتگ کہ میان اُستمانی سیمسرانی سر ءَ ٹٹ جنگ ءِ مول اِش اِنت کہ گمانی ناشناسیں مردم، منشیات ءِ باپاری، ءُ ناشرکارانی آیگ اگاں رؤگ تُرند کنگ بہ بیت۔
اگاں تئی میان اُستمانی سیمسرانی ٹٹ کاری جوان بہ بیت ءُ چہ ایشی ءَ ڈیھ ءِ دژمنیں مردمانی رؤگ ءُ آیگ دارگ بہ بیت گُڑا وتی شھراں ٹٹ زدگ کنگ ءِ گیشیں ھرچ کنگ ءَ چہ تو دگہ چی مول گرگ لوٹگ ءَ اِت؟
اِشی بزانت اے بیت کہ جیڑہ تھنا ڈنی نہ اِنت تہ اِنت ھم۔
دانکہ اے راستی ءِ منگ ءُ یک لس مھلوک دوستیں گامگیج ءَ آئی ءِ سر ءَ گام زیرگ بہ بیت اڈ کنگ نہ بیت ءُ اے گامگیج ءَ لس مردم منگ بندات مہ کنت داں ھما آسریاتی تاوان وَ ممکن اِنت، بلے سوبمندی ممکن نہ اِنت۔
کجام ھم ٹٹ دماگ ءِ تہ ءَ اوشتاتگیں بے باوری ءِ ٹٹءَ چہ گیشتر تاکتور بیت نہ کنت۔
اگاں دماگ ءِ تہ ءِ ٹٹ بہ پرشیت گُڑا آسنی ٹٹ ءِ لوٹ پشت نہ کپ ایت۔ البت اے مِنزل ءَ ھما وھد ءَ سر بیگ ممکن اِنت وھدے باسکانی تاکت زھنی تاکت ءِ چیر ءَ کنگ ءِ ھادت ءِ ودی کنگ بہ بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔